TORSA

Martandang….

Namardongan do si Darianus dohot si Jamordong. Sakarejo nang sajabu. Sai hira naung leleng do nasida marsitandaan molo berengon ni halak, hape satohona, habilangan bulan dope nasida nadua na mardongan i.

Alai nang pe songoni, boi dohonon sapartinaonan nasida. Rappak marutang, rappak so manunggak kontrakan.

Parjumpaan nasida nadua ima ditikki dijalo nasida karejo di sada pete ni halak jepang di Mukakuning. Ai sarupa parnasipon nasida si tano Batam on. Rupani nunga somal diparutangi nasida parlapo i, jala mambayar dung gajian. Sakamar ma nasida nadua di sada kontrakan di Batuaji. Rupani, attar sossok do anggo sipat nang pangalaho nasida nadua, rappak koji marende, koji marbola kaki, nang koji manonton sepak bola di tipi.

Disada tikki, topet dijabu nasida nadua rap manonton semipinal ni Liga Champion Eropa ima tikki Barselona maralo tu Chealsea, dibereng si Jamordong ma di Darianus songon na hohom jala murhung bohi i.  Tottu sahali, songon naso tabo do molo mekkel marsonang-sonang hape dongan mealungun ni roha, ninna si Jamordong dibagas rohana. Lobi muse, diboto ibana do, ia si Darianus on, sahalak na koji do mamereng Chelsea, ai sai dipasuman-suman ibana do pangalaho ni si Drogma tarlumobi molo marbola nasida, hape holan birong  na  do na dos. Sude do asing, tarlumobi parnasiponna.

“Aha namasa boh.,..songon na mendung do hubereng di jembatan Barelang an..” ninna si Jamordong songon na marlalum.
“Boha lae, sakosong ma dilae? Barselona di au..” ninna muse. Ai diboto iabna do tong sahit ni si Darianus on, molo nunga tu namartaru-taru, uang kontrakan pe boi do linop, asalma Chealsea ditiop ibana.
“Dang ro ringgas namanonton on” ninna si Darianus
“Noasa gale lae, na so boi do maranak horbo jattan I di huta??” ninna muse marlalun
“Biasa ma lae,…”
“Manang na di tolak do sitta ni lae??” ninna songon na mandatui, manukkun.
“Sai hira datu pangolpuk do ho, dibotoi hodo dohot nadikolor hon” ninna siDarianus, songon na hona sukkun-sukkun ni si Jamordong i.
“Ai tolu do lae na masa tu halak hita molo lungun rohana, molo dang adong pasisigaret, kode buntutna attar hona otik, ia so I, alani anak boru” ninna si Jaordong songon na malo
“Olo bah…mantap itoan I, sa didepartemen nami, na baru masuk dope, duabulan dope, alai songon na malengleng ate-atekki molo huida” ninna si Darianus.
“Kessil ma I lae…berengon ni lae jo hubaen sian nadidompet hon??”
“Tutu do on lae, nga madabu holong au bah”

Nasida nadua nangpe sa pete, alai marasing do anggo inganan parkarejoanna, ima departemenna, jala dang masipaida-idaan ansida nadua molo dung di pete. Molo sian rupa nian, tu ukkuran ni halak hita boi ma dohonon baoa na gatteng do nasida nadua.

Jala ditikki baru masuk dope Duma, huroa tor marpangoit ma tu rohani si Darianus. Andorang so marsitandaan nasida, nunga diboto sidarianus na boru batak, ai sian goar ipe tanda do. Lam leleng, lam balga ma holong i. Jala dipataridahon si Darianus do I, olo do diarahon si Duma on rappak mangan di kantin. Jala sai disukkun do rupani aha barita tiap manogotna i. Dang lupa, molo nga di jabu sai si esemes do, hape nian pajupa do tiap ari. Ai didok ibana do molo dang diida ninna nannggo sadetik, sai hira naung sundut do portibi on.

Asing si Darianus, asing do si Duma, ai poso dope ibana baru pe tammat sian sikkola, jala naeng karir ma parjolo luluanna, uhut muse, borua pamillit do ibana. Anggo songon sitelan ni si Darianus do ninna, olat ni ‘maintenance’ di pabrik boi dua pulu dapot au, ninna di bagas rohana. Jadi molo di istilahon saoanri, jual mahal do ibana. Mardomu ma tu natua-tuana pe sahalak pamilliti do, ai boi dohonon anggo apala halak hita di Batam on sude do namanda i, ai ise naso mananda anggota de pe er de nuaeng on ateh, na jot-jot tarida di jolma torop.

