Sai na dibaen do


Somalna di parpungu-punguan ni halak batak, dung sidung ulaon na marboho, sai dipukka do nonang, lalun, manang didia pe taho, dirangrangi sian hata lalun sahat rodi hata na marsittuhu Ai sada hasomalan ni halak batak ima nanidokna jambar hata. Sada cara laho pasangaphon akka dongan, dihalak batak, ima marhite na nilehon tikki laho makkatai.

Taidao i diulaon adat, manang adat beguaha pe taho, sai dijouhon do donganna sahundulan, dongan tubuna, songan sahuta asa mandok hata. Ai didok do naso maradat molo dang nanggo pala dilean donganna makkatai. Nata pe jo, sai marulahulak hatai dipandokkoni be aha naung pinasahat ni na makkatai parjolo ido tong didok muse.

Songoni do nang di na adong ulaon manogarnogari, sai sude do na ro i pasahat hatana, natape mulahulak dipandokkoni be. Ai molo so dilean na asing makkatai, ra sai adong do na hurang. Taida do molodi ulaon adat, olo do tuk sadari holanna makatai. Ido hape gabe adong na margoar raja parhata.

Disada tikki, marpungu ma iba dohot akka dongan sabutuha, ima ditikki na dipamasa hami ulaon manogar-nogari. Dung sun ulaon i rupani, sai dipukka dongan do nonang, jala sai gok do sihataan. Ai dang tor marmulakan be dope akka tutur, dung sippul ulaon i annon.

Dimulaima sian akka sahit namasa nuaeng.  Ra, nungnga rappak hita umbotosa, na tung marragam do sahit saonari on. Adong ma na dalik sian pinahan lobu, sian manuk nang sian horbo manang lobbu pe taho. Hurang do pangantusion rupani boasa boi dalik sian pahan-pahanan akka sahit i. Adong do dongann naso haru porsea.

Didok, mulai sian najolo, andorang di hitaan dope iba, nunga sai niallangan na margoari ( red-pilo ) alai datung manang mahua hita on. Nang di tano parserahan on pe, sai ido dipatupa akka tutur laho allangon, molo adong ulaon las niroha nang habot niroha.

Sipata molo nipikkiran, tung na baranipulut do hitaon. Ia saonari, saitadok ma akka horbo naso sigagat duhut i siboan sahit. Hape molo tabereng do tupudi. Ikkon adong do ihur-ihur i asa sah adat batak i. Ai satibbo dia pe sikkola ni gelleng, parumaen, sadia mora dia pe artana, gok masna, gok jabuna, alai molo nunga marulaon, holan ihur-ihur i do gattina.

“E..tahe, nasib mi, ihur-ihur…”

Tung sikkola pe boru ni rajai sahat rodi Amerika, alai ollat ni sada ihur-ihur do leanon tu raja ni hula-hula i.  Dang holan i, Tubu si ussok, nunga gotap rukkung ni pinahan sada. Dukkon laho boanon muse tardidi tu gareja,  manang na makkatindakkon haporseaonna, tong ikkon  tu sakkalan nanggo sa ekkor.

Sahat ro di sikkola iba najolo, ikkon tong do pinahan i tu panggadisan. Si Rajatega do hita on sude. Dukkon muli boru, mangoli anak tong tanggurung ni pinahan i tu pananggoan. Sahat tahe tu na marujung halak batak da ikkon tong do pinahan i boanna, nanggo pala sada.

Lapatanna rupani, mulai sian na tubu sahat rodi marujung ngolu ni halak hita, sai tong do tu pinahan i laona.

*    *    *

Ni ingot dope najolo, molo nunga bot ari, mulak natua-tua i sian balian, na parjolo disukkun ima ” Nungnga mangan babi?”.
Bah, ai na umporlu do naeng babi i sian iba?. Dang nanggo disukkun, “nunga mangan ho? nunga mangan akka anggim??”.  Sukkun-sukkun parjolo ”Nungnga mangan babi?”. Sukkun-sukkun na mangihut, “Nunga marlobu manuk? bibi?, habbing”.

Sukkun-sukkun na mangihut muse “Butong do mangan horbo nakkinon?”. Molo nunga denggan sude, ipe asa disukkun  na asing tahe. Geok do sipata.

Molo didapot natoras niba dang dope mangan pinahan on, so inama muruk na ai didok do, “Babi i do pasikkolahon hamuna dah,…” Bah!! nga gabe abbal, jadi dang natua-tua i hape? Babido?. hehehe

Namarlapan rupani, molo nunga ro surat ni parsikkola sian medan, laho mangido hepeng  tu parkuliaan, tor hatop do pinahan i di gadishon. Molo adong pe aka narikkot tu parhepengon, sai  tor pinahan i do si dikkang. Met-met dope iba najolo, marumur pitu taon dope alai ganup manogot, andorang so lao sikkola ikkon manggat-gat panganon ni pinahan ido, labbuk dohot akka na asing.

Saonari, binereng di tipi i, gabe musu na bolon nama pinahan i, e tahe sai na dibahen do.

