Anduhur….

Tutu do nian, tung na lungun do molo ditadikkon na tahaholongi, maporus tu inganan parsatokkinan i. Songon hata ni situa-tua namandok, hotang binebebebe, hotang pinulospulos, unang hita mandele ai godang do tudostudos. Alai dah, ise na so malungun, naso mandele, molo halak na tahaholongi ikkon manadikkon hita salelengna. Malengleng ate-ate umbege tangis ni OppuSuttol. Marende-ende do ibana pasahathon andungna, huhut ma sai disiuki bake ni OppuSuttol doli na bostang diadopanna. Margatti soring do akka naro laho maniuk ibana, pandokhon hata togar-togar asa tumibu tarapul rohana.

“Bereng ma neh, pahoppumi, Eda, nga sai di jonoki ho, unang sai tangis be ho, abing ma pahoppu mi” ninna NaiLuman huhut ma di jalang OppuSuttol boru on.

“Ima da tutu eda, nga tok pojjot huhilala, dipanading ni ibotomon, hei….heik!, boasa tadikkonnom mu au sasada au, amang na basa..hei…heik!” ninna muse mangandungi.

Mamerengsaluhut na masa i tahe gabe marroan be ma ilu na, lumobi molo binege andung ni OppuSuttol boru on, mamilang-milangi hinadenggan ni amanta siadopan naung bostang diadopanna, akka sisolhot na ro pe gabe dohot ma makkilalahon halungunon ni rohani OppuSuttol boru. Tutu ma nian, ianggo OppuSuttol doli on, jolma na burju andorang di ngoluna. Sude do makkatindakkon I, di nasahuta I sahat ro di huta ni halak pe. Ditikki ngolu na jolo, nunga godang dibaen ibana na denggan tu hula-hula, tu dongan tubuna nang di dongan sahutana. Bohama, ai jolma paradat do ibana, manang didia dongan hutana marulaon sai na dohot do ibana, isara holan na gabe raja hata disi.

Songoni ma nang dihuria I, sada sitiruon do ibana, sittua naung pension. Ra habilangan do anggo luat I naso mananda ibana. Jala songoni pe nang anakkon, sude do luat I manudoshon akka jolma na hasea do pinomparna. Di tano parseraha manang di dia pe tahe. Dia Alana, dia boccirna, dang  haru takkas aha parsahiton na posa diae ibana, toppu do parmondingna.

Tabba ma gogo tangis ni OppuSuttol boru, dung dibereng boruna siappudan  na maringanan di kota Medan, sahat tu jabu, dioppa pahoppuna sada, nang helana pe rap dohot. Dihaol ma boruna I huhut ma na sida nadua mangangguki. “Amang na basa, amang na burju, bereng ma borum siappudan on, oi…hei…heik!”

“Amangoi, tudia nama hami lao, ise be pangalualuan nami, tatap ma pahoppumon..” ninna NaiPadot, boruna siappudan na baru ro i.

Gabe dohot ma akka sisolhot na asing maraburan iluna, paida-ida namasai, tutu ma nian holan mambege andung nsaida nadua, da roha nise ma naso maleleng. Nunga marinjak nasida nadua masihaolan. Jala dang dianturehon be siPadot na sai tumatangis di tanggurung ni NaiPadot.

“Nunga be boru, minum ma jo ho, nunga tung loja ho na tangis I, bereng ma ne anak mi nga gabe dohot tangis” ninna OppuSukkun sa nakkining huddul di haling ulu, ala sian parpalilion namardongan tubu dope nasida.

“Jadi tuhita saluhutna, tarlumobi ma dihamu na marhabot ni roha, marende ma jo hita asa tumibu hamu tarapu, ima apul-apul na sian tuhanta I,” ninna sintua sahalak pangula ni huria. Huhut ma dipukka ende sian bukku ende I, jala dipillit ma ende apul-apul na mardomu tu ulaon pangapulion.

Huhut ma hasuhuton bolon  ni mambaen tanganna manghiaphiap bakke I, jala sipata songon na disiuki.

Nunga marhusor ari, lao tu bot na nama, jala nunga martahi akka raja ni hasuhuton nang dongan sahuta laho patupahon ulaon martonggo raja bodari on, Jala nunga ganup be nasida masipasingotan, atik boha adong dope akka hasuhuton takkas nang di horong ni hula-hula naso umbotosa parmonding ni OppuSuttol doli. Massirarian ma raja huta, masitaringotan di alamani, ima dialaman naung dipaherbang amak laho ulaon partonggo rajaan.

“Anggo ni ingot ningon dah, molo adong ulaon sisongonon, somalna lae  on do hundul dison paheba-heba hita, hape saonari ibana nama na gabe sipaheba-hebaonta” ninna amanDulpang, sahalak pangatua ni huta i.

“ima dah lae, anggo hamataen I ikkon ro do I tu saluhut na hita manisia” ninna sahalak mangalusi.

Nunga mombun be anggo andung ni oppuSuttol boru, ala nunga loja ibana, nunga sude diandungkon sanakkaning. Nunga marbokkol simalolong I ala ni natumatangis. Jala akka horong ina, tarlumobi ma di nasahuta I, nunga marhobas-hobas laho paturehon sipanganon ni akka na naeng mandungoi nang tu na marulaon martonggo raja annon. Adong ma manggalahi saganon, palashon aek sahat rodi mangaloppa indahan.

“hur hur…hurhur…hurhur….”  Tarbegema soara ni anduhur dijobangna na sakkot-sakkot apala di langit-pangit ni jabu i. Huroa, somal do anduhur on makkuling molo nunga bot ari. Ai sada hasomalan ni OppuSuttol doli ima maranduhur. Jala molo adong manukkun ibana sian huta asing, pittor didok do, OppuSuttol Paranduhur I do?.  Adong do manang piga anduhor on di asar na I, jala sude on boi do marende ende.

“hur…hur…hur..hurrrr” ninna anduhur on muse.

Naso panagaman, pittor mangandung ma muse OppuSuttol boru, pola do hordit rohani akka jolma nadisi. Jala parhobas na di dapur pet or marlojong ma muse tu jolo, mamereng aha namasa. Godang ma sukkun-sukkun. “Ai naung ro do anakna sian Jakarta??” ninna na deba.

Diandukkon OppuSuttol boru ma.

“Hei….amang siadopan..nunga makkuling be anduhur mi…hei..heik” diapus mu se iluna

“Mate ho amang nabasa, alai mangolu anduhurmu..hei..hei….holan anduhur mon nama namandongani au marsogot…heei..heik!” disiuk muse bake i.

“Boha nama pidong mon amang nalagu…” ninna muse

Gear ma jolma dipaddok be ma, ollobolokni sai pinikkir manang alani aha, hape alani anduhur do hape, toe ma pahan-pahan ma anduhur nai Oppu ni Suttol ninna jolma I huhut mekkel nanget.

7 pemikiran pada “Anduhur….

  1. @ Lae benhawerd…..ai ditanda lae do anduhur?? bohama soara ni anduhur?? hea do dibege lae suhutan ni paranduhur, di burta deba dirippu na mangantip ina-ina???

    @lae Jait….. ai na paranduhur do lae najolo

  2. I have read several excellent stuff here. Definitely value bookmarking
    for revisiting. I surprise how so much effort you set to create
    the sort of great informative website.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s