Nunga piga doli-doli muttul martandang tujabu ni itoan on, ala pangalaho ni natua-tuanai, tarlumobi amongna. Sai pittor didulo do tu duru rupani, mamakke aha do nasida na ro on. Anggo apala naik Ge El do manang goyang lutut alias mardalan pat, bah…horas ma. Tor hatop do disuru si Duma laho modom. “Bah, ai dang karejo ho marsogot boru?” ninna. Alai molo mar mobil do, disuru dope pangurupi i mambaen kopi.

Marbisuk do si Darianus, disukkun-sukkun ibana do boha pangalaho ni itoan na tinggal di sada perumahan na massai uli di hutai ima apala na jonok tu Mall Panbill i. Jala sude do namananda ibana mandok, dang kalasna itoan I. “Anggo dang ihur martimus lae dang dapotmu i” , ninna sahalak donganna. Jadi tung marsak ma ibana.

“Beta ma lae, asa dibereng ho jo au martandang” ninna siJamordong
“Beta ma tutu, mardomu malam minggu on, sai dijabu hita” ninna si Darianus
“Alai dah, au ma gumodang an makkatai, pokokna holan patandahon au ma ho, jala manang aha hudok sitau olohon ma” ninna muse.

Dang sadia leleng sahat ma nasida nadua tu jabu ni si Duma, jala songon na mardongan na sida denggan do diakkupi si Jamordong, jala dipatandahon si Darianus ma ibana tu itoan i.

“Mahua jari-jari munai  ito…” ninna si Duma, dibereng ibana songon na dilapiti si Jamordong tolu jari-jari sihambirang I, jala sangajo do diangkat ibana tibbo laho manginum tes manis I asa disukkun itoan I ibana. Dapot!! Ninna ibana dirohana.
“Imadah ito…” ninna nanget
“Adong sigaretmu lae? Habis bah…” ninna tu siDarianus, hape holan kode do on asa lao do siDarianus on, ai nunga i nakkinon hata nasida.

Tading ma si Jamordong dohot si duma.

“Mabugang tangan hi nakkinon, ribak dibaen kassa” ninna huhut dipareso jari-jarinai, hatana attar sohabegean.
“Adong huting Siberia di jabutta, nian nunga binaen sada bilut inanganna, jala binaen do ase dua asa ngali,…” ninna si jamordong, huhut diinum tes manis di jolona. Masiberengan nasida nadua. Serom si Jamordong.
“Ai huting beguahai ito” nina si Duma songon na hona dirohana, ala lomo dot ong roha ni ibana mangida huting.
“Lao natua-tua I liburan nabulan na lewat tu Petersburg, imana di Rusia, jadi diboan sada anak ni huting on sian an, hape dung sahat dison dang ha urus nasida, dilehon ma tu au, ala diboto boi au mangurus, hape asing do inganan ni on, ai ikkon ngali do, jadi nga hubaen nuaeng inganan ni huting on, jala tolu ma ase pangalihon, siallangonna pe ikkon na sian Rusia I do tinuhor, habis ma biaya tuson, nga habis kredit kart hu dibaen i, lenaon nama ninan tu akka pamili ito, adong nagiot diboto ito?”

Huhut ma songon na unduhunduk itoan I, dungi disukkun muse “ Boasa mabbal huting tu jari-jarimunai”

Anggo natua-tuani si Duma, dibege-bege do nasida na makktai i apala sian labasan ni jabu i, huhut manonton tipi. Huroa songon na tabo do dibege ibana suhutan ni si Jamordong tariongot tu huting siberia on, ro ma tupikkiranna, na paradongon do si Jamordong.

“Imadah, nantoari, lupa au manutup pittu, hape tor haluar huting on, di labasan nami i adong do disi sada akuarium nabolon jala diingani sada ihan Arwana, supper red ninna goarnion, au pe ito sopola huboto massam ni ikkan on, alai na liburan hian nantoari tu penang Malaisya bah huboan sada. Manibbung huting on tu gijang ni aguarium on, alani biarhu masuk tubagas hulele hatop, hape di tibbuk muse tu gijjang ni tipi LCD nabolon si 56 insi i, humalaput ma au manakkup, hape dang huparrohahon tarttuk ma kassa na marbingkai hau jati nasian jepara i, ido asa mabugang tangan hon” ninna ibana muse. Huhut ma di uduti nasida na makkatai i.

