Suhutan di ujung ni taon

Tuhor ni bidda*

Dimanogot na i, andorang so hos ari, nunga marpungu nasida di lapo ni amani Pardomuan. Dungkon diparade parlapo i, kopi na las tu oppung ni si Hosea doli, tor tibu do disirup saottik songon na mandai. Nian nunga diboto parlapo i sude hasomalan nasida, alai tutu dang sala, atik boha hurang kopi, hurang gula dohot akka na asing.

Massai tabo do begeon nonang nasida di lapo i. Niantusan ma nuaeng akka nonang ni ama-ama, marragmam do dihatai. Sude do luat portibi on sian desa na ualu ditaringoti, nata pe so hea diida nasida.

“Imadah, anggo biddatta minggu naro nungnga be diparade amani Habissaran, jadi molo boi nian asa sude hita anggota ni parbidda i, palunasson biddana” ninna oppu Jarikkot, huroa ibana do bendahara ni punguan  parbidaan i.

Sai dipamasa nasida do marbidda jagal horbo, pinahan, lobbu, diganup bulan sappulu dua, ima di mingggu patoluhon. Marbidda ma nasida, mambagi jagal asa adong loppan di borngint ari natal. Adong muse do na dua hali, dipatupa muse di ujung ni taon.

Nunga di papungu-pungu oppung ni si Hosea doli, rap dohot akka donganna hepeng bidda i, mulai sian bulan sada. Ganup bulan ma nasida mangalean setoran tu bendahara. Ai dang songon di kota, sadihari boi mangallang jagal. Molo di hutaon, bah ikkon masa ma natal, ia so i adong na maresta di hutai, ipe asa nidai jagal.

“Sai abbal ma jo tahe nonang, anggo ho nian oppung ni si Hosea, dang pola di pikkirhon ho boha borat ni bidda i, sahali mangalean pe boi do bahenonmu, ai mardomu, amaniHoesa, sai manongosi do ganup natal” ninna oppuJatolhas.

“Imadah lae, oppu ni si jatolhas, nunga dua taon dang nanggo manongos nasida, amani Hosea hian do nian na sai manongos, hape anggo saulakon dang adong dope” ninna oppung ni si Hoesa huhut disirup muse kopi na mohop i.

“Ai mangapian do nian iba di oppuJamordong an, ganup bulan do akka gelleng nasida manongosi, maru so sudasa” ninna sahalak ama-ama na asing muse sian sugut-sugut an.

“Toe ma na marsatur on, sai ditaringoti hamu tongosan” ninna oppuNatalia huhut dibuat satur naung lapukon sian gijjang ni siteleng ni parlapo i, ai somal disido satur i molo nga sidung dipakke nasida. Huhut diurehin anak ni satur i, jala di pajonok tu oppuJamordong.

Ra, sude na salapo i  mamboto na so adong anak na laho mangaratto, nata pe rupani nunga sude anak nana marhasohotan. Ai ollat ni na holang huta do maringanan, anak na na tolu on, jadi datung adong harappononna ro par kattor pos manaruhon wessel tu jabuna. Ido alana dang haru di harikkothon ibana manaringoti tongosan ni dakdanak.

“Ollobolokni, haru iba, dang adong  na mangaratto anak niba, bah di huta on do sude, datung hea iba holsoan anggo tu bidda do, toe ma neh, satur on ma jo” ninna mangaduti.

” Olo ma lae, ibban na godang i dope pessiun muna i” ninna oppuJatolhas muse

Lalap ma nasida manaringoti akka sitaringotan, mambaen akka parekkelan. Ai sahat do dihatai nasida taringot tu plikada na naeng patupaonna di taon naro. Massibaen nabinoto na be nasida taringot tu nanaeng makkobasi ( balon bupati) di luat i.

“Ido dah, anggo dang iba mamillit dongan tubu on, bah ise be?” ninna sahalak ama sian labbung pittu, huora adong do dongantubuna na gabe parhobas di luat i.

* * *

Dung hos ari, marmulakan be ma nasida sada-sada tu jabuna, laho manguduti ulaonna be. Songoni do nang oppuni si Hosea doli, diingot ibana adong dope  sibaboon haumana. Ninna rohana, ikkon pasidungonna ma saonari. Ai minggu naro marpestai nama jolma, jala dang toho molo halak nunga pamesta hape iba mangula dope, ninna ibana dibagasa rohana.

