TORSA

TANGIANG NA SALAH ALAMAT

Ide Suhutan Oleh St. B. Rambe ( ni edit muse Amani harapan Lbn Gaol)

Songoni do huroa ngolu ni hajolmaon. Molo tikki tabo do ngolu i, jot-jotan do hita lupa, manghamauliatehon tu Debata akka basa-basa na tajalo. Na tung mansai ironis na, olo gabe tubu gijang ni roha, manghaginjangkon hamaloon, siadongan dohot habisukon na majalahi ngolu, dohot malo ni na mangulahon ulaon. Ta sadari do nian, sude ngolu na di portibion, ala asi ni rohaNa sambing do. Alai mamikkiri on ma hita sipata guga pikkiran ta, alana ndang sarupa parngoluon nijolma.

Ra olo do tubu pangiburuon di roha molo poinatudos-tudos diriniba sandiri tu akka dongan na asing. Ai ninna roha sarupa do gogo, sarupa do parsikkolaan, alai boasa masiasingi pasu-pasu ni Debata na tajalo.

Boasa si Gulontam, anakni naso umboto golpa di hita an, ima anak ni OppuJumikkat, parlapo jala parrude-rude ni, dung sahat di Jakarta on, sai songon na marmual hepeng na, marlobi-lobi passarian ibana. Jala idaon maru jut inganan ni hepengna dohot ugasan na asing dope. Samppulu sai motorna, pitu bengkelna, jala ualu ratte tanona na marserak di Jakarta. Dang dohot  binilangan dope jabu kontrakanna.

Hape ia si Julla, sahalak na bisuk, nunga leleng jala termasuk na boi mangihut-ihut do anggo di parbinotoan, jala benget do mula-ulaon burju jala pattun. Hape laos so boi nanggo manakkui hepeng salipper, jala olo sai hurang di parhepengon. Mamikkiri on ma sipata, akka dongan mangingot poda ni natua-tua na mandok, “molo litok aek di jae, tikkiron ma tujulu” lapatanna, songon hata sileban na mandok, “eling”. Songoni ma sada ngolu ni sahalak dongan ima si Julla, di pangarantoan.

Hira sorat jala maol rajokkina di hilala, gabe tubu rohana mangarimangi, aha na sala, aha dosa na mangissobbut di si Julla?.  Molo binereng muse sian  asal ni si Julla on, ima anak ni sahalak porhanger naung passiun (guru huria) di hutana.  Ra, nunga taboto boha do anak ni sahalak porhanger. Jala partuhanon pe tung mansai gomos do di tiop ibana. Jala tartanom do dibagasan rohana songon nidok ni jamita I, “sude ngolu on, holan asi ni roha sambing do”.

Mangingot I ma si Julla, manongos surat ma tu natua-tua na, dohot hepeng sekedar, asa diboan pandita sada tangiang khusus, asa dapotan passarian jampalan na lumomak. Jala manghamuliatehon sude naung pinasahat ni Debata tu ibana, alai manarita do tongtong ibana, boasa dang haru marnasukkup taringot tu panjappalan otte.

Songon hamauliateon na, ima hepeng nasekedar nakining. Las do roha ni amanta guru huria na pessiun nakkining, pittor humalaput do amanta on, pasahathon tu pandita, asa diboan di tangiang pangondianon ari minggu, asa mura akka rajokki ni anak na diparjalangan. Disukkun amanta pandita ma guruhuria passiun I, didia do tinggal anak mu pangaranto i?.

“Mauliate ma amang Sittua nami, di hamuliateon naung pinasahat munai, alai tahe didia do nasida maringanan saonari, asa binoto innon manangiakkon di gareja.”

Mangalusi sukkun-sukkun ni pandita I songon na ngongong do guru passiun i. Alai hatopma di alusi, “Di Jakarta do amang….”

“Bah ido ateh….mauliate ma, hutangiakkon hami pe annon..” ninna Amanata Pandita on huhut ma di ihoti dasina jala dipakke Jas na laho tu gareja.

Jonok hata ni suhutan, di jalo Tuhan I do tangiang ni amanta pandita i, jala di suru Tuhan ima suru-suruan na, songon utusan pasahathon rajokki ni si Julla, anak ni guru huria i. Sai mangareap-reap ma suru-suruan on mangalului inganan ni si Julla, mulai sian tonga kota sahat tu sugut-sugut ni kota Jakarta. Muai sian Cikarang sahat rodi Cilegon. Disukkuni akka partabbal, akka par-oli nang akka partiga-tiga. Akka inganan na jonok tu batas-batas Jakarta pe nunga di lului. Ndang dapot suru-suruan i. Nunga loja, jala nunga sude kota Jakarta dilului ndang adong.

Ujung na mulak ma suru-suruan i, diboan ma muse mulak rajokki i tu nappunasa, jala laos so sahat tu si Julla anak ni guru huria pasiun i. Hape di Cikupa Tengerang, apa jonok do tu Mall Matahari i martiga-tiga kaset pi si di do  si Julla anak ni guru huria pasiun i. Bage ndang sahat tu alamat ni si Julla rajokki i. (BR)

1 thought on “TANGIANG NA SALAH ALAMAT”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s