Mullop ma amanDuma, sian pudi ala songon na hona do gaya ni si Jamordong namakkatai i, jala marsijalangan huhut marsitandaan ma nasida. “Parpete-pete do au tulang” ninna ibana.
“Olo ma bere, alai nuga menejer ra hamu ateh bere..”
“Ah tulang on nian….siloja-loja do iba”
“Ai didok hamu, lae i, natua-tuamuna tu Rusia, apala aha do karejona??”
“Songoni ma tulang, ala opat hami gelleng ni damang on, jadi tung na susa do ibana mangalului karejo i, na adong do tolu perusahaanna di bidang parmasi dohot alat kesehatan, jadi adong undangan sian Rusia lao seminar, huhut liburan”
“Jadi dokter do natua-tua i??”
“Daong tulang, abanghu siakkangan do dokter, jala akkang boru ipe dokter do, di Jakarta do nuaeng, dokter spesialis na rittik”
“Molo halak ito, natoras boru??”
“Holan dijabu do tulang, alai adong tolu ruko dijolo ni jabuttai, martiga tiga imitasi dohot perhiasan naasing muse, asa adong daon lalapna” ninna si Jamordong muse. Lam tamba ma longang ni amanDuma mamereng haserepon rohani ibana. Namora alai olo do karejo di pete. Didok si Jamorodong attong na marsiajar do ibana di perusahaan ni Jepang i, andorang so ibana maniop perusahaan ni amongna. “Ikkon tu jolma na maju do iba marsiajar tulang, boha di baen nasida, ba, asa boi ni ulahon” ninna ibana manguduti.

“Ai tuson naik aha hamu bere, dang lilu hamu?”
“Imadah tulang, dohot dongan nakkinon mar kareta, dongan sa karejo ni pariban on, tope mardalani au tu kontrrakanna, ai mardomu dison do nuaeng anggikku siappudani, liburan, ala ipe ibana tammat sian akabri, jadi dilean suti piga ari. Diboan do mobilhu liburan, mamereng-mereng puloBatam on ninna”.
“Ai opat ninna hamu bere martinodohon, nadeba nai??”
“Imadah tulang, massai lomos do natua-tua on mamereng sipaiduaon, bohama pilot ni maskapai ni Perancis i do ibana, jadi sahali satonga taon do ibana mulak, hape nunga dilean natua-tua i di ibana sada perusahaan i, alai dang olo ibana.”

“Ai na nunut do huroa natua-tua i akke…”
“Ido sai dipaddok tu hami tulang, opat hami anakkon na jala ninna nasida ikkon sonang ma tinggalhononna hami molo dung sundut arina, jadi sai didokdo asa marsiajar iba di perusahaan on, ido alana gabe ro iba mangaratto tu Batam on, na marsiajar do” ninna si Jaordong.

Tabo ma nasida namarnonang i, ai gabe amanDuma nama dongnanna marpollung, jala hatop ma disuru si Duma mambaen akka siallangon na metmet dohot si inumon na las, isara bir dohot na asing. Ninna rohani amanDuma, dang sala be Borukkon mamillit na gabe donganna. Ipe sahalion adong na jeges ro martandang.

*      *      *

Dung dipardalanan lao mulak nasida nadua sian partandangan i, disukkun si Darianus ma bohado sarana asa boi tudduk natua-tuani itoan i, alai jolo di jalo ibana ma sipatu napinakke ni si Jamordong i, ai bohama sipatu pijjaman do i
“Dia sipattukki lae, marsolop do ho nakkinon, gabe ho unggatteng, hape iba do na martandang”
“Ho nian lae…”

Di ingot na sida dope, na tinonahon ni amanDuma si Jamordong asa ro muse, jala asa rap manonton liga inggris nasida di jabu. Ai ninna amanDuma do tu siJamordong . “Sarupa do hita hape bere, rap lomo do rohatta mamereng liga inggris on”
“Olo tulang, na di bulan na salpu pe au mulak sian London, manonton derbi Mencester i, ai molo siaran langsung hape iba mamereng nasida, sarupa do hape dohot na dihitaan an..”
ninna siJamordong muse mandok.
“Alai tulang, naeng mardalani jo hami marsogot dohot pariban on nian” ninna siJamordong.
“Boi ma i bere, unang pola diadia roham…sukkun ma paribanmi, saguru di ibana do, molo apala rikkot, ba mobil hi pakke hamu, ai dang karejo marsogot”  ninna amanDuma, huhut dibereng si Duma na serom-serom otik.

Bagag jala uli do tutu itoan on bah, ninna siJamordong dibagas rohana, ai sai lao do pamerengna tu itoan i. sip.

Dung diluar kompleks i, dijou nasida ma tukang ojek manaruhon nasida nadua tu kontrakan.

1 thought on “Martandang….”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s