Parjuji Langis….

Oleh : Hendry Lbn Gaol

Adong dapot binege songon sada siringkot-ringkot sian akka natua-tua namandok, siala sude do halak batak ni raja, jala juji ima ula-ulani anak ni raja. Didok natua-tua, holan anak ni raja do na olo marjuji. Alai tutu dah molo ta bereng tu pudi muse, ia di hatihai, raja na marjuji on marasing do tu sisaonari. Dihatihai, marhite na maradu beteng do, mossak, dungi sahat tu namarturi-turian. Ido anggo parjujian i. Molo hata saonari adu ketangkasan ma, isarana mamakke hujur, podang, mambatak hoda, marikkat/marlojong dohot lan akka na asing muse.

Akka na talu marjuji olo ma gabe suruan manang hatoban ni namonang i, manang dilean ma artana tu namonang i. Mulai sian arta rodi tunggane boruna boi do di jujihon.

Ia juji si nuaeng on nunga marasing be. Adong do na marpiga massam on, jala nunga be dipakke sada alat manang ula-ula. Dang adong be adu ketangkasan on. Jala boi dohonon juji na ro sian akka luat sileban nama on.

Huroa ima halak hita on, namalo maretong jala namalo marmossak pikkiran. Alai dang sude jolma malo marjuji. Anggo ninna akka namalo rupani, marsiboan massamna do on, jala nunga tarsurat on di gurat-gurat ni tanganna.

Ia Sijamordong sahalak ama na poso na marinangan di huta na ribur, goar ni huta on Cikarang. Tar dok do ibana parjuji. Alai tutu dah, oparjuji sada  lima  do, namarlapatan ma molo marjuji lima hati talu sahali monang. Jala tardok  ma ibana parjuji langis. Anggo dang so jolo suda nabinoanna i, sahat rodi marutang dang olo mulak tu jabuna.

Nunga manang piga hali adong parsoalan dohot tunggane boruna alani parjujionna. Alai rupani holan dibibir do na sai didok dang ulahononna be namarjuji i. Hira-hira, tung na tinggil do sipareonna molo adong ina na nanaeng mangharoani. Sude do diapil ibana ie na sorang dakdanak na sabulan i. Jal pittor hatop do ibana lao tu na sorangan i mandungoi rap dohot akka donganna. Nang soadong paoahon tu ibana, alai boi do dietong ibana naung piga bulan dibortian.

“Beta lae marmelekmelekan..” ninna si Jamordong ma tu amanTongos. Satohona dang bahasa batak namarmelek-melekan on, ai sian hata  melek do i, namarlapatan BOLLANG. Je molo molo didok melekmelekan marlapatan ma on marsibollangbolangan manang dang masa modom.

“Tudia lae, ai soadong huboto na tuddun api di Es Te Em ta ” ninna mangalusi. Ia Es Te Em on ima Sarikkat tolong menolong, manang parsahutaon, ai biasa do disada luat di baeng parpungu-punguan, organisasi ni halak batak. Digoari ma parsahutoan, jala dipunguan na bersifat sosial on ma dipatupa akka na hombar tu ha-bataho. Ulaon las ni roha, rodi habot niroha.

“Unang sai markartu i hamu” ninna amaniJergot songon na patahotahohon, hape binoto ibana do sada parjuji langis i. Takkas do binoto, nunga ro pe simatuana sian huta alai anggo ibana sai lalap di parjujian do. Rodi na mulak simatuana doli i dang di ida ibana, alai nantoari sada hona burta do dibaen polisi na sida, alani ido songon na maruba ibana satokkin.

Tutu ma, jadi do anggo nasida saut do na marmelek-melekan i. Nang parjabu ipe tung mansai las do rohana molo ro nasida marjuji disi. Tamba ma pandongani ni amanta parjabu jala dungo-dungo ma attong ibana. Ai anggo apala bokkor-bokkor i gok ma, jala boi ma mulak passi kopi ni namarjuji i. Ai pola do nanggo dua ari manipat nasida na marjuji i.

*     *     *

Botarina i, andorang so hehe dope naiTudia, ima parsonduk bolon ni si jamordong, humordit situtu do ibana, ala adong manuktuki jabu i, mamburbari, hape dang adong disi sijamordong. Pola do songon na humitir ibana mambege soara nasian luar i.

“Bukka jo omak ni si Tudia,..au do i”
“Ise…?? ninna huhut dipatinggil pinggolna, jala hehe ibana laho mambukka pittu i.
“Au do i, bukka ma jo pittu on…”
Dung takkas diboto ibana manang soara nise na manuktuki i, humalaput ma ibana mambukka sordak ni pittu i. Jala humordit situtu, ai dibereng ibanama nunga marsapar mudar sian simajujung ni si jamordong.

Ditogu ma si Jamordong tu jabu lala hatob ma dilului akka ubat. Asi ma rohani naiTudia mamereng niolina i jala dihumalaputi mambaen aek las paishon bugang ni si Jmordong, di bohina,di uluna. Ai pola do marsalaon bohi i, jala marmudari do simangkudap i.

“diruma tondi dibalian begu-begu bapak ni situdia, sian dia do ho, boasa marmara hon…” ninna huhut diapusi jala dipaian bohi namarsalaon i.

“Imadah, naeng dipusa halak au, adong laho mambuat kareta/motor i, gabe marsiranggut hami, ala dua do nasida dang taralo au, dipusa ma au, jala di boan ma kareta i” ninna ibana mangalusi.

“Toe ma, asal ma dang mahua ho, disi dope ngolumi, anggo arta i akka basa-basa do i…” ninna huhut ma tor dibaen boras si pir ni tondi tu simajujung ni si Jamordong ala nunga malua sian parmaraan sian hamatean, malua sian sakka ni jolma ibana.

“maridi ma jo ho, nga las be aek i, asa huloppa di ho…” ninna naiTudia huhut hobas tu dapur.

*   *   *

Dung sahalakna di bilut i, jalo ma di es em es si Jamordong amanTongos. Didok ma di isi ni es em es na i, na ikkon balosonna do innon hataluan i. Ikkon mulak do motor i tu ibana. Alai akkup ni i, mandok mauliate do ibana tu ide ni amanTongos i. Jago do idemi lae bah, nang pe hassit hutaon alai anggo omak ni si ussok dang pola diparsoalhon be na tudia maporus kareta i. Alai unang nalom dah, ikkon mulak do i annon hataluanku namarjuji i.

Huroa, na talu marjuji do sijamordong, jala dohot do kareta i di jujihon ibana, targade ma tu amanTongos kareta i. Asa unang hona muruhan ibana, di tejjui ibana ma babana, ditejju bohina sappe marmudari, dungi diribaki bajuna asa songon na suman di pusa halak.

Digariang muse ma bohi na on asa marsapar mudar i, dungi dibaen ma medep-medep. Iba ala parjuji langis ni si jamordong. Maup!~

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s