Nomor piga ma ho, Appara…

Molo di partuturon halak batak sai dimulai do parjolo sian na masisukkunon marga, dungi molo nunga masipaboaan marga, gabe dapot ma tarombo manang partuturon. Ia namardongan tubu, namarhula marboru nang na akka partuturon na asing pe tahe. Manang tudia pe halak batak lao marjalang tusude luat diportibion sai ditonahon akka natua-tua do asa ai dilului do dongan samargana na boi gabe amana. Sian partuturon marga manang sian parpadanan ni marga ma dapot sisongoni. Dison ma boi ta ida boha do jonok ni parpamilion dihita halak batak. Tung mar pulu taon dang pajuppang, dang marsitandaan hian alai ala adong do tarombo boi do gabe jonok parpamilion.

Boi do gabe dapot muse garis ni tarombo, nang garis ni partuturon dungi gabe lam sadaging ma tutu akka namardongan tubu manang gabe lam tabo ma parsaoran di parngoluon siganup ari. Lumobi ma molo attar saotik do marga niba, gabe sai niluluan do marga marpadan niba asa sai adong dongan tubu.

Andorang sio hutorushon manuhuthon taringot tu partuturon dohot tarombo nakkinon, husuhuthon ma jo sahalak ama-ama na saddu marbola, manonton bola nang akka na maccam na adong hubunganna tu bola, alai suhutankon adong do hubunganna tu partuturon nakkinon. Suhutan ni dongan do nian, disipak ibana ma simatuana dilapo alani rap koji manotton bola.

Sai na uttabo do manotton bola rap dohot akka dongan na rap koji tusi, ribur-ribur huhut marsurak be molo tim niba i naeng pagol-hon. Jala boi nikomentaran parbola i, sai hira iba na ummalo sian pelatih jala sai hira kkomentator iba. Hatiha di malam minggu i, ditahi siJamordong ma lao manonton bola ima liga Inggris di lapo ni Amantiur  nadi sippang opat i. Nunga jam ualu borngin, di engkol ma kareta on jala dipadalan nanget.

“Bah, ai tudia hamu amang hela…” ninna AmanTugo, dung dibereng si Jamordong mangengkol kareta.
“Tulapoan do amang, manotton bola dohot akka dongan” ninna mangalusi. Ai diboto ibana do na koji do tong simatuana i tu na manonton bola.

“Attong rappak ma hita, disi ma hita manonton” ninna  huhut didilo nanget tu bagasan jabu nasida i, dibereng ma simatua boru ni siJamordong nunga tutu manonton sinetron, jala dang boi be gattion siaran ni tipi on. Borhat ma nasida nadua marbossengan tu lapo ni Amantiur di sippang opat, tutu ma nian nunga tung ribur lapo i, rappak marsurak be. Huro na main do MU dohot Chelsea jadi tung tabo ma tahe na manonton i.

Asing tim ni si Jamordong, asing muse do tim ni simatuadolina i. Ia siJamordong, Chelsea do di ibana, ninna songon na jago do permainan ni Chelsea i. Alai anggo AmanTugo MU do jagoanna. Rara ninna jala jago muse. Rappak huddul do nasida nadua namarhela marsimatua di bakku pajjang i, huhut ma di jalo nasida sagalas be tuak sian parlapo i.

ribur situtu ma attong namanonton i, sai hira naditanolapang nama riburna. “Sipakkon…gol..gol…gol ho!!” ninna siJamordong molo dung diserang MU i.
“Dang adong i, dang main i…” ninna AmanTugo muse simatua na i sian jolo, nanget.

“Buat pat na i, salpat, bakkahon ma…..” ninna huhut ma sai songon na dohot ibana mangososhon patna ditoru ni meja pajjang i.

“Boha baenonna, apala na germe-germe, marlojong pe soboi be si Ballak i…” ninna AmanTugo muse, ala dibereng siboan si Ballak bola i tu baba ni kiper ni MU i.
“Pa gol,….sipak….lean tu ambirang, maju ho aha, sai dipudi!!…” ninna si jamrodong muse ala dibereng si Lampard sai di tonga.
“Dipikkir hamu do na margala tikko on, jago do MU i, bereng ma neh, nga marbalik be serangan i, lele torus..ima..ima…..” ninna amanTugo muse disi marbalik bal i tu sabola Chelsea.

Marsigulut ma attong akka namarbola di di baba ni gawang ni Chelsea i, gear ma manonton di lapo i. Huroa holan si Jamordong do majjagohon Chelsea, ai tarida do suara ni jolma nadilapo i. Sai saongon na dohot be idaon mangodon, naeng manipak, jala sai naeng marlojong be.

“Sipakkkon kiper, eah…eah…otoni kiper…..sipaaakkkkkkk” ninna ibana mahuhut ma disipakkon ibana patna ditoru ni meja pajjang i.

“Amangoi, hassit nai….nga mate au..” ninna amanTugo huhut marijjak ibana, mangangkat pat na i, huroa tarsipak gogo dibaen siJamordong gogo.