“Najolo, so na hea niallang naggo tolor ni manuk, tung mar tolor pe manuk manang bibi i sai tor tu panggadisan do ” ninna amanJamordong huhut di galahi sigaret Sampurna na i. ” Alai boi do iba hipas, malo, jala boi mangaratto  sahat tu tano Jawa on ” ninna muse manguduti huhut di obbushon timus ni sigaretna i

“Tutu na i amangUda, adong do najolo suhutanku. Ia aui najolo, ditikki met-met dope, marumur pitu taon dope ia ulaonku ima marmahan bibi, dang pola godang ninan hoaln sappulu ekkor do” ninna amanTapar

“Ra sude do hita naung marumur lobi tolupulu lima taon tu gijjang ta ahappon na porsuk na di huta i, ai diparserahaon on do idaon, laho mangallang  jagal manuk pe nisuru dakdanak i dang olo, olo do pangurupi i maradalam mulai sian RT niba sahat tu RT na asing, opat blok perumahan i, holan mangalele-lele dakdanak on mangalehon mangan” ninna amaniAndulpang sian suhi-suhian.

“Hea ma dang mulak bibi on sian saba i, huroa ibban naung gijjang ari hutaruhon tu balian gabe tarlabbat ma butong, gabe lalap ma sahat rodi botari, dung diboto bibion botari, dang olo be mulak. Jala ngongon do nasiada ditonga nisaba i, sai hu joui alai dang naggo marsuara” ninna amanJamordong manguduti suhutanna i.

“Mulak ma au tu jabu dah, tangis-tangis, bohama marumur pitu taon, anggo pamotoanhu molo nga ro natua-tua i annon, ikkon di denggal ma gotting i dohot lili i, dang disi be bibi bapa, nga mago, nikku” jala toho do na huangan-anganton i. marbabban ma pat i. Hona lisssing.

Pahatop lului, ninna manonggak. Sai tarilu-ilu ma tutu iba mangarjang saba on tu tonga-tonga huhut ma sai marsurak iba sampe dapot do bibi on asa boi mulak tu huta. Diallang hosuk ma inon i, ninna umak niba muse. Tippas!

*    *    *

Sahat ma nihataan tu batuk ni manuk, ai sonari on pe binoto manuk batukon. Anggo na jolo holan na boddilon do sahit ni masuk, ia so i di soro hosuk. Molo saonari manuk na batukon ninna dang boi be allangon. Hape, mulak hita tu pudi songon hatakku nakkinon. So hea hita on mangallang jagal manuk. Dakkea i!!.

Ikkon na ro ma tulang sian huta na dao, jala molo nga diarahon tulang on iba mangan, tor morot ma iba manjonoki. Alai tor hatop do inong niba i mandok ” Nga sanakkinon mangan i ito, songoni do halakon molo adong akka tutur, pailahon” ninna huhutma di bollang. Molo attar jonok, digotil mar gotting nanget jala di husiphon “Paitte annon,  parsudam!. Pailahon ho” ninna.

Anggo olat ni na boddilon do manuk, molo holan na oyong dope mardalan manuk i, datung tor seaton i. Ikkon jolo peak pe, mate!. Dungi, jinama ma mohop dope, ala baru mate, disipe iba mangallang manuk. Alai tabereng ma, datung adong hita on na marsahit najolo. Sangajo do niputtarhon pira ni manuk on, dungi nidokma maputtar saddiri, ipe asa hea mangallang tolor. Jala nidok ma muse holan lima do tolor ni bibi i, hape nunga tinabunihon sada asa adong bolgangon annon.

Ia so i, di loddos lereng ni deba manuki, holan hae-haena nama na tading, ipe dibuat do i, diloppa.

Tutu ma nian i, haru horbo naung mate sadari alani na magulang tu lobbang, datung di tanom i, alai di sahe do di rurua i, dungi dipambagihon tu jolma torop i. Datung manang na marsahit, manang na mahua jolma na mangatton i. Ai holan ari natal dohot tabbaru do masa marbidda, masa maneat manuk, maenat pananggai lapatanna sahali sataon do mangallang jagal najolo di hitaan.

Nasumalin do hajolmaon saonari, ai dukkon maju pe parbinotoan, maju akka teknologi gabe godang ma marroan sahit, marroan akka namasa. Sai na dibaen do!

About latteung

Saya..... yang selalu menuliskan pikiran yang terlintas... merenung sejenak, lalu menulis...

Posted on 5 Juli, 2010, in HATA SO PISIK. Bookmark the permalink. Tinggalkan komentar.

Berikan Balasan

Isikan data di bawah atau klik salah satu ikon untuk log in:

WordPress.com Logo

You are commenting using your WordPress.com account. Logout / Ubah )

Twitter picture

You are commenting using your Twitter account. Logout / Ubah )

Facebook photo

You are commenting using your Facebook account. Logout / Ubah )

Google+ photo

You are commenting using your Google+ account. Logout / Ubah )

Connecting to %s

Ikuti

Get every new post delivered to your Inbox.

Bergabunglah dengan 2.984 pengikut lainnya.

%d blogger menyukai ini: