Ada Pertanyaan?….

Suhutan : Franky Tobing

Didok dinatarsurat I, tuktuhi ma sai na bukkaonna do, lului ma sai na juppangan do hamu. Jala ido satohona, di pargulmiton ni ngolu on pe ikkon marhasabaron dohot marhaserepon ni roha do hita, huhut dibagasan tangiang na gogo tu amanta pardenggan basa i. Ai Ibana do na manjadihon, namangalehon, nang na pasauthon sude nasa na adong. Hira-hira on do na tontong diulahon nang dipeop amanta Makmur Tarigan.

Nunga tung sun nian pakkirimon, parubaton nang akka poda nisitua-tua diulahon nasida, ima dipakkirimon ni rokkap anak dohot boru. Dang bilangon taon bilangan bulan be nasida namarruma tangga I, poola do olat ni duapulu taon. Alai tahe, tontong do digogi nasida tangiang, ai porsea do nasida, dijaha dibukku nabadia I boha si Abraham maranakkon dukkon jolo matua daging.

Sun ma di arina, gok ma dibulanna, tung so tarasam be las nirohani amanta Tarigan nang inanta naiHarapan, dilean Tuhanta do pasu-pasu i dinasida marhite parsorang ni sada dakdanak  baoa. Di baen ma pesta, dijou hula-hulana mabaen hesek-hesek ni si ussok,  mardomu mangisolat di huta ni hula-hula I do nasida, di tano Rambe, Pakkat.

Ia di adat ni amanta si Tarigan, ima adat Karo, molo ditaringoti tu na mambaen goar, attar sarupa do ditoba, sai dibaen do goar I goar ni dalan. Lapatanna goar na mura jouon, jala goar sian hata na somal. Dang pola longan roha molo dihuta nasida, godang do margoar siSukses, Makmur, Sentosa, Parkir, Bengkel, Mora dohot na asing muse. Ditahi amanta si Tarigan ma mambaen goarni si ussok na baru sorang I si Pertanyaan. Alana tutu nunga tung leleng nasida manukkun tu Sitoppa Nasa na adong ni haroroni si ussok. Jadi asa songon goar si ingoton on dinasida dung matua, ai mar-sejarah- do goar i, jala maralus do sukkun-sukkun nasida i.

Sattabi di akka donganhu halak karo, dang na mangehet-ehet hami, situtu ma on, jala dang dolan dihalak karo tradisi si songon adong. Di toba pe, di piga-piga luat, dang harus di harikkothon mangaririt goar. Bohama goar i, mura ingoton jala jouon, mungkin ala na godang i do ra anak ni sada-sada ripe najolo. Sahali nai sattabi, dang na mangehet hami…

*    *    *

Massai borat do nian rohani natua-tua I paborhathon si Pertanyaan mangaratto, mardomu ibban na anak sasada I ibana, jadi tung bohape, dimula nai, sai tumatangis do NaiPertanyaan dukkon didok tu inang na laho mangaratto tu Jakarta, hatiha didok ikkon mangaratto ibana isi diboto lulus sian SMA.

“Tu Jakarta ma au inang mangalului parngoluon, ni ihuthon dongan..” ninna

“Boha do roham amang, maninggalhon au dohot amangmon, nunga matua hami, holan hodo anakkon nami, ninna ruhakku mangoli maho, dison ma ho mangula, bolak do haumatta” ninna NaiPertanyaan mangalusi.

“Inang, sahali saton mulak do au, jala sai martelepon pe au tu inong marhite telepon ni Tulang tokke gotta an, pos ma rohamuna”

“Imadah  amang molo songoni do pangidoanmu, alai hatop ho mulak molo nunga marsahit-sahit hami di huta on” ninna huhut ma manetek ilu ni NaiPertanyaan.

Somal do molo paborhathon pangaratto dibaen sipanganon, songon dalan partangiangan di nasida asa denggan-denggan passarian jala dibagasa hahipason, songoni ma nang si Pertanyaan di parbohat amana do denggan.

Di ingot si Pertanyaan do sude boha ilu ni natuatuana, andorang di umma ibana di bus Muara Nauli I, sai hata poda do ditonahon tu ibana, asa unang neang mar dongan, neang nang di pakaktaion, ai pattun do ninna hangoluan, jala tois hamatean.