Tutu, tohodo nian na nidok ni akka donganna nakkinon, bah dang nanggo manjalo wessel ibana. Tardok ma jo rupani anggo olat ni manggarar bidda i adong dope hepengna, alai na bohado tutu parrohaon ni akka gellengna i.

Dihilala ibana, lam leleng, lam holang do akka ianakkonna i sian ibana. Ala mardomu dao be do mangaratto, bah holan sahali sataon nama boi mulak. adong si opat hali sataon songon par-Kalimantan. Ipe, ia dung taon na parpudi on, dang hea be nasida rappak martabbaru dihuta. Massibaen sidalianna be do akka ianakkonna, dang boi mulak.

Bohama tutu marnatal molo holan padua-dua do nasida dohot oppung ni si hoesa boru. Da, langa-langaan ma nasida?.

Hordit rohana, makkuling ma teteleponna.

Di ida ibana ma na amani hosea do martelepon sian jakarta. ” Bah, martelepon bayon, na paboahon naeng mulak do nasida? manang na adong alana na asing?” ninna dibagas rohana andorang so dialusi telepon i. Harop rohana songoni, jala minar bohina satokkin i

Ujung na di alusi ibana ma telepon ni amani Hosea sian bariba an, marsisukkunan barita nasida.

“Hipas do ho anggi? boha si Hoesa?” ninna oppung ni si Hoesa manukkun. Somal do dijou ibana amani Hosea dohot anggia, mulai sian na menek.

“Hipas do bapa, pahoppum pe hipass do, nunga kalas tolu ibana” ninna mangalusi, dungi makkatahatai ma nasida.Pasobbu sihol nang pe holan  soara.

“Dang boi hape mulak hamu anggi? nunga masihol iba dah, hape anggimpe amani Harapan, dang boi mulak sian Kalimantan, bah ise be dongan nami martabbaru di jabu on? ai ibotom tu jabu ni simatuana do ninna” ninna oppung ni si Hosea.

“Imadah bapa, anggo boi nian partikkian on, ai adong karejo di kattor, jadi dang adong tikki laho mulak” ninna sian bariba an.

“Toe ma molo boti, asal ma sehat-sehat hita on sude” ninna oppu ni si Hosea songon na lungun rohana disi dibege dang mulak anakna i.

Dungi di uduti ma muse makkatahatai. Alai tutu, dang nanggo ditaringoti amaniHosea nanggo pasi baju tabbaru, nanggo sikkat ni roti tabbaru, nanggo passi bidda. Dang nanggo diarbishon. Lao do turohani oppu ni si Hoesa ” Bah…nungga dang mulak, ai dang naggo tongoshononna nian songon passi roti nami??”.

Alai dipasip. Huhut sai makkatahatai nasida.

“Didia inang, asa makkatai jo au” ninna amani Hosea.

“Lao do inongmu”
“Tudia?”
“Tu jabu ni tulangman, tulang mu tokke salak an”
“Marahua inong tusi?”
“Imadah anggia, naeng manggadis haumatta nadi saba sosor i ninna inangmu tu tulang mi”
“Boasa gadison bapa? ai tading-tadingan ni da oppung do i?”
“Imadah, Ai anggo so nigadis i, aha baenon nanggo manggarar biddanami tabbaru on, ihut ni i muse molo ro tamue manang dongan sa panguan, par-arikamis, nang koor ama, tu jabu on, dang nanggo baenon kopina? saonari tabbaru, agiat pala sakaleng roti tinuhor dah, tadda na dohot iba martabbaru…” ninna oppu ni si Hosea mangalusi.

Tarhatong ma amani Hosea, bah..bah…dang nanggo tinaringotan hape passi bidda sanakkaning, naruhana. Dungi didok ibana ma, “Eahi ma inang i bapa, unang pola di jual saba i, ai manongos do parumaenmu nantoari,  na hut paboahon i do au,  sahat nama ra i,..” ninna amani hosea.

Toho manang na so toho manongos parumaen ni  oppu ni si Hosea, dang haru rikkot i, alai nga lupa ibana……

cikarang
8 desember 2009
selamat advent.

 Bidda= jagal

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s