namasamasai,…..

Hurang hona do molo iba nian manuhuthon on tu hita, alai molo dongan nampuna suhutan do, iba na umbegesa sampe medep-medep mekkel alani geokna. Dung sidung hami marolah raga, biasa do songon na rileks pangalihon pamatang, markombur ma jo di ula, huhutma masitariparan suhutan, akka bisnis, parkarejoan dohot dia akka na massam. Sahat ma nonang ni dongan tu istilah mananang pandohan sisaonari, ima hata na biasa do nian binege alai molo pangalapationon tung mansai sila begeon.

Molo didok hata ‘namasa-masa i’ di jakarta on, tung gabe hata na so sidohonon namai di joloni tutur parpattangon, ai lapatanni on, ima portibi ni akka na humurang, akka na hodar. Molo bahasa kasarna ima jolma akka na berprofesi tu ulaon na sosuman.

Disada tikki, marsuhutan ma natua-tua na baru mulak sian Jakarta tu dongan sahutana di huta. Tutu do nian, ai nunga denggan sude akka ulaon ni pinomparna, boruna, nang akka anakna di Jakarta. Jala tung tabo do diahap ibana ima na ro ibana mangebati anakkonna i di Jakarta. Songon anak na burju akka pinomparni amanta on, diboan do ibana mardalani tu sude inganan na adong di Jakarta, na so hea dope di ida ibana. Diboan tu naribur-ribur i, diboan tu mall, diboan tu kobun binatang, diboan tu ancol, mangaliat-liat mamereng balga ni Jakarta.

“Beta ma bapa mardalani tu sude inganan na denggan di jakarta on, asa di ida ho jo akka namasa saonari, na so hea diida ho dihuta” ninna anakna siampudan par Bekasi na karejo di pemda i.

Sada na sai diparrohahon ibana, molo lao nasida tu sada inganan, songon tu mall matahari, tu restoran jepang, manang tudia tahe, dang hea anak na on mangalean hepeng laho manggarar, alai holan kartu do diida ibana dilehon anaknai. Tung mansai longang do rohana mida i. “bah tutu, hebat ni namasa on, nga mangan iba butongan, alai dang dibayar, holan kartu do dilehon, namarutang do naeng anakkon? jala molo marutang, ai naditanda halakon do naeng ibana asa dilehon marutang?….manang tudia iba lao di jakarta on, holan kartu on do dilehon, kartu beguaha do naeng on.”

Dungi muse dibereng ibana ma marodor-odor jolma i jonjong di jolo ni poti-poti i, dungi di ida haluar hepeng. “Bah..patut do hape mamora parJakrta on, sopola loja na massi hepeng i, ai holan di pamasuk kartu on, nungnga mullop Hepeng…ueee tabo nai di jakarta on, hape iba di huta, ikon lao  do iba tu hamuma, dungi ikkon nijual ma akka boras ni hauma asa adong hepeng….bah tutu….”

Sai marpikkiri ibana, tor dipatorang amanGihon ma, ima nandokna ATM.

Suang songoni lao manggarar situhoron. Dang tahan be ibana mamerengsa, ala tiap lao nasida dang hea marbayar disukkun ma anakkon na i. Dipatorang anak na i ma tu ibana didok ma “Olo bapa, on nama namasa saonari, goarna kartu debet, manang kartu kredit, jadi aha na tatuhor i, tabayar do i, alai to dipotong ma innon sian tabunganhu na dibang i”.

” Bah…tutu, hebat ni namasa on, hape iba dihuta, holan marutang gula sakilo do tu lapo ni oppuHumuttal, tor disurathon nasida do,..hebat nai namasa on.”

Dungi laho ma nasida muse tu pusat perbelanjaan na tung mansai timbo, jala naik lift do nasida tu ginjang. Dimula nai, biar do rohani amanta on jala didok ibana ma “Amang, ai boasa ikkon tibbangonna hita?”. Serom otik do anakna naburju on, jala didok ma mangalusi, ” Daong bapa, on ma goarna lift, sikkat ni tangga molo di hitaan, asa unang loja hita, jadi holan kaluar hita annon, nunga be di lantai 7 hita “

“Bah…hebat ni namasa saonari ateh…” huhut ma sai mallobok-lobok taroktokna na marlift on.

