HATA SO PISIK

ise sibaen tangiang….

Dukkon masa ari rebo, marhobas-hobas jala martahi borhat be ma nasa huria  i lao tu partangiangan weik na dipatupa  di lingkungan manang weik na be. Songon na somal attar habilangan  do na ro di partangiangan di weik sappulu sia ima weik Jalan Martopi. Dang haru binoto manang na alani aha asa songoni, ai berengon do na sopola diharikkothon akka ruas i mandohoti partangiangan. Sai songon na marutusan ma dibaen sasajabu, ia so inanta ma na borhat, bah amanta i ma mandohoti. Olo do sipata holan sittua weik i do na ro sian horong ama. Nda godangan do nuaeng on ama-ama sai uttigon do marlapo sian na lao tu partangiangan. Ia so i, olo do lola partangiangan alana manotton bola.

Alai marasing do anggo oppuJamordong doli. Nang pe rupani nunga matua daging alai sai dipardukket-dukketi do mandohot partangiangan weik i. Di ma tahe alana, diujung ni ngolu on, sai pinajonok ma tu namarhuaso sitoppa langit dohot tano i, ninna ibana dibagas rohana.

Dung bolusan lapo nadisippang tolu i, di ida ibana do amanJonok nunga huddul disi jala lalap marnonang dohot akka donganna, hape diboto oppuJamordong do, anggo partangiangan bodari on ima apala hombar bagas ni OppuJonok. Dungi di surakkon ibana ma sian dalan i, “Bah…lae, OppuJonok, ai dang hobas be dope hamu  napartangiangan on??”

“Imadah lae, denggan ma baen hamu, adong sipaimaonhu satokkin dison” ninna sian lapo i
“Beta be ma hita hobas bah, nunga lam gale huida hita na marpatangiangan on” ninna muse huhut ma dilakkahon patna.

Tep ma ditikkina, nunga mardalan partangiangan i dohot denggan. Alai somal do rupani, molo dipartangiangan weik sai dipangidohon do tangiang pangondianon sian ruas, dungi marsoring-soring do anggo dongan ama nang ina martangiang. Molo minggu on horong ama, bah minggu basaonan sian inama.

Dapot ma ditikkina, lao martangiang, ima tangiang pangondianon i, didok sada ina ma “imadah, tu hita saluhutna, minggu na salpu sian ina do tangiang pangondianon, jadi anggo saonari sian ama nama”

“Ido tutu…” ninna ina na asing sain sugut-sugut an huhut ma dior-dior mamereng sude na ro tu partangiangan i,  mangalului ise sibaen tangiang.

“Bah,…ai holan oppuJamordong doli do na ro sian horong ama, jadi boha nama on..”
“Boha huroa? …ibana ma sibaen tangiang di hita” ninna pangula ni huria

“So jo…sattabi dihita saluhutna…unang ma OppuJamordong doli mambaen tangiang” ninna sahalak ina.
Marsiberengan ma nasida saluhutna huhut ma muse diuduti pangula ni huria i manukkun “Ai boasa dohonon mu songoni inang, nakkin hamu horong ina do mandok asa sian horong ama sibaen tangiang”

“Olo ma…asalma unang OppuJamordong doli”

Tarhatotong do anggo OppuJamordong doli, ai dang diboto ibana alana, boasa akka ina-ina i dang satolop molo ibana sibaen tangiang. Ra dang na holan nsahali on be dibege ibana na torop i mandok naso satolop molo OppuJamording doli mambaen tangiang. Dang diboto ibana didia salana, hape anggo namartangiang do malo do ibana ninna rohana.

“Boasa sai diorai hamu OppuJamordong doli sibaen tangiang? hape on ma neh..holan ibana do sian horong ama na ro” ninna pangula ni huria on muse.
“Olo ma dah…ama na asing, molo so adong be bah sian ina pe taho..”

“Bah, nga gabe tu roha….boasa sai margogo hamu mandok dang boi OppuJamordong doli martangiang??” ninna pangula ni huria on muse songon na muruk otik.

“Olo ma dah amang pangula ni huria, dang adong na sogo rohanami tu OppuJamordong, alai takkas do diboto hamu, molo ibana innon martangiang, sotung dipangido ibana ma tiur ni akka passarian, dipangido muse asa sai lam dengganna akka ulaon….takkas bereng hamu, ai naso diboto hamu do??

“Ahai inang, torushon hamu ma jo…ai aha na sala na hubaen” ninna oppuJamordong

“Takkas taboto, ai dang na mandok dia, taboto do takka ai tukang poti ni na mate do ibana, hape sai dipangido ibana ma innon tiur ni passarian, aha do maskudmuna?, molo tiur do passariabn bah lakku ni poti ni namate na pinature na i do dah? toe….ise parjolo mahuhor” ninna ibana sian sugut-sugut an, huhut di padenggan maddarna na habe-habe i…

Huroa na sipauli poti ni na mate do karejoni oppuJamordong.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s