Jeppek do pat ni gabus

Saumur do gabus dohot leleng ni jolma mangingani tano on. Dung ditoppa namarhuaso i jolma, nunga tor  ditahi jolma i do margabus. Dang pola sai pinagajjang be dison annon gabe gajjang sotarboto-boto innon, ujungna gabe marpeolan.

Jala, dihamenekon niba pe najolo, andorang sikkola, nunga sai ni ula gabus. “Sada kodo namboru lappet i diau, nion bukkusna “ningon tu partigatiga i, hape nunga pinasada, na tolu hian gabe sada. Ai dang naso tartuhor lappet  on, alai didok dongan sai tumabo na tinakko nang naginabusan on.

Dinasadari, lao ma iba mangebati akka dongan tubu namarsitaonon na dibagasan parsahiton. Tottu, satolop do dohot akka dongan pangurus di ulaon i. Ditahi ma partikkian, dibuat ma tikki na lehet. Dung sahat di jabu na tinopot, dang tarida dongan. Ni uji ditelepon jala ang ma na maralus di dalan dope.

“Masset dalan, paima ma lima minit nai” ninna sian bariba an. Ninna roha nian datung hea masset huta nami on, alai ima huroa, molo na masset bah masset ma i. Sian na sajm sahat tu na tolu jom, dang marnamullop.

Aut sura ruoani lao iba tu Jakarta mar motor, jala mulak muse sian Jakarta, ra boi ma tolu hali mulahulak ipe dang mar namullop dope dongan on. Ai aha ma salana molo didok “dang boi au bah, adong karejokku”.

Dungi dinasahali muse, molo nisukkun didia ibana, sai didok marbengkel. Bah sai lalap asal nisukk, lao marbengkel. Ujungna, ro ma dongan, ditahi ma manopot tu jabuna, ala sai didok marbengkel. Hape, nunga mar-leng dijabu.

Alai molo na adong do sibagion rupani dalan ni akka assamotan, bah haru tung na di Jakarta hian dope ibana tor hatop do alus on “ Nga di tol au bah, lima minit nai sahat nama”. Hape binoto di tol dia on, ai godang tol.

Alai dah molo hira-hira utang situhukon do asa niluluan ibana, tor toppu do alus on, sai hira naung di program hian di utohutok i. “Di Tangerang au bah, ipe hian lao, mulak jam sappulu dua borngin do innon sian an, jala olo do ra marborngin disan” ninna, asa unang dipaima.

Adong dope dongan na ulloakna. Dongan ni  dongan do nian. Dang situdu goar, annon adong ro toru-toru tu iba mandok na paroa-roahon margana. JAdi pinasip ma, manang marga beguaha pe tahoi. Digabusi bayon do tungganeboruna, niolina. Didok on do, holan dua satonga juta do gajina. Hape nabinoto holan gaji pokok ni ibana tiap bulan nga tolu juta lima ratus ribu. Tiap manjalo gaji, sai ditukkangi bayon ma slip gajina asa adong lehononnna tu inantana. Dilean ma dua satonga juta. Dang binoto boasa bahenonna songoni, urusan ni ibana ma i. Nda nunga loak??.

Na mangihut muse, unang pinukka gabus dijolo ni dakdanak. Manang na boha pe, ikkon parsiajaranna ma margabus. Ra taingot be dope boha hita mangabusi akka natua-tuatta najolo uju marsikkola hita

Ai hea do binaen rupani surat tu natua-tua i, mangido hepeng asa ditongos passi Kamus Bahasa Inggris sappulu ribu. Dungi passi Dictionary Book sappulu ribu. Passi Roll lima ribu, passi ruler lima ribu jala passi penggaris lima ribu.

Hatop do sinurathon on di harotas namarbunga I, dungi tinaruhn ma tu kattor pos. Alai molo anak boru ni gabusan najolo las do rohana. Nidok, molo dang hubege saoara mi di borngin ngali ni ari i, dang boi modom simalolong. Ia so I, molo dang huida bohimi nanggo pala sahali saminggu, dang boi mangan martabbu tolu hali. Las jala diparhatutu anak boru I do i.

Songoni nang suhutan ni dongan, dipukka ma gabus hape holan alani hagiot ni roha do, ima mar-leng. Dinasahali lao ma amanta pandita resort laho mandohoti partangiangan weik. Ala hatop do pe ari, maradi ma ibana dijabu ni sada ruasna, pinomat tahe manghara nasida asa rot u partangianan, borngin i.

