dang kodo habis sittua…..

Molo masuk hita tu sada-sada gareja jala taparrohahon adong disi jam dinding, tottu naparjolo sahali ima, ia jam dinding on sai gumodangan do mandoppakkon langgatan parjamitaan. Adong  do lapatann ni i. Asa diboto akka parjamita, panditia, pastor, sintua naung sadia leleng ibana marjamita. Ai olo do sipata ni ida, maru tung leleng namarjamitai. Nunga sude ruas mondohondok, alai sai dipaleleng do anggo jamita i. Dihatai sahat rodi luat naso he ni ida.

Ninna na malo, paleleng hu pe begeon dongan makkatai olo gabe mondohondok jala hata i pe olo mulahulak tu pudi. Ujungna busisaon jolma.

Nadiari minggu na lewat, di huria resort ditabalhon do amaniJamordong gabe sittua na gok. Nian nunga mardalan tolu taon parguruan on, ima na sian salon sittua gabe sittua. Namamukka parhuriaon na imbaru do amanJamordong dohot akka donganna sahuta, mardomu ala dao do  gareja nasida sian hutana. Satolop nasida, dipukka ma songon inangan parmingguan, jala arop roha nasida gabe sada huria innon nasida muse.

“Halak amang amaniJamordong ma marjamita, ai nunga leleng nasida na marguru i dah, bah hamu ma amang marjamita ari minggu” ninna pandita resort tikki masa sermon huria.

“Unang ma amang, hurang dope parbinotoan hu saulak nai ma i amang” ninna mangalusi amanJamordong.
“Anggo dang saonari, andigan be, ikkon mulaion do marguru, lam leleng innon, somal ma,” ninna amantaPandita i muse.
“Attong nauli amang pandita, alai ajar-ajari hamu au” ninna

Tutu ma nian, dukkon masa ari minggu, hunga hobas-hobas amaniJamordong. Nunga dipakke jas na, ima jas pangoli na jolo. Dibaen akka na angur i tu dagingna. Jala uli ma tutu idaon ibana. Haru do didok nanJamordong, dang ditanda be niolina i ala ni ulina. Songoni do nanJamorodong, mulai sian nassogot nunga dihobasi sanggulna, ai diboto ikkon dohot do ibana gabe sada ina!. Diboto ibana do sadari on, ia sinondukna marjamita.

Mulai sian na bodari nunga marlatih amanJamordong di jabu. Dipasuman-suman songon na marjamita. Inanta i ma mangajari boha asa tabo begeon soara na. “Unang pa hatop hu dokkon hatami dah, gabe so marbatu” ninna NanJamordong. Ia so i didok muse “sahali-sahali attong tu joma torop ido berengonmu, jala baen tanganmi pasumanton, asa sai hira parjamita ni amang pandita” ninna muse. Marulahulak.

Sada siholsohonon ni amanJamordong, ima dang diboto, naung sadia leleng ibana namarjamita i. Tahe, dang adong nanggo jom tanganna, jom ni gareja i pe dang adong dope, bohama na mandasor dope. “Na mura ma i, ai iba pe najolo songoni do binaen” ninna sintua na asing, amanJatolhas.

“Boha dibaen amang?”
“Baen hamu disakku munai bobbon pitturia i, holan nakkok hamu tu langgatan i bah boddutton hamuma, tabunihon hamu tu toru ni sialap ikkau munai ( baca: dila/lidah), molo nga habis annon bobbon i bah, amen ma” ninna amanJatolhas mangalusi. Bobbon pitturia ima songon bobbon polo sinuaeng ma i. Hiltung do i.

Tep ma, dapot ma tikkina, naeng marjamita.

Holan naeng nakkok amanJamordong tu langgatan, didadap ibana ma tu sakku ni jasna. Dapotsa na sinuguthon na i, dungi tordibodduthon hatop, sotung di ida jolam torop i. Jala dimulai ma marjamita.

Songoni do huroa, ai molo tung ipe sahali iba marjamita, bah pikkiran pe attong sai tu bibel i nama. Dang diparrohahon amanJamordong boha dai ni bobbon pitturia i. Holan na marjamita i nama.

Huroa nunga songon na paleleng hu, jala gabe rarat do dihatai ibana. Niantusan ma, ai tong do raja parhata amanJamordong on. Jadi gabe rarat do dihatai ibana sian langgatan. Nunga songon na busisaon jolma.

Dihirapi amanjatolhas ma sian bangkuna. Ditudu tu tangan ambirang na mandok “bereng tikki”. Di ida amanJamrodong do i sian gijjang alai tong do ditorushon ibana namarjamita i. Ninna rohana, “ah..so habis dope bobbon na di pamangan on”. Ujungna lalap mar jamita ma ibana.

Dihirapi amanJatolhas ma sian toru, dibereng partikkian nunga naeng sa jom namarjamita i. Dihidopi ma ibana muse laho mandok. “Bereng hamu partikkian”. Sai maos ma dihidopi jala dihirapi amanJatolhas tu langgatan.

Ala sai dihidopi sian toru, bah tor toppu ma dialusi amanJamrodong sian langgatan “So habis kodo bobbon on sintua, nion kodo nei…” ninna huhut di pahaluar sian pamanganna i. Dipatudu tu sittua i.

Gear jolma.

Hape, dung disulikkiti. Dang bobbon pitturia na pinangan ni amanjamordong. Hassing ni jas na peut i do. Huroa dipamasuk ibana hian hassing i ala peut, asa unang mago bah di pamsuk tu sakku ni jasna. Anggo bobbon pitturia i tong do disakku ni jas i. Sahat tu na suddut portibi on dang na habis i hassing i di omom.

Satu pemikiran pada “dang kodo habis sittua…..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s