TORSA

Nga Habis Kamput Bapa….

Hendry Lbn Gaol

Molo dihuta i, dang adong dope di ojakhon sada pandita na laho manghobasi huria na adong disi. Molo masa ari minggu, sude akka namakkobasi ulaon parmingguan i holan sintua dohot angka calon sintua do. Mulai sian na papungu pelean sahat rodi namarjamita. Alai nang pe songoni, tiap ari minggu tung naringgas do nasida marsaor dohot donganna sahaporseaon mamuji Tuhan i. MArsoring-soring do anggo sintua i laho marjamita, ganup minggu, songon naung tinotuhon di parsermonan.

Diari minggu i, topet namartugas marjamita ima AmanJosep. Sai adong do roha na humitir di ibana. NAng pe nian naung jotjot ibana mar’tikki’, isara ni na majaha ende, madurung, rodi maragenda. Alai anggo namarjamita do ninna, apala ombas on dope diulahon ibana.

Tutu do nian, mulai naung dipabotohon guru huria i tu amanJosep na ibana marjamita, nunga marlatik ibana di janu, sisurathon do nanaeng dijamitahononna tu harotas sele-selena. Dungi, dibot ni ari, dung marpungu anakna dohot niolina, dipaula-ula ma ibana marjamita, dipasuman songon nadi langgatan i, dungi anakkon dohot niolinama gabe ruas parminggu i. Muali sian ari sabtu na i, nunga sai holsoan ibana, jala sai di apil-apil ibana aha sijamitahononna.

Dimanogotni ari minggu i, andorang so dipakke baju tohonan i sai sukkun-sukkun ma tu rohana, “bah…songon na manggir-gir puang, bohado baenon naeng asa songon na tenang iba…”. Lao ma rohana mandorgukhon salokki minuman i, asa songon na garang ibana di langgatan i. Dijou ma si josep, anakna siakkangan na marumur lima taon dope.

“Lao ma jo ho tu lapo ni oppungmu oppuJesayas an, tuhor jo kamput dua lokki, boan ma ma galas i, alai molo dang adong disan torushon tu lapo ni  amangborum nadi bariba huta an, ai adong do disi, alana disi do hami nabodari margurende..”
“Olo bapa….”

HApe, tohoma dang adong kamput on di lapo ni OppuJesayas, gabe lao ma si Josep mangalap tu bariba huta, tung mansai dao. Niantusan ma dakdanak, lambat-lambat do mardalan, jala molo adong siidaon, pittor so do ibana, ai dang diboto naporlu do kamput i tu amongna. Jala sukkun-sukkun do parlapo i mamereng haroro ni si Josep, disukkun ma ibana “Tuaha kamput i bere….”

“Naeng dibapa do tulang, ala marjamita bapa annon digareja…..”
“nunga habis kamput bere, holan vigor nama na adong, tu lapo na asing ma lului bere…” ninna oopuJesayas huhutma diuduti akka siulaonna.

Nunga hos ari, dang marnamullop dope si josep dohot kamput nanituhor na i, jala dang sabar be ibana, laho ma AmanJosep marminggu. Tep ma dapot tikkina marjamita.

Didok ibana ma, “hita salhutna,..huria ni tuhanta, marhite panurirangna, didok do tuhita as biar rohanta mida Jahowa, jala diondolhon dihita disadari on…..Ahama didok panurirang Jesayas tu hita, ahama ma didok….”

So jo satokkin, songon na mambuat hosa…..

“Ahama didok si jesayas tu hita………..”

Hape tor toppu ma marlojong si Josep, Ala dibege ibana sukkun-sukkun ni amongna sian langgatan. Didok ibanama “Didokkon Oppung si Jesayas nga habis kamput bapa, holan vigor nama, gabe sian lapo ni amangboru do hu alap kamput i, huhutma di patudu ibana galas ni kamput na binoanna on….”

Jayana ma i, ai adong do sada huta di hitaan, sai jumolo parlapo mamboto manang na ise marjamita annon sintua daripada akka jeamaat i. Molo nunga pola mangido dua lokki sittua i tu lapo i, berarti na ibana do marjamita. Molo salokki, olat ni namaragendo do i….

2 thoughts on “Nga Habis Kamput Bapa….”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s