TORSA

Parmahan….

Oleh Hendry Lbn Gaol

Sogot manogot na I, nunga lao si Jamordong tu parkarejoanna. Halak na padot, na nunut jala na ringgas do ibana mangula ulaonna. Dang jadi jumolo donganna sakattor I sahat tu parkarejoanna. Sai ibana do na parjolo. Diparhaseang ibana do tiki jala diharikkothon ibana nasa tikki na adong di ibana. Ido sada mambaen godang marlomoniroha tu ibana, tarlumobi tahe atasan ni ibana langsung ima halak Jepang i. Na pantun jala na bisuk do ibana, lambok palilungna molo niakkupan makkatai, jala dohot do bahasa ni si jajah Indonesia si tolu taon I diboto ibana. Najolo, andorang imbaru karejo dope ibana, pittor hatop do dipasikkolahon halak Jepang I ibana tu huta ni Jepang i.

Dibereng siJamordong ma partikkian, sogot dope hape naruhana, ala di ida pukkul pitu manogot dope, hape nunga naeng sahat ibana tu kattorna  di Muka Kuning, Pulo Batam. Di palambat ibana ma mobil na on huhutma di pangolu tep ni mobil on, jala marpili-pili ma ibana, pataridahon las ni rohana di manogot i. Dibangku sihambirang I, adong do dibaen parsonduk bolon I songon tugo dimanogot i. Jala dibukkus ma I dohot denggan, ai anon pe di kantin ni pabrik I allangonna.

Addul ma pamereng ni ibana tu bariba ni hauma disihambirang na I, borhat sa robbongan horbo di lele parmahanna i.  Di pananget ibana ma suara ni tep ni mobil na I, jala pittor hatop ma ro sunggul-sunggul tu pikkiranna. Di ingot ibana ma najolo tolu pulu lima taon naung salpu tikki marmahan horbo ibana. Serom otik ibana ala di ida ibana tor di jakkit parmahan I horbo I, di batak!.

“Unang lebba ho innon namarmahan I, nunga suanon eme saba ni dongan sotung di gagat innon eme ni dongan hona toru-toru hita, sotung maila hita” ninna amaniJamordong hatiha so laho dope ibana manakket hapea.

“Olo bapa” ninna si jamordong. Nangpe metmet dope pamatangna, marumur sia taon dope, alai nunga diparbaga amongna ibana marmahan horbo na pitu on, na pinalumehon ni  donganna sahuta tu amaniJamordong. Molo libur do parsikkola, songon saonari, ba si Jamordong ma marmahan jala amongna laho tu balian manodok, manang nanakket gota.

Songoni do molo namarmahan on, niantusan ma ai dakdanak dope, dang songon saonari on, olat ni umur sampulu dua taon dakdanak holan na sikkola dope, dungi arianna I, modom do disuru. Dilean minum susu, jagal dohot akka na massam. Naujui, lima taon dope si Jamordong,  nunga diparbaga amongna marmahan. Pitu horbo ikkon boi lubba onna, jala ibana do na parosehon. Dang adong hata liburan, marsitorus mulai sian manogot sahat rodi botari di jampalan I do ibana mandongani horbo on.

Nunga botari, nga ribbon-rabbon manuk, mulak ma si Jamordong sian parmahanan, ai boi dohonon dao do ibana namarmahan i.  Dang diboto ibana naung sadia dao ibana namarjappal i. Dibereng ma nunga naeng golap. Di lutung ibana ma horbo on.

“Balik guddur….balik kopi, bahal assimun” tarbege soarana na remet i.

Sipata ma dilobbut horbo on asa hatop marlojong mulak. Hape, ia horbo, molo sai adong dapotsa duhut-duhut I dang marnamulak I, sai disangahon do manarbing. Dang songon parmulak ni jolma rupani, mardalan denggan. Tung loja situtu ma tahe ibana, marikkat tusan marikkat tuson. Dang adong biar ni ibana, sotung hona dege anon dibaen horbo i.

“Sinur….balik,…paitte dibara” ninna ibana, ala tong sai manggagat si Sinur on, sada horbo jattan na bolon.

Nunga sai lam golap ari, nunga makkuling silongi, irnga dohot pidong na asing pataridahon na naeng borngin nama. Dijolona ikkon boluson batang aek, dang pola bolak jala bagas, alai anggo tu siJamordong na marumur sia taon, namarpamatang na penggeng, biar do rohani ibana.

Dibatk ibana ma si Guddur, horbo na marpamatang na memet, ai ido na boi dibatak ibana. Dilobbutma tanggurung ni horbo I asa manaripar tu bariba. Tutu ma nian, manimbuki ma horboi tu bariba ni sunge I nang songoni horbo binatak ni si Jamordong. Hosa-hosa ibana!.

Dibereng tu pudi, dang adong horbo I na tinggal alai di uji ibana ma dibilangi ibana “ sada, dua tolu, opat, lima, onom….” Ninna.

“Bah…tudia sada nai??……mago sada”

“Si Sinur, si Assimun, si Kopi, si Dali, si Pelong, si Beteng… bah…ai tudia siguddur??” ninna ibana. Dibereng muse tupudi alai dang adogn be, nunga langa balian i.

Nga mabiar situtu ibana, ai nunga mago sada horboon, anggo au ikkon pusaon ni amang ma innon, ninna ibana huhut  ma ibana tangis.

Dang dope masuk horbo on tu barana, marsurak ma ibana.

“Bapa, nga mago sada horbo, maup diboan batang aek”

“Maup bohado, boasa dang dijaga ho denggan” ninna AmaniJamprdong hatop hehe sian jabu mandulo tu toru.

“Dia mago, hatop ..beta talului, parsudam ma anon molo sodapot I” ninna amana

Anggo sijamordong  nunga be tangis, jala sappe do hasosombopon ibana na tangis I, ai mulai sian batang aek I nunga ro iluna.

“Ise mago..” ninna amani Jamordong huhut dipareso sada-sada horbo i

“Si Guddur…” huhut ma dietong ibana muse. Tong dope onom horbo on.

“Onom nai nama bapa…”

Dungi dohot ma amaniJamordong mangetong muse, alai dietong pitu horbo I, disi do sude. Didok ma muse “ ai aha do nimmu mago, disi do sude, aha na binatak mi??”

Tarngongong ma si Jamordong, ai dibatak ibana do hape si Guddur, jala sian tanggurung ni horbo I do dietong ibana, na onom nama horbo on tinggal dang dibilangi na binatak na i. Aut sura boi boi makkatai si Guddur, ra dohononna ma, ‘dison do au kale-kale…”

Dang sadia leleng, dibukka sappam ima pittu gerbang ni pabrik I, jala unduhunduk marnida sijamordong na tong dope sai serom. Mangupir sappam i.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s