Ikkon hupaleleng….

Molo ni bereng jala nialaman, sai rumikkot do dihalak batak marpungu dohot keluarga di tikki tambaru sian di ari natal. Dang haru takkas binoto mulai sian taon sadia dipukka halak hita ulaon sisongon on ima parpunguan ni sude keluarga di borngin tambaru. Sai diusahahon do mulak do sude nang pangaratto asa boi rappak marpungu, martangiang huhut marsisesaan dosa di borngin tambaru i.

Suang songoni do nang di ganup-ganup huria pe di pamasa do ulaon na asing sian ari minggu nasomal. Di borngin parsirangan ni taon dipatupa huria do jamita na marsoring-soring. Ima jamita ni akka ruas. Olo do marudut muse jamita on rodi manogotna. Ganup do akka horong  dilean tikki laho pasahathon jamita. Sian horong ni natua-tua nihuta, panggomgomi ni huta manang pamarenta, sian pangaratto, sian penetua ni huria manang parhalado.

Nunga sai dihusiphon amaniHabinsaran tu donganna sittua na di lambung na i, asa unang Oppujamordong marjamita, ima songon utusan sian penetuani huria i. Ai dipillit jala digogohon amanta Pandita Resort, ima pandita na imbaru martugas i do asa OppuJamordong  marjamita di partangiangan ujung taon.

“Hamu do amang natumua, bah ninna roha hamu ma mambaen jamita ima songon utusan sian parhalado” ninna amanta Pandita tikki parsermonan.
“Bah molo tung i ninna amanta pandita, datung juaon dah…” ninna ibana.

Nian, ala na baru mangula amanta pandita on di huria i jala na poso dope, dang hea dope dibege jala di idaOppuJamordong marjamita. Alai anggo donganna parhalado nunga diboto songon dia ibana di langgatan, ido alana asa sai digogohon amaniHabinsaran asa unang OppuJamordong marjamita.

Dibotarina, dung dapot tikkina marjamita, dijouhon amanta sittua na gabe protokol ma sian langgatan, ima manjouhon sada-sada  songon naung ni utus ni horong na be. Sahat ma tikki tu parhalado, jala dijouhon ma sian langgatan i. “Pinasahat ma tikki tu amanta OppuJamordong, marjamita songon utusan sian parhalado” ninna amanta protkol.

Dang pola piga hali di jou, nunga tor nakkok ibana tu langgatan i, diboan bibelna dohot bukkuna. Dipadenggan ma kassa matana jala dipatoru saotik MIK i, ai mardomu halak na marpamatang na gelleng do ibana.

Dimulai ma jamita na on, marhite na mangenet piga-piga ayat sian bukku nabadia i. Lam leleng lam so tarbege be hatana, sai hira na marungut-ungut, dang marbatu begeon jamita, atik na aha dipandohi sian laggatan i. Sorana  sai songon na mellop-ellop. Nunga busisaon ruas, nunga marhusip-husip akka nadeba. Alai dang di anturehon OppuJamordong naung songoni namasa i. Sai tong do ditorushon ibana jamita na i.

Toppu ma dipagogo ibana soara na mandok “On ma hita jolma, nunga tung moru be anggo holong i. Dang marsianjuan be, jala dang marsihormatan be. Molo tung donganna makkatai bah, dipahohom ma jo nian…” ninna alai huhut di uduti muse pagajjang jamita on.  Hape ruas nunga tamba busisaon. Adong na mamereng jom, partikkian, ai sotung lopus do innon tonga borngin jamita on. Hape akka sipanganon na tabo nunga diparade di jabu, songon lambang loyang nang lomang.

Didok ma muse gogo sian langgatan i “Dipangosos-ososhon ma patna, dipattottoppon sipatuna tu lante i, huhut marhusip-husipi ma i, guttur hian. Dirippu huroa dang binege i. Sai marhusip-husipi be hamu, mekkel-mekkel be, dirippu hamu dang huboto i?? ikkon hupaleleng…., ikkon hupaleleng asa diboto ho debadeba, ikkon hupaleleng eah….” ninna ibana gogo sian langgatan i.

Sip ma  toppu ruas i, ai dang sangka roha na sida na dohonon ni oppuJamordong songoni.

Sip situtu. Jala molo tung madabu jarum ikkon tarbege, ima ala ni hohomna jolma i, nang pe nunga mekkel be di bagas rohana be. Andorang so i, nunga modom hian siJatolhas, sahalak ama-ama na poso. Podom-podom manuk dibangkuna, di pudi sahali. Tudia dang mondohondok akka ruas songon ibana, ai so habegean tu pudi jamita i.

Dungo ma ibana toppu jala longan ma ibana mamereng hahohomon ni ruas i sude. Dibege ibana ma didok OppuJamordong sian langgatan “ikkon hupaleleng, ikkon hupaleleng…”. Jonjong ma siJatolhas, dialusi ma oppuJamordong.

“Haru paleleng hian, manang na haru pajok ho disi saborngin on sittua, anggo au ikkon mulak hian eah….” tung mansai gogo didokkon jala disarat bukku endena, hehe ibana sian hundulanna. Gear ma macca….

2 pemikiran pada “Ikkon hupaleleng….

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s