TORSA

Anak Naminiahan…..

Oleh : Hendry Lbn Gaol

Leleng amanJamordong jonjong di balatuk ni jabuna, na naeng maruppak i. Mamikkirhon balos ni surat ni anakna siakkangan na jinahana ondeng. Boasa sai dohononna au ro tu Jakarta?, ua nasida ma nian ro mandulo au, molo tung masihol ibana  dohot pahoppu i,  ninna ibana di bagas rohana. Diulakkon ibana muse  sahali nai manjaha surati i, apala na partoru I didok disi “ Bapa, nunga piga hali sai maos disukkun pahompum si Jamordong, kapan oppung datang ninna, jadi naruhakku, tinggalhon ma jo ulaon mi satokkin, ro ma ho tu Jakarta, hutongos pe anon ongkosmu tu halak ito NaiPadot di Medan”.

Dua do ianakkonni OppuJamordong baoa jala sa maboru, ima nai Padot na muli tu berena kandung ima anak ni ibotona par Sitonong i. Ia  anakna nadua nari di Jakarta do mangaratto. Jala boi dohonon anak sijujurng baringin do ianakkon na i, tarlumobi ma amanJamordong, anakna sihahaan i. Molo sian arta nian, nunga boi ibana gabe sahalak pangaratto na marhasil ditano parserahan i. Tarida do tutu, molo tikki ari natal, sai manubbang do tu gareja di huta pinomat songon gatti ni tabe selamat natal, jala anggo passi bidda ni oppuJamordong datung marnahurang.

Alai, nang pe nunga magodang pahoppu panggoaran na, si Jamordong, dang hea dope OppuJamordong lao mangebati tu luat Jakarta on. Andorang tardidi pe siJamordong, tong do dang olo ibana ro tu Jakarta. Tung mansai godang do sidalian dibaen ibana. Dung marujung ma OppuJamordong boru  dang haru dihagiothon ibana lao mardalani marhuta sada. Tibu marujung ngolu niolina i, andorang metmet dope anakkon na tolu i.

“Dang hajua be on…” ninna dibagas rohana.

*   *   *

Dibalik bulanna, lao ma ibana mangebati pinopparna tu Jakarta, naeng mamereng sude pandaraman ni amanJamordong, nang songoni AmanTolop siappudanna i tarlumobi ma tahe mandulo pahompuna sian anakbuhabajuna nang sian siappudanna i. Marasing do parnasipon ni amanJamordong tu amanTolop. Nang pe rupani nunga sai diurupi amanJamordong ibana, alai sai lalap do diparhassiton ngoluna,molo pinatudos tu amanJamordong. Tikki martokko ibana di Pasar Tanahabang, hona tutung do ugasanna. Dilaon-laon ni ari, dilean do dibana sada motor angkutan, hape naso panagamanna di loddos do anak nideba ujungna mandandangi. Onma na nanidokna sibaran.

Dung sahat di Jakarta, diboan amanJamordong do ibana mamereng sude namasa di Jakarta, mangan di restoran na arga, modom di hotel. Disima didok ibana  ungngali do hape Jakarta sian  di hutana di DolokSanggul hape, riddop i, ninna ibana di roha.

“ Ai didok jolma I mohop di Jakarta, hape dia ma neh,….ngali hian do, maru ikkon marbulusan iba molo modom” ninna ibana.

Dibalik arina, diboan muse mardalani tu Ancol rodi tu Taman Safari, sude ma tahe, jala dang hatinggalan laho manuhor baju dohot sipatu na arga jala na jeges, pola do gok koper na i sude baju na imbaru.

“Papuas ma bapa namarJakarta i, on ma nanidokna Jakarta” ninna AmanJamordong dung laho mulak nasida sian paredang-edangan.

Dibodarina, dung sidung mangan nasida di sada restoran na arga di Kelapa Gading, didok oppuJamordong ma asa marsogot di jabuni amanTolop ma jo ibana manang na piga borngin andorang so mulak tu huta.

“Imadah anaha, ai dang suman molo so sian jabu ni anggim iba nanggo pola piga borngin on, jadi naruhakku tusi ma jo au marsogot”

“Nauli bapa, hutaruhon pe ho tusi, ido tutu sumanna”

“Laos sian i ma au mulak tu huta, huboan hian ma sude baju-bajukku tusan”

“Olo bapa, alai dua borngin nai ma jo dah, asa sombu sihol ni pahoppumi” ninna ManaJamordong huhut dibereng tu si Jamordong na sai tangging di abingan ni oppungna.

“Ipe taho…balissan dison iba” ninna ibana, huhut ma nasida marsuhut-suhutan di restoran i.

*   *   *

Marpikkir do amanTolop dibagas rohana, ai aha do baenon pasonakkon natua-tua on, ai nunga pola ro mangebati iba. Sai ditagi rohana mamboan tu akka siberengon di Jakarta on, alai sundat, alan di suhuthon oppuJaomordong do naung diaot-aothon ibana di klota na ribur on. Aha nama hape?, ninna iaban dibagasan rohana.

Jala ia boanaon tu MALL, nunga godang dituhor sian i jala tong do disuhuthon oppuJamordong naung lao nasisa belanja sian mol na bolon di Jakarta.

Botarina I, tikki marnonang-nonang nasida nadua manaringoti parngoluon on, diarahon amanTolop ma ibana lao minum tuak na tonggi-tonggi paet buatan ni paberik tu sada kode tuak, diboto amanTolopan do attar boi dope oppuJamordong minum tuak.

