HATA SO PISIK

Mandapoti Aslina….

Dang pola hupatorang be aha do lapatanna molo didok halak batak  ‘anakhon hi do hamoraon di au’. Ra nunga sude hita umbotosa dia lapatanna. Mardomu tusi do, sai dijujung natua-tuana do sude anakkonna sikkola satimbona jala satolapna. Tung haru so mangan, so manuhor abit, so marisap manang aha pe tahe asalma adong lao pasikolahon anakkonna. On ma sada pamikkirion sitiruon sian halak batak na marasing sian luat ni deba. Nunga tung godang na boi siboan goar na gabe sada tudossan dihita, naponaborhat ni hapogoson alai boi gabe anak sijujung baringin.

Ra marpardomuan do tu lutta ima tano batak naso haru napu, jadi nunga dipikkirhon akka natua-tua najolo, na ikkon manobbang do dalan ni ngolu. Marserak ma bangso i siboan dalanna be. Jala godang ma tarida akka hamajuon ni halak batak i.

Nang songoni do tong SiJamordong. Ala anak siakkangan do ibana, harop do rohani amanJamordong, natuatuana asa gabe anak sijujung baringin ibana. Nangpe dang tammat sikkola atas amanJamordong, alai diihuthon ibana do hamajuon ni jaman. Disolsoli do bagianna najolo naso olo ibana sikkola. Akkup ni i, sai dipodahon do tu siJamordong, ia arta naumbalga ima hamaloon nang habisuhon.

“Ollat ni dia na tolap au amang, hu taotton do asalma boi ho sikkola satimbona” ninna amangJamordong dung diboto na tammat do si Jamordong sian sikkola atas.

“On pe anaha, borhat ma ho tu Medan, dohot ma ho ujian masuk tu pakkultas”

“Olo bapa” ninna si Jaordong.

Borhat ma ibana tu Medan jala dohot ma ibana ujian di sada unipersitas pamaretta, dungi di jalo ma ibana disan ala mardomu halak na pistar do ibana. Politeknik Negeri Medan ma anggo sikkola i. Nunga tung las tutu rohani amanJamordong, ai gabe anak na hasea nama anak siakkanganna i. Pola do dihatahatahon i tu akka donganna, ai diboto tung na maol do masuk tu unipersitas negeri on.

Alai songoni do huroa, dung di Medan si Jamordong sikkola, godang do siulaon na mambaen ibana lupa, marahua do ibana borhat sian hutana. Dung ditanda ibana akka anak ni na gabe i, dohot do ibana marparange songon anak ni nagabe. Mangan-mangan di lapo do ibana, marisap dohot sigaret na arga, dungi marpahean na imbaru ma torus. Dang dingot ibana natua-tuana, haru marisap dang boi be. Ai sipata topas ni sigaret nassogot do di sakukkui muse, asa adong isaponna siarian i. Ia siJamordong marisap Jisamsu, anggo amana sukkup ma union peddek. Sipata sarabut ni kalapa i do dibaen palaohon rongit andorang manodok ibana. ( manodok = menyadap karet)

Dukkon sikkola di Medan si Jamordong, dang hea be nanggo manuhor baju naimbaru amongna dohot inongna, molo tung maribak saotik, holan dituhor bonang dohot jarum, dungi didukkapi ma. Sipata idaon, naso boi do poro onna batang ni hapea ( baca : karet ) i asa tor hatop gok gota i, lao tulakon marsogot tu tokke gota.

Dukkon dapot ujung ni bulan, nunga ro surat ni si Jamordong sian medan, marhite kantor pos ia so i sian motor Sanggul Mas manang BSS. Dia ma tahe isi ni surat on, anggo dang holan na mangido uang sikkola dohot hepeng balajjo. Songon na somal, dang pola be dijaha sude isi i surat i. Pittor hatop do di lului, didia disurathon angka-angka ni hepeng i.

“Bah, hepeng aha dope naeng na hurang, nunga tolu taon dang mar natammat, hape anakkon ni hlak nunga tammat. Na bulan na lewat adong hepeng penelitian, dohot na asing,” ninna songon na makkatai tu dirina sandiri.

‘Ho pe dah, goarna pe parsikkola, godang ulaon ni hepeng tarlumobi na lao sidung nama sikkolana” ninna nanJamordong huhut sai dipiari boras na baru di giling sian masin padi ni tokke gota i.

Somal do isini surat i, diginjjang hata tangiang, jala saotik di dukkun kabar ni among dohot inongna alai di paitonga ni surat sisallebar i, dibaen do disi hepeng na ikkon kirimon ni amanJamordong. Dungi ujung ni surat i hata mauliate,  songoni ma tiap bulan saleleng na tolu taon on.

“Ia tongoshonn ma jo dah anaha songon daftar nilai mi, paboahon na naeng tammat ho” ninna amanJamordong songon balos ni surat i huhut dilean doi  hepeng na pinangido ni si Jamordong, ai didok si Jamordong do holan sikripsinama, anggo parsiajaran na asing lulus do sude.

Balik bulanna, ditongoshon si Jamordong do attong daftar nilai i, alai holan poto kopina ma. Dang binoto manang na tutu i manang na dipoto kopi nadi donganna, alai dipangido ibana ma muse hepeng ala na naeng seminar ninna ibana. Sahali on attar balgahepeng di pangido.

“Amang, inang, hutongoshon do daptar nilaikku alai poto kopina ma jo hu parpudi ma aslina,..” ninna ibana isi ni surat ni i.

Sai diparrohahon amanJamordong ma surat i, alai diboto ibana do dang na toho be anakna i sikkola di Medan, dungi dibalos ibana ma muse surat i ninna ma ” mauliate ma anaha, nunga hujaha jala hu ida be daptar nilai mi, nian aslina do hupangido alai mandapoti ma nimmu, las do rohanami disi anaha. Onpe, dison hutongos hami do napingido mi. Ditongos inangmu hepeng balajjom, alai poto kopina ma, mandapoti ma aslina.”

3 thoughts on “Mandapoti Aslina….”

  1. Hahaha… ai tung na geok do nian sarita ni si Jamordong on. Ai pardia do si Jamordong on. pakket-pakket majo akka kalimat na i

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s