HATA SO PISIK

Jurngak….

Ai sarupa do molo nanidok nau-nau, paol-paol nang jurngak holan parasingna molo hata jurngak on ima pangalaho maradophon donganna jolma. Olo do na deba mandok jolma na jurngak ima si suhar sisik. Molo di halak ikkon tu toruan alai anggo ibana ikkon tudolok do. Daong innna donganna, ikkon ido ninna ibana. Andorang disihadanakon niba najolo, ni ingot dope godang do dongan na jurngak. Ai pinambuatan do parbue ni hamuma ni pamili soparmisi.

Alai somal do molo dakdanak na jurngak, idope tikkina. Alai molo nunga namatua gabe jurngak, ido na gabe sala.

Nian nunga tarbarita haholiton ni OppuSumuang di huta i. Hape binoto do godang do nian na boi silehononnna tu akka jolma hombar balokna. Ai godang do suan-suannanna jala denggan do naniulana. Molo marboras pisangna, olo do gok hian, na rappak malamun. Molo marboras manggana, tong do songon godang ni bulung  na rarmos ni parbuena. Alai tarbarita do ibana na holit, tung naso jadi lehononna tu donganna. Sude do dietong sigadison.

Disada tikki diida siJamorodong, sahalak doli-doli ni huta ima mamolus OppuSumuang mangalajja tarutung, godang jala ret-retan ibana. Ai dihatiha i masa do tarutung, jala tarbarita do tarutung ni OppuSumuang on na tabo, paet lada. Nunga tung ret-retan ibana na mangalajja tarutung on, jala hodohan ibana idaon. Somalna, molo mamolus huta, sai maradi do ibana atik boha adong na manuhor di tonga dalan. Alai, ala ni holita, olo do alani salipper gabe dang jadi dituhor deba.

Sian sude tarutung nanilajja na on, adong do sabiji na lubangon, ala diallang padidit manang bagudung. Nunga tok balga lubang nai, huroa habis do sabilut turge ni tarutung on. Gabe sai lam muap ma tarutung on tu jolma na binolusna.

Dibereng siJamordong ma na lubangon on, jala dijouhon ma tu OppuSumuang, “Oppung, ai loja ma ho mamboan na lobangon i, ia lean ma dihami i, ai so na lakku innon gadison mu tu onan i”
“Bah, molo naeng diho, tuhor ma satong arga pe lean, ai holan sabilut do diallang padidit i” ninna mangalusi

“Dang adong hepenghu da oppung, attong molo adong, nadihajut mi ma lean adong do ra disi digil-digikna, nunga sai naeng mangallang tarutung au” ninna siJamordong muse
“Bah, arga do  tarutung nuaeng, pangido hepeng tu amatta hamu, molo naeng mangallang tarutung ho”
“Holit ma ho oppung, dok napala na sega”
“Agia holit, na sega pe lakku do, mangalolai au do ho, pinikkir na naeng manuhor ho” ninna huhut dilajja muse taturung na on

“Pakkolit..ikkon hu takko innon tarutung mi asa diboto ho” ninna  siJamordong
“Suba ma jo..”
“Olo, bereng hian..” ninna huhut ma marlojong ibana marimbosi ala di ida nga muruk OppuSumuang.

Tutu ma nian, dihara si Jamordong ma donganna opat tolu halak lao mambuat tarutung ni OppuSumuang on. Didok siJamordong do, dang adong manjaga tarutung i, ai di onan do nuaeng oppuSumuang manggadis tarutung. Satahi ma nasida lao tu batang  na i, dungi diboan ma goni.

“Au pe majjakkit, asa hudodas sude, tarutung ni OppuHolit on” ninna si Jamordong, didok oppu holit maddok oppuSumuang.

Margait-gait ma dongan ni sijamordong si Oloan, dipasuman-suman ma soara ni oppuSumuang dung diida nakkonk majjakkit si Jamordong tu gijjang  “Ise i..” ninna apa pas soara ni oppuSumuang.

Humordit ma siJamordong, tor manibbuk tu toru jala hitir-hitir ibana, dungi diparekkeli akka donganna ma ibana, jala gabe dohot ma ibana tong mekkel. Diulahi muse majjakkit, jala dang sadia leleng didok sahalak donganna muse “Nga ro oppuSumuang..” huhut songon na maribbosi, jala di ihuthon donganna na tolu nai. Tong ma songon nakkinon, marsilussur ma muse siJamordong sian gijjang dang sanga dope dibuat nanggo sada.

Ujungnga rap mekkel ma nasida, ai sappe maribak do basan manang saroal ni siJamordong, mangogos tu batang ni tarutung i. Tong dope dijakkit ibana, batang ni tarutung i humatop tu gijjang jala paula so dibege ibana nama molo dipabiar-biar donganna ibana sian toru. Nunga madabu lima tarutung on, jala nunga dipapungu akka donganna di toru, jala mekkel-ekkel nasida na lima.

“Hep..panakko..pardapot ho” ninna sada soara sian pudi.

Dibereng na opat naditoru on ma nunga jonjong oppuSumuang dohot golok na tajom di tanganna. Marlojong ma nasida na opat, ditimbuhi suga dohot rmba bolak i dang diboto dia mara ddia dalan. Bohama asa unang ditakkup OppuSumuang, ai heado dakdanak ni perhutai di pautankkon jala diboan tu kattor polisi ala tardapot manakko di porlak na.

Nang pe dibege siJamordong hata nunga marimbosi donganna, dirippu ibana do gait-gait ni donganna i, dungi didok ibana ma sian gijjang “huterge pe dang oppuSumuang, tangan siamun hon tu si” ninna huhut ma sai dijakkit dakka ni tarutung on mambuat na deba nai.

“Nga piga..papungu hamu da, ikkon butongan hita” ninna muse
“Tuat ho asa hu tallik rukkung mi ” ninna oppuSumuang
“Paitte jo, tolu nai pe, jala dang makkan i golok mi” ninna si Jamordong mangalusi sian gijjang huhut sai dirariki tappuk ni tarutung on.
“Anggo ho parmittopmu ma annon”
“Huterge pe dang i, dokkon tuson”
“Tudia do au dokkononmu, dang tuat ho innon??”
“Daong, tarutung nami do on”
“O…anggo ho pe parsudam ma, majjahut-jahut dope ho”
“Nga piga, nga adong tolu be hita??..sanga ro oppuSumuang annon” ninna Sijamordong lao tuat tu toru
“Nga dison au, aha dohononmu…” ninna oppuSumuang gogo sian toru

Dibereng ma tutoru, nunga ditiop oppuSumuang golok na tajom i, hitir-hitir ma sijamordong didakka partoru ni tarutung i, huhut ma kossing-kossing. Bessut jala naeng tangis.

“Ai hodo hape oppung i…” ninna huhut tuat ibana, jala dung sahat tu toru mangido ampun ma ibana, “Sala ma au disi opung, nadisuru do au, holan na majjakkit do au, ampun ma oppung, jora ma au” ninna huhut sobba-sobba.

1 thought on “Jurngak….”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s