Sahat do barita i tu si Jamordong, sahalak na gogo minum tuak sian huta Laksa. Na mandok, adong dope tuak natumabo sian tuak ni laksa. Alai dang haru porsea ibana disi. Anggo nabinotona, sian Laksa do ro tuak na tabo. Anggilna. Didok rohana, naeng pauba dai ma Jo nian ibana, atik boha tutu barita na binegena i, iama tabo ninna tuak di Tukka nang di temba. Ai anggo tuak na di laksa, Siniang, Sihombang nunga dai aek be dihilala ibana, manipat ari, manogot siarian, bodari sai holan na tuak i do dipaninum-inum ibana. Haru marsuap pe tahe, nunga tuak dibaen. Lao ma ibana tu Tukka, tong ma holan na naeng mandai tuak, mulai sian lapo in Sipardosi di Tukka Na Jonok, sahat ro di tuak ni si Mutte di Tukka Ambobi, jonok TU lombang sigurung-gurung I.
Ninna rohana , dang main tong tuak di Tukka on, anggo baritana so i nama begeon, dang nanggo mongona i.
Angon-angon, dinalao mulak ibana sian Tukka, dibege ibana ma di sada lapo di pasar Pakkat, na adong piga-piga halak na minum tuak. Di tangi ibana ma nanget, dungi dapotsa ma batu in hatai, didok “di Siambaton do tabo tuak, sagalas pe in inum alai tor mangonai”.
Bah..naruhani si Jamordong, Ai nabinoto dah “Siambaton panakko”, hape on, tuak na tabo ninna disi. Tutu do naeng on? asa ni suba jo. Atik na toho do barita i, ninna rohana. Huroa sai manginongi ma dirohana, jala ikkon lao ibana tu Siambaton. Nang pe minum ibana di Laksa di lapo ni si Marbun, alai ingotanna sai tu tuak ni siambaton nama.
Balik arina, toho ma tutu, lao ma sahalakna tu Siambaton.
Attar 15 kilo meter ma nuaeng on, sian huta Laksa – Siambaton. Dihatopi ma borhat sian laksa asa sahat potang air disi. Diida ibana ma tutu, godang na minum di lapo i, jala tabo be akka parekkelna. Toho do barita i hape, ai di Siambaton on, godang do tuak hape, apala di lapo in Sihotang tokke gota i ma ibana maradi.
Disobur ibana ma tuak on hatop, sagalas, dua galas, tolu galas…. ” dang mardai!!…tumabo di Laksa!” ninna mandok nadihutana. Tung longan do parhuta i marnidasa, haru nasida olat ni dua galas gajjang do boi masuk, hape on, nunga onom galas, tong do didok dang mardai.
Huroa, nang pe dang mardai ninna, alai anggo raru ni tuak i, nunga mangula be. Nga tabo be makkatai ibana dilapo i. Sai ibana nama sipabege-begeon dilapo i. Nga pajago-jagohon ibana manarik lagu, nangpe so diboto marende. “lagu pitu lae” ninna ibana, hape dia ma adogn lagu pitu. Disuhuthon ibana ma na jalo go ibana. Dang parbiar. Hape sabotulna parbiar do bayon. Alai ala nunga tuak i namakkatai, bah barani ma ninna ibana. “Hu uppat silang ni namate, saonari? asa di ida hamu, alai hamu paulakkon” ninna ibana mangagai. Mabiar ma nasalapoi.
Sai na adong do na olo mamanggar. Tabo hian do mamanggar na mabuk, manang aha nidok, molo dang satolop ibana, sai tor di jogal do, di tantang istilah saonari.
Disuba na sahalak an di lapo i ma ibana. “Molo na jago do ho, lao ma ho mulak sahalakmu tu Pakkat”.
Dioloi si jamordong do attong, ai bohama nunga hona raru i, “Gelleng nai hita, holan ido?…gelleng nai” huhut ma dibayarhon ibana tuak na ni inum na i.
Mardalan ma ibana sian Siambaton mulak tu Pakkat, mamolus borngin, langlang, golap-golap i, jala buka-bukka baju.
Mula na i, barani do ibana, huroa tong dope makkatai tuak i dibagasan ibana. “Ise urroa, aca hutanda. Par-Ciambaton do, curu tu con….cada, dua tolu halak, cahalakku pe …”ninna. “Cahuta pe cilaplap…”
Dung lewat Aek Sopang otik, huroa moru ma KINERJA ni raru on, gabe satonga sadar ma Diboto ibana, nunga mardalan pitu kilometer. Holan lewat huta i kamar 13 nama, ima hadabuan ni motor najolo, ro ma biarna, balga ma uluna, sigurbahon.
Dilului ma akkal. Mulak tu pudi, dang toho. Dipaima pamolus dang adong, bohama nga tonga borngin.
Digalaki ma tolu batang sigaret. Dungi dibuat ma sappilpil, diihoti ma sigaret i sabatang disi, dungi di ihoti ma muse sappilpil i tu uluna, tu samula siamun. Dungi nadua nai di tangannga ma. Sada di hambirang, sada di siamun. Mardalan ma ibana.
Makkatai ma sahalakna.
“Sian dia lae…” ninna ibana, alai bongor soarana.
“Imadah lae,..cian Ciambaton do nakkinon, adong pesta adat…” ninna ibana muse, tong salalakna markkatai. Alai songon na tinggil anggo saulak on, jala logat ni par Siambaton.
“Bah, ai dang parbiar hamu ateh,….”
“Ai aha sihabiaran di portibion, agiat muse hita na tolu do sadalanan dah, adong dongan makkatai” ninna muse mangalusi hata na i.
Sibata ma dialsik sigaret on, marulahulak, marsoring soring, sai makkatai sahalakna.
Berengon ni halak attong, tolu halak namardalan i. Ai tolu api ni sigaret, jala tolu soarana.
Lewat ma Sidulang Dalan. Tong ditorushon ibana gaya na on. Hape adong ma mamereng dakdanak ni parhuta i, huroa marmeami dope. Disuraki ma ibana. “Nagila…nagila…..onne na gila…beta ta lele”
Dia dang didok na gila, ai tolu sigaretna, makkatai sahalakna, jala marihot-ihot uluna.
“Nagila..nagila…onne nagila..”ninna dukak-dukak ni parsidulang ma, huhut ma dilele-lele.
Bah…tarjolma ma ibana, dang toho be on, ninna rohana disonggal ma dukak-dukak i “Heh!….dang na gila au dah….napolaon do, asa diboto ho!!” ninna ibana.