Golap bohi ni sijamordong dang haidasa be simatuana i, mangissugut ma ibana tu pudi nanget.

Ai di ingot ibana dope tolu bulan na lewat pe di toyor ibana simatuana i di jabu. Tikki rap manonton si Chris Jhon martejju dohot halak amerika i. “Lotak…lotak….toyor, KO hon…ninna huhut abbal tanganna gabe hona tu bohi ni simatuan ai.

*     *     *

Dipamasa luat i ma martadding marbola, nga binoto numaeng ai godang do halak hita on na saddu marbola. haru manotton dipear do sappe dang marminggu manang na markkar modom petaho asal ma boi manotton bola on songon suhutan nadigijjang i.

Dohot do siJamordong marbola, soholan manonton ibana saddu alai marbola pe saddu do. Anggo ninna ibana adong do sada sipesialis ni ibana, ima sipesialis cadangan.  Asal main ma parhutanasida i sai  dohot do ibana, nata pe jo sai holan cadangan. jala olo do sadari manikting dang marnajadi dohot ibana manipak bola i.

Jadi pertandingan on ima marhadomuan ma tu pesta 17 Agustus. Adong do piga-piga tim na dohot jala na ro sian huta na asing. Dijalo ibana do bajuna nomor sappulu tolu ala lomo rohana marnida si Ballak na sian Chelsea i. Sai dipasuman ibana do leak ni si Ballak on molo nga ditano lapang, ai dipikkir nga jago ibana.

Sibotari i, sian Parnados ma aloni halaki, ima tim na sian Dolok Sanggul. Dipamasa akka parhobas ido jala dilean do tikki asa marsitandaan akak pemain i. Rupani asa unang main kasar dohot na asing, ai molo nga diboto be innon margana tottu dang adong be sahat tu parbada-badaan. Marsijalangan ma nasida, nang sijamorong, nang pe holan cadangan manang pemain pengganti do ibana.

“Lumban Gaol, horas ma..” ninna huhut dijalang sada-sada.
Masipaboaan margana be ma nasida saluhutna, adong na sihombing, simamora, sihotang nainggolan nang akka marga na asing tahe. Hape toppu ma adong pemin ni Dolok Sanggul on marga Lumban Gaol. “Bah marppara do hita hape bah, au pe Lumban gaol do sian Pollung Dolok Sanggul, ” ninna pemain ni Parnados on.
“Ido bah, mardongan tubu do hita hape…” ninna si Jaordong mangalusi.

Songon hata nadigijjang nakkin, gabe solhot ma nasida ala naung marsibotoan marga nasida, namarappara do hape nasida nadua, nang pe sahali on dope pajuppa.

“Nomor piga ma ho appara..” ninna pemain ni Parnados on.
“Nomor Sappulu tolu do bah…ia ho??…” ninna siJamordong
“Nomor sappulu lima do bah, majou oppung do iba tu hamu bah…” ninna mangalusi siJamordong.
“Bek do ateh…..” ninna si Jamordong muse manukkun
“Daong appara, penyerang do au…”
“Bah….asing do nomor munai ateh appara” longan rohana.
“Boasa didok ho appara asing??”
“Molo dihami daba, na targoar penyerang ima nomor sia, sappulu, sappulu sada do, jala molo nomor sappulu lima bek do, bereng ma neh kedan kan si Marbun no sappu lima an, ai bek do.  Jala songoni do na binoto manang na parbolaan didia pe, liga Inggris, Itali dohot na asing. Molo au nomor sappulu tolu gelandang serang do songon si ballak” ninna patorakkon huhut dipatuduhon tanggurung ni bajuna.

Nga peol bayon, dang tarakkupan be on, atik na lari sa kamar do bayon, ai nomor ni tarobbo do nisukkun, abbal alusna, ninna rohani par dolok sanggul i ma, huhut marlojong tu tonga lapangan ala naeng main nama marbola.

3 pemikiran pada “Nomor piga ma ho, Appara…

  1. Adong sada ale-ale ni iba, marga Sitorus [na joloi wartawan ni majalah Bona ni Pinasa, alai saonari dosen STF Driyarkara jala sedang studi lanjut S3 bidang filsafat di Frankfurt] na tar “alergi” to soal nomor di partuturan ni hita Batak i. Songon i ma, di sada tingki ala dibege i bana, na sada mandok no 17, na sadaan mandok no 19, na asing mandok no 18, gabe kesal ma Lae i. Ujung na sahat ma sungkun-sungkun i tu ibana : “Ba molo ho wartawan, nomor piga ma ho puang, kedan?” Ala saleleng on ndang pala masuk tu roha na angka si songon i, dialusi ibana gait: “Ba nomor dua ma au Amanguda !” Asa diboto angka donganna na serius do alus na i, diuduti ibana ma muse: “Dung si Raja Batak, anak na … ba au ma,” ninna ibana dohot bohi na satonga muruk [mambuktihon na hudok on ndang na gabus sambing, boi do dikonfirmasi tu Lae Fitzerald Sitorus via FB].

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s