“ Dang dijabu amang, bapak ni si Jatolhas, adong hian naporlu?” ninna Nanjatolhas huhut di hara tu jabu amantaPandita on.
” Daong pola na dia inang, na mamolus do nakkinon sian huta muna on, lao tu partangaingan an, ai anggo dijabu do tahe bapak ni siJatolhas, bah rappakma, ninna roha “ ninna pandita on mangalusi.

“Ai botari-botari do mulak ibana amang, attusi hamu ma boha ma ulaon siloja-loja” ninna huhut ma dilehon minum amanta pandita on. Songoni do di huta na ribur on, ai olo martamue tu jabu nunga be sai nisukkun, aha si inumon ni tamue on. Angg najolo, tor kopi manang tes manis do dilean.

Huroa, holan diboto si Jatolhas na ro amang pandita mangalului amongna, bah tor marlojong ma ibana tu jabu sadaan ima permeaman ni amanJatolhas. Las roha ni ibana, apala ro amanta pandita mangalului amongna. Jalo ma didok ibana dijabu do  amanta pandita. Dipasip amanJatolhas jala disuru ibana marmeami dialaman i.

Ai molo nga talu koa on, tor sai asing do sude olo gabe ro akka rimas. Marrara bohi jala olo ngalian mohop. Hodohan.

“Lao ma neh, unang paboa au naso dison, adong ulaon ni bapa” ninna amanJatolhas huhut dipadalan muse kartu na on. Diuduti muse na markartu I, alai si Jatolhas dan meret sian inganan na i.

“Eh, leleng nai di bahen ho lae” ninna ibana
”Ai aha na pinaimam lae” ninna amaniGorga huhut dialsik sigaret pilterna.
”Leleng hian ro, sai pina ima si jekkat ni tupang i” ninna amanJatolhas mangalusi.

“Dia do tutu lae on, sai ditahan ho do na pinaima na I” ninna dongannga na sada nai.

Dibagi muse kartu on, dungi rap serom be, huroa jago do kartu I. Ai molo nga ro bento I, tor songon na mekkel otik do idaon, ima tanda-tandana.

Ai disi dope sai jonjong si Jatolhas. Jala dibereng amana I maniop kartu joker i.

“Lao ma neh, amang bah….naeng lao hami dohot tulang mon annon, dongani ma inongmu tu partangiangan” ninna ibana tu siJatolhas.

Ujungna marlojong ma sijatolhas tu jabuna, alai dibereng dang disi be amanta pandita. Huroa nunga lao amantapandita on tu jabu partangiangan i. Dungi hobas-hobas ma nang NanJatolhas jala di togihon ma si Jatolhas asa dohot, mardomu dang adong manjaga di jabu.

Somal do molo disada-sada punguan rupani, di arisan, di partangiangan, molo ro saripe hape dang disi ama ia so i inana, sai disukkun do didia naso ro i.

“Ai didia bapam bere, boas adang dohot?” ninna amaniJatikkos
“Dijabu ni tulang si Jahirlong tulang”, ninna si Jatolhas.

Naso panagaman ni inong na, di dokkon ibana ma tu inongna “Inong, ai didok ho dang mulak kodo bapa, hape di jabu ni siJahirlong do”

“Didia bapam, ai na sala mamereng do ho, dang tahe ito, naso mulak dope lae muna sian karejo” ninna inana huhut dihidop.

“Ido inong, alai naeng lao nama ninna nasida dohot tulang si Jahirlong, satokkin nai, na adong do pinaimana”

“Ise pinaimana, bere? naeng tudia nasida, amanJahirlong pe dang ro depe tutu?” ninna amanJatikkos, namanjabui partangiangan i muse.

“Olo, na paimahon si Jekkat ni tupang di ninna bapa tulang” ninna si Jatolhas mangalusi.

Mekkel nanget amanta pandita i. Jala serom akka ruasi, huhut dipukka ulaon partangiangan i

Jadi, unang sai pinukka gabus, manang gabus begu aha pe taho I, manang  begu attuk manang begunurnur i….

Satu pemikiran pada “Jeppek do pat ni gabus

  1. hehe….ido ateh…jeppek do pat ni gabus !
    mantap nian carita on ! lucu ceritanya..!
    dan lucu…..alai ulang dipukka na margabus……! Horas

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s