“Tu kode an ma hita bapa minum bir, mangaso-mangaso ma jo satokkin, sai dijabu bapa, annon bosan,…”

“Adong kode tuak di kota on??

“Adong bapa, jala mambege-bege ende batak”

“Ima tutu, atik boha pajuppa dohot artis batak  anon disi…” ninna oppuJamordong

Diboan ma oppuJamordong tusada kape batak di Jakarta Timur, jala minum bir ma nasida nadua. Tohodo, molo dikape on sai pittor ro do pelayan ni kapei, anak boru mandongani jala pittor huddul di labbung ni oppuJamordong. Massiberengan nasida nadua, jala diboto amanTolop do nadiorhana i. Gabe paula so diboto ibana.

“Songoni do bapa dison, asa adong mandoingani hita minum,…” ninna nasida.

Tabo ma attong nasida nadua na minum bir i, jala sai hapit ma anak boru on dilabbung ni  oppuJamordong, sipata songon na dihaol otik sipata sai dibereng, jala mogap ma pakkilalaana manganggu uap na hussus napinakke ni anak boru i.

“Dagah tutu, angur ni anak boru…” ninna ibana dibagas rohana. Ditogu anak boru on ma ibana marjoget tu jolo, jala tong nama paula so diboto amanTolop do namasa i.

*   *   *

Dimanogotna i….

Renges dope oppuJamordong, ai nunga tahuak manuk nasida na mulak sian lapo parendean i. Didungoi ma ibana laho martugo. Disuru ma anakna, asa didungoi oppungna sian bilut.

“Bangunin oppung nak…” ninna AmanTolop tu si Tolop

“Iya pa, masihn tidur nya oppung…” ninna mangalusi, bohama namarumur opat taon, datung marroha dope I, alai ala disuru amongna, tor marlojong tu biluti, huhut dihutur-hutur oppung na i.

“Iya oppung, sudah bangun kau, oppung??” ninna Oppu Jamordong

“Ngilut dagingku sude bah…” ninna ibana dung di ida amanTolop mangopi-mangopi di labasan i. Didulo tu dapur, di ida dang disi parumaenna, ai nunga lao karejo.

“Mura do ubat ni I bapa, jolo martugo ma jo bapa..” ninna amanTolop

“Imadah, songon naso lakku…”

“Attong martapian ma jo, asa lao hita tu parkusut an, ai namasuk angin do i, naso somal bapa marase nang markipas angin” ninna amanTolop muse patorakkon.

“Ima tutu bah,…sotung so boi iba mulak marsogot…” ninna oppuJamorodong mangalusi.

Diboan ma muse oppuJamordong tu pijat repleksi na adong di kota i, jala tutu dah, asing do molo tukang kusut na dison. Ai dirippu ibana do songon nadi hutana, ai nunga namatua namakkusut, ima oppunisiParulahan boru. Holan i do na malo makkusut di hutana, jala molo ngilut dagingna tor sai dijou do oppunisiParulahan on. Namariboto dope nian nasida, jala nunga tarbarita anggo sahit loja-loja, ngilut ni daging do, sahali makkusut, tor mago do sude i.

Hape asing do molo tukang kusut na di jakarta on, akka anak boru na uli jala na jeges do, huhut muse labbok-labbok bohina dohot parekkelna. “Urut ya pa, buka bajunya, semuanya deh.,…” ninna, huhut dilean lappin, ima kain sarung. Bah, naruhana, ai hahuaonna nama naeng? naruhana muse,  alai diulahon oppuJamordong ma i, ai pamotoanna songoni do namasa. Tabo ma ibana namangurut i dah, sipata do mallobok taroktokna molo apala margeser tukang kusut i, didok manukkap, dungi didok singgalak muse.

“Omna asa ibana, tabo nai namarJakarta on..” ninna ibana dirohana. Botul do anak naminiahan ho amaniTolop bah, diboto hodo pasonakkon natua-tuam. Anggo baju na imbaru i, sipatu na arga i, sude na i dang boanon mate, sonang ni roha i do, NINNA IBANA.

*      *      *

Marroan be do hombar jabuna dung diboto naung mulak oppuJamordong sian Jakarta, songoni do namasa di hutai, massisukkunan be do. Atik pajuppa dohot dongan sahuta di Jakarta.

“Ai pajuppa do hamu dohot berem??…jonok do nasida dohot tulang naposo siappudan ni” ninna oppuTalhun apala naujjonok sian hombar jabu i, manukkun ala di Jakarta do tong tolu anakna.

“Sabas diahap ho na mangaratto i bah, oppu ni si Jamordong” ninna OppuTalut muse sian uluan an.

“Martua ho, anak naminiahan pinopparmu” ninna amaniTagas, naupposona.

“Sonang ho dibaen amanJamordong i ateh amangboru” ninna OppuHumirlap, diboto nasida pasti amanJamordong do pasonangkon amongna i, ala ibana do siparadongan

“Imadah lae, holan amanTolop on do napasonang rohakku”

“Boasa??”

“Toe ma nian, anggo amanJamordong do, holan napaloja-lojahon badan do i, nion do siappudankon, amanTolop, anggoi anak ni amana ma i, anak na miniahan, sai tor diboto do nadirohai,…” ninna huhut mekkel supping ibana molo di ingot nadiparruderudean i.

1 thought on “Anak Naminiahan…..”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s