Patigor ma aham….

Mansai las do rohani OppuJamordong, manjalo kiriman na pinasahat ni par kantor pos I, ima kiriman sian pahoppuna si Jaomordong. Diboto ibana, nunga karejo pahompu panggoaran na I di huta ni halak, huta naribur jala nabalga. Tutu ma nian, ise naso marlasniroha molo apala manongos pahoppuna. Ra, tusude dongan hombar balokna, dinganna sa pargurendean dihuria pe ikkon paboa-boaonna na manongos do pahoppu panggoaran i.

“Onma nandiokna pahompu na miniahan” ninna OppuJamordong dibagas rohana. Diama tahe, na burju marnatua-tua do siJamordong, tu amongna dohot inongna nang tu oppungna. Ai si di ingot ibana do patik palimahon i. Dungi dibukka OppuJamordong ma hatop kiriman ni pahoppuna I, jala dibereng ma adong hempon dohot surat. Nian nunga leleng dibaga-bagahon si Jamorodong I, hatiha ro OppuJamordong mangebati anak dohot pahompuna i, didok si Jamordong ma “ Oppung, hutuhor pe hempon di ho molo nga karejo au”

“Tuaha ma i oppung, ai so huboto mamakke I anon”
“Boi do marsiajar oppung”
“Ise mangajari, Oppung borum? Haru oppung borum pe sodiboto manjaha, boha ma baenonna mangajari”
“Ai adong do hombar balok”
“Attong ho ma Oppung, dia  ma na denggan”
“Olo oppung , asa boi hita makkatai di hempon, ai sai ikkon tu hombar jabutta I iba martelepon molo naeng makkatai, gabe sai targanggu nasida” ninna si Jamordong.

Serom do Oppu Jamordong ala ni las ni rohana, jala hatop ma dilojongkon tu hombar balok na I, asa di pangolu  hempon on jala asa diajari boha do mamakke. Dohot dia ma tahe na porlu botooni ibana.

Songoni do nian akka natua-tua saonari, ikkon sai diajari do manang na piga hali asa diattusi. Agiat pola holan mangalusi telepon nian, anggo es em es I dang porlu I, ninna OppuJamordong muse. Ala didok AmaniPontas hombar balok na I na boi do tong hempon I pasahathon surat.

Ai molo dihuta I, boi dohonon sada sitiruon do anggo oppuJamordong on, ringgas do lao tu paradaton, dihuria nang namardongan sahuta. Dohot muse do ibana gabe mar-koor ama. Molo binereng sian haringgason ni ibana na marguru ende on, tung na so adong do na boi tudosanna. Nunga mar opat pulu taon ibana dohot tu pargurendean. Ai sai adong do na geok molo diparguruan. Ai didok OppuJamordong do tu guru koor ini “ Toe ma guru nami, unang pola pinarguruhon anggo not nai, tor tu hata-hata nai ma. Endehon ma guru, boha suara dua asa ni ihuthon, jala dompak on ma baen hamu pardoppahan muna I asa ni guruhon”.

Lapatanna rupani, simangkudap ni guru I do ihuttonon ni ibana, ai so diboto manjaha not tarlumobi manjaha ende I, alai ala na ringgas do ibana, piga-piga hali diendehon guru on, gabe boi do di apil ibana boha do na marsuara dua i. Songoni do tong molo mangapil bukku ende I,  ai boi dohonon  tung na godang do diboto ibana akka ende-ende na adong di bukku i.

Disada tikki, marpungu ma nasida sahuta, ai biasa do songoni  tarlumobi di ujung ni bulan, sai marpungu do nasida, tarlumobi akka namatua di huta i. Ro bema attong akka dongan sahuta ni Oppu Jamordong on. Tabo ma nasida na marnonang on, ai peak do sigaret kompil, peak nang lappet dohot kopi. Dungi, marnonag marturi-turian ma nasida, mulai sian potang ari sahat rodi na naeng robot borngin.

“Nunga be dah, nga bot ari marhehean nauli ma hita” ninna OppuTarida sian suhi-suhi an
“Olo tutu bah, ai godang ulaon marsogot, manuan eme” ninna OppuTapar huhut songon na di pagomos mandar dohot hohosna.
“Attong baen ma tangiang I bah, OppuJamordong ma” ninna AmaniPontas, ai sada hasomalan do dinasida songoni, molo marpungu natua-tua ni huta sai di tutup do dohot tangiang, molo so I, jolo marende huria ma jo.
“Hamu ma mambaen, tanggung sigarethu” ninna OppuJamordong
“Baen hamu ma lae, nga sai udenggan hamu” ninna OppuTapar muse.
“Nauli molo buti, bah tatutup ma ulaon na met-met on dohot tangiang, alai naruhakku jolo marende ma hita sa ayat” ninna OppuJamordong, huhut ma jonjong ibana jala dipadenggan mandarna na sakkot-sakkot I di abarana, jala di ittopi ibana ma sigaret na di jari ni tanganna i.

Songon na somal dang pola majaha bukku ende anggo OppuJamordong, ai ende na binotona I do baehenonna, ai nunga diapil ibana, mulai sian goar ni ende I, sahat rodi nomor piga di bukku ende i. Di apil ibana do dohot denggan saluhutna rodi mar tolu-tolu ayat pe taho.

“Marende ma hita sian nomor  duaratus opat pulu ualu, Saleleng  ho di tano on,”

Hape holan naeng ditarik ibana dope lagu on, tor toppu ma dihilala ibana humitir di sakkuna I, dang diboto ibana manang beguaha I, jala humordit situtu do OppuJamordong. Dibagasan hordit ni rohana, gabe humalaput ma ibana manarik lagu nakkinon, didok ibana ma “ Saleleng ho di tano on, patogor ma aham…rap taendehon ma” ninna ibana, huhut ma didadapi tu bagas sakku ni saloarna, paresohon aha ulaning na manggirgiri i

“On do hape” ninna ibana jala di pakaluar ma hempon I, alai anggo donganna nunga margahargak mekkel.

Satu pemikiran pada “Patigor ma aham….

  1. Bahaya ini…. halusinasinya lae Marbun ini…. By the way masih tetap menghibur. Kalau saya sebagai juri pencari bakat, saya loloskan ke babak berikut. Ditunggu cerita-ceritanya yang lain…

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s