HATA SO PISIK

Jolma na jujur…

Nunga tung sude pinopparna  pasahathon andung-andung parsirangan. Sude ma namambege akka andung i gabe sai dohot tumatangis, diapusi be iluna. Nian, molo binereng do tu umur ni oppuJamordong, na bostang di tonga ni alaman i, nunga tung saurmatua bulung be. Dipatupa pomparanna na na ualu pulu ulau i do adat na gok di partuatna. Dipalu do godang sabangunan, jala ro do sude pinomparna na marserak didesa na ualu.

Alai, molo sian hajolmaon dang tagamon dang lungun roha molo ikkon marsirang salelengna nama dohot nanihaholongan i. Uju di ngoluna oppuJamordong sahalak sitiruon do diluat i. Boi dohonon nuaeng, sai hatana do dibege akka naumposo, mardomu diburjuna songoni ma nang dibasana marsilean-lean. Asal ma adong lehononna, sai tor dipalleani do tu dongan hutana. Isarana, molo manongos pinomparna sian pangarattoan di tambaru i, sai disarihon do dongan hutana. “Hurang do tabona anaha, molo holan au mangallang jagal di tambaru on, sadia ma siallongon i, alai molo rap mangatton dohot dongan sahuta, tabba do tabona, bah tuhor ma sada anak ni horbo i bidda on nami” ninna tu anakna sihahaan parCilegon i, hatiha naeng dilean pasibidda nasida.

Suang songoni molo adong na habobotan dang maniop hepeng, hape ikkon porlu hian. Bah, tor tu jabu ni oppuJamordong do jolma i lao, ai sai dibaen ibana do dipartabunianna nanggo pala saotik. Dang dibungai hepeng i, asalma dipaulak annon.

Marningot i, gabe tabba lungun  ni pomparanna i, ai sude do hape nasahuta i makkilalahon diparlao ni ibana.

“Toe ma, nunga sae be i andung muna i anaha, nga songan be amanguda on, asa ta uduti ulaon ta” ninna raja parhata sian sorong-sorong ni mik na i, huhut di bolokkon puttung ni sigaret kompil i.

“Tu hamu saluhut amanami, raja ni dongan tubu, raja ni boru, tarlujmobidi raja ni hula-hula, tulang nami dang raja ni huta, atik boha adong dope naso hujouhon hami lao pasahathon tor-tor, manang hata, hulehon hami ma tikki nuaeng” ninna raja i muse manguduti.

“Imadah rajanami, adong dope nian, ai takkas jala ingot do hami, ia amang uda on, sahalak pejkuang do na jolo, jadi dison hubereng hami do ro sian akka donganna, dongan magodang nang donganna marjuang na jolo tikki jaman boladda” ninna amanDorpi, paidua ni hasuhutan.

“Nauli, tuson ma hamu amang..”

Nunga jongjong akka dongan ni oppujamordong, ro mamereng ibana, ima dongantorbangna, dongan tikki marporang najolo. Lao pasahathon hata parpudi tu oppuJamordong. OppuTobok do namandok hata jala huhut ma sai naeng ro iluna. Ra, sude do na ro disi mamboto, ia OppuTobok on, ima dongan torbang di umur, jala saparmeaman hian do nasida mulai sian hadanakonna pe.

“Nunga dipajolo ho hape lae,…heik..heik..ise be dongan hu marnonang dihuta on…” ninna OppuTobok toppu tumatangis. “Jala holan au nama hape satorbang ta, paima ma au disi lae, oppuJamordong..” ninna muse huhut dilap iluna.

“Tuhamuna bere nami, pinompar ni lae on. Ikkon takkas do botoon muna na burju do lae on andorang dingoluna, jala hu ida, denggan jala burju-burju do hamu sude pinomparna, sangap do dibahen hamu partuatna. Sada naso boi sihalupahononhon, ima tikki masa porang najolo, anggo so adong amangmuna on, oppuJamorodong on, nunga mate au parjolo….heik…heik…..molo huingot najolo laekkuu….dioppa ho au sian baba ni bodil i…tudia ma au lao ..heik..heik….” huhut ma tumatangis ibana manuhuthon.

Sude do jolam torop i gabe tumatangis tarilu, disuhuthon Opputobok do boha najolo tikki masa porang. Gabe tabba do attong bangga ni pinomarna nang akka parhuta i, dung diboto songoni suhutan i. Natutu do hape sahalak pejuang oppuJamordong on.

“Na burju do lae on, dang diboto hata dia-dia, dang hea mambaen pargasipan tu donganna jolma, jala gabe sitiruon do on di hami nasatorbang. Olo do marsilehon-lehon, olo do dang mangan ibana asalma mangan donganna di pargurillaan. Ima tahe, dang piga songon lae on…heeikk…heik…” sai tong dope tangis Opputobok manuhuthon.

Diuduti ibana muse.

“Ndang habilangan taon be hami na marale-ale i. Najolo, rappak masuk do hami gabe anggota ni partai komunis, rappak manjalo pakkur i……jala ala ni burjuna do lae on, gabe lae on do na gabe kumandan nami di partai komunis i…” ninna ibana muse manorushon suhutan on.

Alai holan dibege hasuhuton bolo hata i, tor di rappus ma mik i sian tanganna i didok ma “dan pe ka i amang na mi on, nga sai be i suhutan munai….” ninna. Gear macca!!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s