Molo binereng sian pamatang, na gatteng jala na ias do pamatang ni si Pertanyaan on, huroa ala so pola jot-jot ibana mangula tu hauma, siala songon na di pamanja natua-tua I ibana, jadi dang haru tandil na sian huta ibana. Disada tikki, adong ma mangarahon ibana karejo. Alai karejo on ima dibagian hiburan do. Songon pemain sinetron ima mulai sian pemeran pengganti sahat rodi pemeran viguran. Didok rohana, asal ma ulaon na ias, sude I pasu-pasu do. Jala boi dohonon sukses jala di bagian entertain on do huroa tallikna manag rajokkina.

Songoni do huroa, ai godang do dongan sian hitaan, molo nunga mangaratto tu kota na ribur on, olo do di gatti goarna. Dang na mandok, dang boi alai sada trend do on rupani. Dung di Jakarta on, gabe dang goar na sian huta I be di pakke. Songoni ma nang si Pertanyaan, di gatti ibana do jalo goar I dung gabe sai dohot-dohot ibana mar-sinetron.

Dibaen ibana ma goarna si Peter. Ai hea di jaha ibana jala di ida ibana sahalak bintang sinetron namargoar si Peter. Gatteng ninna si Peter on, jai dipatudos ma tu dirina, ai dirippu ibana nunga tok gatteng ibana. Alai attusi hamuma boha halak batak manjou Peter. Ai goar barat do, alai ligato Batak!. Jala sude do sakontrakan I mamboto goarna si Peter, suang songoni induksomangna halak sunda i.

“Nama saya Peter Bu, dari Medan..” ninna ibana hatiha I, tikki parjolo ro tu kontrakan i

Goar siboan rajokki. Malo do ibana margaul jala pantun muse, huhut malo, ai hatiha sikkola ibana di SMA RK Pakkat, sahalak jolma na malo do ibana, ai holan alani sibaenon do dang boi ibana kuliah. Godang do hita on, dang taboto boha do sejarah ni goar ta i, ai nunga ditangianhon pandita manang pastor goar i, jala dipasu-pasu. Alai, ala paihutihut ni namasa sinuaeng, olo do ila rohatta mamakke goar i. Neang roha lao maggatti ala tok goar dalan, manang goar Batak i. Hape goar siboan tua do i, siboan nglolu dihita. Gabe ginatti ma goar on, goar naso marlapatan.

Asa adongdo dakdanak marsahit, dungi holan di gatti goarna gabe malum. Dungi adong na sorat passarianna, dungi digatti goarna, tor gabe tiur passarian. Molo sian pamikkirion ni hajolmaon ian dang masuk akkal i

*    *    *

Sihol ni roha tu anakkon do mambaen NaiPertanyaan ro mandalani huta na ribur on, ima huta Jakarta. Ditongos si Pertanyaan do ongkosna, jala didok ikkon ro mamereng ibana tu Jakarta huhut asa diboto natua-tua I boha bolon ni Kota Jakarta. Burju do nian tutu ibana tu amana dohot tu inana. Dang holan pass-bidda dipasahat tiap bualn sappulu dua alai tiap bualn do ditongos songon pasi-sira ni natua-tua i. Alai sai manginongi do dirohani NaiPertanyaan, ulaon beguaha do ulaon ni siPertanyaan on, atik na so tikkos do ninna rohana.

Martaksi do sian bandara Suakrno-Hatta NaiPertanyaan, dungi lean ma tu supir taksi I alamat ni anakkonna di Jln. Tomsim no 13 Bintaro. Ai hatihai, ikkon lao shooting do si Pertanyaan tu Puncak-Bogor, jadi dang boi ibana manomu inongna tu bandara, ai mulak potang ari do sian Puncak.

“Inong, martaksi ma ho annon, ai pukkul lima do mulak au sian karejo, jala di luar kota do au karejo, sukkun ma anon tu par-kontrakan i nadia kamarhu”

“Ido hape amang, attong patibu ma mulak, ai so adong hutanda dison..”

Huroa manang na bohama, manang na so diboto inanta on mambuat taksi di bandara, manang na gabe borhat botari sian Medan, bah tarlambat ma tong NaiPertanyaan sahat tu Bintaro, nunga pukkul onom botari. Nian ninna iaban dibagasan rohana, pahatop hu sahat marahua au disi, so adong na hutanda, hape si Pertanyaan kearejo kodo.

Dituktuhi ma pintu ni jabu I jala didok ma “ Halo…Permisi” ai ido diboto. Dang didokkon Horas, ai takkas do dipaboa si Pertanyaan, dang halak hita na tinggal disi, jala holan ibana do halak hita.

Jut rohana, dibuat ma batu panutuan ni napuranna, bohama inanta namatua sai di baen do napuran di tas boan-boanna i, di lotahi pa haddang ni jabu I mallatang-latang, ai soadong na mullop mandapothon ibana. Ai  gabe panutuan ni debban I ma dibaen amnuktuhi. Mullop ma sahalak sian bagasan mandapothon NaiPertanyaan.

“Iya bu,….ada apa? Cari siapa ya…”

“Ada Pertanyaan??” ninna NaiPertanyaan manukkun
“Tidak bu…” huhut longan ibana di inanta i
Diulakkon Naipertanyaan muse manukkun,
“Iya…ada Pertanyaan??”
“Maksud Ibu??”

Mulai ma marpikkir naniakkupanna on, ai so tinanda alai disukkun muse, ada pertanyaan?.

“Tidak Bu, tidak ada…, tapi….ibu ini siapa” ninna muse
“Ada Pertanyaan??…tahu Pertanyaan??”
“Iya tau Bu, kenapa??”
“Mana Pertanyaan-nya….”
“Maksud ibu??”
“Saya cari Pertanyaan…”
“Cari Pertanyaan? Jangan disini bu, ada-ada saja…” ninna muse huhut naeng di tinggalhon inanta I, ai dipikkir na rittik. “waduh Ibu iki piye toh, wong belum diberi penjelasin sudah disuruh bertanya” ninna di bagas rohana huhut mangissurut tu pudi.

“Hei…disini ada Pertanyaan?” ninna NaiPertanyaan muse, satonga marsurak

Sip muse …..

“Saya baru datang dari medan, cari Pertanyaan, jugul kali kau…” ninna Naipertanyaan nunga mulai ro murukna, huhut sai di hilhil napuranna i.

Dang toho be on, naruhani jolma naniakkupan na i. Dungi gabe gok ma jolma parindekost I mandapothon inantai ai nunga guttur dibege nasida. Jala disukkun ma muse nanget.

“Ibu, kesini nyari siapa??”… dipalabbok manukkun
“Anak saya, si Pertanyaan, ini alamatnya” ninna huhut ma disurdukkon sallebar harotas. Toho do tutu, ai alamat ni jabu I do na diharotas I, nang dohot nomor telepn nunga adong disi.

“O..anak ibu namanya Pertanyaan…” ninna nasida rappak
“Iya….”
“Disini nggak ada namanya Pertanyaan, bu”
“Tapi benar ini alamatnya..” ninna NaiPertanyaan
“Iya sih…”

Dungi marrapot ma nasida, bohado tutu. Ai didophon nasida do roha molo ro natua-tuana sian jawa an, songon on bah da siurupan ma tutu nian.

“Gini aja, panggil si Peter saja, biar dia temannya ibu ini nyari anaknya,  siapa tahu temanya si Peter, sama-sama orang batak lagi, biar nyambung..” ninna sahalak muse, asi rohana. Dijou ma si Peter sian bilutna.

Tor hatop do didapothon si Peter tu labasan I, dungi dibereng ma tutu inong na I, tor marikat ma ibana makkaol inongna i. “Omak….” ninna huhut ro iluna. Longan situ ma akka halak na adong disi. Dipatorang ma tu pangisi ni jabu I, ai ibana do naniluluan ni ninanta I, jala inang do no NaiPertanyaan i.

“…Ck..ck..c.. ada-ada aja neh orang Batak, nama Pertanyaan kok jadi Peter”, ninna nenget di bogasan rohanabe. Jala di patorang ma tu inongna ai dang si Pertanyaan be goarna di Jakarta, alai si Peter nama, asa mura ingoton ni jolma i. Asal pajuppa na sa kontarakan I, gabe sai didok ma gelarna si “Mr. Question”.

Jago do marbola si Pertanyaan on, molo main innon Pakkat FC, no 13 ma.

3 pemikiran pada “Ada Pertanyaan?….

  1. Bagus juga nih cerita, tapi pemain bola FC PAkkat Nomor 13 emang ada?? yang mana? hahaha . sukses maju terus.. untuk Penulis.

  2. @Hendry: mauliate godang Lae, nunga dipadenggan hamu bahasa batakna, jala dipublish lae cerita on di web muna.

    @Risma: bah bagus ninna ito on cerita i, mauliate ito…Ro ma ito antong ari Minggu tgl 12 on tu Lapangan Kalender, asa hupantadahon tu no.13 i hehehe 🙂

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s