Dalihan na 3 pa-5 Dongan sa pesbuk

Tung mansai longang situtu no nasa ise na ro lao mamereng amaniPoluk. Nian dang hea dope niahappon songon na niahappon ni ibana, ima naung martilaha ibana. mardomu muse dang pola piga ro na mandulo ibana. Holan dongan sahutana na i do. Hape ni bege baritana, tung parsaor situtu do ibana.

Marmassam do pandohan ni na ro i taringot tu namasa i. Attar songoni do halak hita, tor so gok do nonang na.

“Imadah, jaman sinuaeng on, songonon ma hape parsaoran ni akka jolma. Nda, tung godang ma nian ro mandulo ibana, pinomat holan manjalang?” ninna amanJatolhas dung diida dang pigana ro marnida amaniPoluk.

“Ido tutu lae bah, hape molo binege muse sian sian iban sandiri, tung na godang do donganna, jala sai dihata-hatahon do i tuhita, marribu do ninna donganna di kota na ribur on” ninna amanJalongos.

“Olo ma, anggo marribu, boasa dang adong nanggo mullop nanggo sada? nda holan na hita sa huta do dison? anggo halahan do, hasuhuton bolon do i…” ninna amaniJatongon huhut di tudu doppak bagasan ni jabu i.
“Au pe hurang huantusi do, ai molo pola do puang adong dongan niba ribuan hape masa ma nasomasa songon na taadopi on, bah tudia dang manarita iba, dongan beguahai…” inna amaniJamurhing. Ia amattaon dijou nasida do RajaManarita, ai manang aha na masa tu ibana, sai tor manarita do ibana. Gok pangidoanna.

“Dang sai manguhumi iba dah, ala ni godang ni akka ulaon dohot dao ni inganan on, akka na asing muse, datung so adong be alana, ibbaen naso marroan be nasida ” ninna amani Jakurleng unduhunduk, paula mangappini akka dongan ni amaniPoluk.
“Alai da, molo marsuhutan amaniPoluk taringot tu parsaoranna di kota on songoni nama begeon, pola do didok ibana godang ni donganna disude sugut-sugut ni kota on, sian desa na ualu, sian purba sahat rodi pastima?, jadi dia ma donganna na i, hape holan hita na sahuta do mangadopi namasa on” ninna amaniJatongon muse.

“Ta paimana ma jo dah parroni akka pamilina, ai manang bohape, molo tung soadong na ro, bah tu hita na mardongan sahuta do tuhuk sude ulaonon ” ninna amanJatikkos huhut di galaki sigaret ge pe na. Lalap be ma nasida na marnonang i, mandungoi na matean i.

Sian dia ma godang na ro mandulo amaniPoluk, ai holan dongan di pesbuk do godang. Anggo i, marribu. Datung gabe dongan na tinanda bohina. Ai anggo situhukoni, tong do tu dongan sahuta laona, dang boi gabe tu dongan sa pesbuk ni amaniPoluk. Jala manang didia pe dah, dang hea dope dijouhon protokol disada-sada ulaon “tuson ma hita, dongan sa-pesbuk ni hasuhuton”. Alai molo dongan sahuta, sarupa tu hasuhuton bolon do parhundul ni i, songon nanidok ni sijolo-jolo tubu. Dalihan na tolu paopat sihal-sihal.

Jadi tung godang pe dongan di pesbuk, holan dongan marnonang do i, anggo dongan satohona, ima dongan sahuta, dongan sa arisan, dongan sabutuha, dongan sa-gareja, dongan sa karejo.

“Amang, pargual pargossi, parindahan na suksuk, parloppan na tabo, nialapan botari tinaruhon manogot, nang so hudok, nunga diboto ho. Nunga rade hami dison dongan sa-pesbuk ni hasuhuton bolon, attong baen damang ma jo gondang liat-liat i, asa hu liat-liati hami jo pesbuk ni dongan nami on….baen ma amang, jala on ma pangarittaranna…pong…pong..pong…takkullok, takkullok..tuiiiittt…tuuuooooiiitttt….., beta ma, hehe ma hita, sude dongan sa-pesbuk ni hasuhuton…”

Dia dang dohononku songoni, molo pajuppa iba nuaeng on dohot dongan, tor nidok do “Adong alamat pesbuk muna amang?”.

Ni ingot dope najolo, molo marsitandaan iba dohot dongan, sai tor binuat do pulpen, binuat bukku na gelleng sian sakku ni dompet i, tor nisurathon ma alamat nasida, dungi nomor telepon ni jabu. “Bah, ai molo adong na porlu, tor tu telepon ni kattor ma hubungi hamuna, …” ninna dongan, hape na paboahon nauang adong do teleponna di mejana.

Dungi, margatti muse jamanna.

Molo pajuppa dohot dongan, tor heppon nama di pahaluar. ” Nomor piga hapem?”
“No 42 amang, ia so i no 34B”
“Bah…ai nomor ni begua aha do i…heppon do ..”
“O…ido hape, molo ido amang, kosong ualu, kosong sada, bah kosong ma sude…”

Ima di jamanni i, dohot dakdanak na imbaru tubu mar-heppon. Nunga masa be, heppotnisasi ima sada perubahan di hajolmaon. Najolo, sada be do sahalak heppon, anggo nuaeng molo holan sada kodo nomor ni heppon manang hepponna bah didok ma iba na ketinggalan jaman.

Saonari??

Pajuppa iba tu dongan ama na matua, heppon do pinangido alai dialusi ma “Ai so masa be heppon saonari, belek-belek nama, aha do muse,…belek berri do maksudhu..” ninna

“Nion ma neh, alamat ni pesbukku….bereng ma disi” ninna huhut ma dipangolu kussi ni motorna, ala adong  sewa ojek.

Diparadaton pe, songon pitta ni gondang na digijjang i, olo nama tamba adat dalihan natolu. Ia najolo, nabinot Dalihan Na Tolu, paOpat  Sihal-sihal do. Alai, olo nama martamba muse. Dalihan Na Tolu, PaLima para-para.

Somba marhula-hula, manat mardongan tubu, elek marboru, denggan mardongan sa huta jala burju ma dongan sa pesbuk!!

5 pemikiran pada “Dalihan na 3 pa-5 Dongan sa pesbuk

  1. Iya bang…..

    Sekarang ini adat yang dilaksanakan adalah hanya karena dengan hasil ‘mendiskusikan’. Banyak adat yang di-adat-adatkan. Dan banyak NILAI adat yang dihilangkan. Adat batak dilaksanakan hanya sebagai PROSESI dan RITUALITAS belaka. Bukan begitu abang??

  2. hahaha…
    manjaha na sinurat ni amangboru on, mansai erget do nirasa…
    lam maju jaman lam muba do nang adat. ai lam godang na malo dohot na pamalomalohon 🙂
    anggo dongan sa-pesbuk i holan di awangawang do i marlakku…
    tumagon do na mardongan sahuria dohot na mardongan sahuta…

  3. Horas amang pandita..

    Imadah, soanari on do holan di awang-awang marlakkku i, alai dang binoto, atik na adong do mambaen SEMINAR taringot tu Par-DONGAN SAPESBUKAN, gabe di pamasuk tu adat BATAK. Au nda songoni do godang adat batak si saonari???…

    mauliate di kunjungan muna

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s