Suang songoni ma laho tuat na sida sia lantai 7 i, ala pol do lift on, di togihon anakkonna ma ibana mar ekskalator, ima tangga berjalan. Andorang so naek amanta on, dipatorang AmanGihon do tong ahama nandidok na ekskalator on, tamba ma longan ni rohana, hebat nai hape namasa on, sai ima ro pikkiranna.

Ala songon na biar rohana na mar ekskalator on, jala di ida parumaenna NaiGihon do na humitir amanta on, tor ditiop parumaenna on ma ibana, ai lomos rohani parumaenna on mida ibana.

Bolak-pbolak ma bohina, dang sangka na tiopon ni parumaenna on ibana, ai molo dihutana, tung sitokka jala pattang do marsitiopan namar parumaen-simatua. Sai naeng di hoishon tangan ni parumaenna i, ala songon na sukka berengon.

Dipatorang AmaniGihon do ala dibereng boha perubahan ni amongna di na tinio ni niolina tanganna, didok ma “Bapa molo dijakarta on, ai biasa do songoni, marsitiopan i, dang tokka i, na holsoan do rohani parumaenmi mida ho, jala ai dang anakmu tong parumaen mi? boasa pola maila ho bapa? ai nunga be tong songon among pangintubu ni parumaen mon ho, jala dang mardia imbar be dohot simatuakku dirohana, sarupa amongna do ho…”

“Bah hebat ni namasa-saonari akke….”

Tutu, dung mulak natua-tua on tu huta marsuhutan do ibana tu sude hombar balokna, tarlobi tu laena, hula-hulana, simatua ni anakkonna. Na ro tu jabuna ala dibege nabaru mulak pe tahe nasida sian Jakarta mangebati pahompuna. Tutu, godang do so suhutan ni ibana tu hula-hulana i.

Didok ma, “Imadah lae, ai lao do hami tusude inganan ni namasa saonari,, nunga huhilala be akka  namasa i, nunga huhilala be tabona, lao do tong hami mardalani makkalilingi jakarta,  diboan helamuna. Jala sude do hudalani hami, nunga huida be sude akka namasai.” ninna muse. ” Nion ma tongosan ni helamuna, songon pasi timbahomuna.” huhut ma dilean ampolop na bottari.  Alai dang dipaboa ibana na dihaol parumaenna i ibana.

Manginongi do turohani ni OppuTogos pandohan ni pamoruonna i, ima apala simatua ni boruna i. Boha naeng tutu namarjakarta on. Nian sian najolo sai ditahi rohana do ro mangebati amanGihon, boru siakkanganna, alai ala nunga marumur ibana, nunga pitupulu taon, jala olo manombo sahitna, lomos do rohana molo lao tu jakarta. Alai saulak on ikkon lao jo au tutu, marnida songon nanidokni simatua ni boruna i.

Tohodo, di oloi helana do pangidoanna, mardomu nasida saripe pe nunga masihol, jala tung mansai las do rohana mida haroro ni natua-tuaon, suang songoni ni akka pahompu tung mnsai las rohana mida oppungna i. Sadari-dua ari, nardomu sibuk amanGihon, dang tor jalol ditogihon natua-tuaon mardalani, ai ikkon paimaonna do ari libur. Jadi anggo na tolu ari on, sai dijabu do pe amantaon, madongani pahoppuna.

Sai manginongi ma dirohani nibana, ai dang tongihonna au mardalani naeng?

Ujungna, disada manogot, andorang soborhat amanGihon tu karejona, di terras ni jabu i, didok amanta on ma tu helana ” Amang hela,…ai dang boanonmu au tu namasa-masai? asa ni ida jala nidai jo namasa-masa i, sai holan dijabu iba dah…..”

“Bah…!!!!!”

Songgot situtu do rohanu amanGihon mambege pangidoan ni simatua na i…

“Maksud ni amang???”

“Imadah, baalissan di ngoluon, ai nga matua iba, jala asa adong suhuttonon tu akka dongan dihuta, boha tutu dai ni marnamasa-masai, nga matua daging, di ujung ni umur on asa niahaphon jo  nataboi, boan hamu ma au tusi…

😉  marudut kodo

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s