TORSA

Di Biakku….

Sukkun ma tulang L Naibaho manang naung hea di ida biang i, ai turi-turianna do on, nda holan na manuhuthon do au?. Jadi molo naeng takkas botoon muna songon dia parbalgani biang i, rappak manukkun ma hita tu nasida, beta ma.

Ai nda,  sahalak ina na ringgas do NaiHasomalan ro tu ulaon adat?. Dang piga songon inanta on tahe, ai ganup adong undangan sai tor parsidohot do ibana. “Holong do na sinuan, ia tung marulaon iba muse, nda tama ma nian godang akka pamili mangolophon ulaon i?” ninna ibana ala disukkun sahalak ina na dilambungna.

Ido tutu, ai holong mangalap holong no na binaen, datung hea ribur pesta anggo so hea tarida iba di ulaon ni halak. Jala, ra sude do halak, sukkun-sukkun, ai ise ulaning i. Alai molo na ringgas do iba mandohoti ulaon ni akka pamili, bah ipe dah, sai songon na tarutang do dongan molo so ro tu pesta niba.

Sai tor takkas do taddaon NaiHasomalan on. Molo nunga adong inanta pasitabolan na lehet, parsanggul na metmet jala parbadak na hapal, huhut tas na bolon sai gattung di tanganna, imana ma i. Sai mangapian do akka donganna ina marnidasa, ai ganup pesta sai margatti-gatti do paheanna. Uli, jala na arga-arga muse.

Dukkon guling ari, lao martua mangan nama marpesta i, huddul do NaiHasomalan dohot akka donganna sarobbongan. Ra nga taboto nuaeng, bohama akka dongan ina on, ai tung na godang do akka sihataan ni on. Tagan so martangiang dope, nunga sai marsisedduk indahan tu pingganna be.

“Imadah, eda, ribur ni pesta on ningondah, tanda do parale-ale oppuni si Humirlop on, ida ma neh, sai marroan be dope akka jolma on” ninna NanDomu apa sabarendeng hundulan dohot NaiHasomalan.

“Bah, ido dah eda, aha na sinuan, ido tubu, nang iba songoni do” ninna mangalusi.

Dung sidung tangaing, marloppan be ma nasida, nang nai Hasomalan dohot akka donganna. Aha so male tahe, ai di ulaon ni halak batak olo do sadari manikting, mulai sina jam ualau manogot sahat rodi jam onom potang ari.

Dung sippul mangan, pittor hatop do dipamasuki NaiHasomalan akka indahan, dekke, jagal na adong di jolo nasida tu palastik. Anggo sian sitelan dohot paheanna, nang akka ugasan na adong di ibana, ra, dang patut baenonna songoni. Ai sadia ma argani indahan na binoanna i.

Alai dah, mangauhon tu rohana be do akka donganna. Diingot be do na jolo tikki di huta, hasomalan do molo lao ina tu pesta, sai diboan do songon siulak ni tandokna. Disarihon do na dijabu, anankkonna. Jadi datung boha nidok, molo tung adong ina mamboan sipanganon sian pesta. Jala ibape, adoppon roha, sai tinomu do dainang na jolo molo nga mulak sian pesta, ai mangallang jagal nama.

“Di biakku bah, di jabu” ninna NaiHasomalan, ala dung dibuat sude akka na adong disi dang disarihon donganna.

“Ai sari do ho di biang mi ateh eda” ninna NanJujur sian bariba meja.
“Ido, holan sasada i do biakku”

Lalap ma nasida marsuhutan muse andorang so dapot tikkina pasahat ulos nang mangumpahi hasuhuton.

Sai didok NaiHasomalan do “di biakku” ganup nasida rap di ulaon. Akkup ni, gabe manginongi do huroa dinasida akka donganna, ai tung biang beguaha naeng biang ni NaiHasomalan on. Marnida hasarion ni ibana di biang, bah dang ise tutu naso sukkun-sukkun. Ganup lao tu arisan, tu pesta, sai tor dipamasuk do sapalastik, indahan, jagal nang na asing, jala didok “Di biakku…”

Disada tikki, diparpestaan, rappak udurma mulak naiHasomalan dohot NaiJarikkot. Mardomu ala udan bolas na gogo, jala sadalanan do anggo jabu nasida. “Rappak mulak ma hita eda, ai udan do neh” ninna nai Jarikkot. Hape di rohana asing do, asa dibereng do biang ni naiHasomalan i.

“Ima tutu eda, ai mamboan mobil do muse au, beta ma, di jabu ma ta uduti nonang ta on” ninna NaiHasomalan.

Dung sahat nasida di jabu ni NaiHasomalan, lulu-lulu do rohani NaiJarikkot di biang nanidokna i. Bah, didia do naeng biang i, ai ganup marpesta, sai manarihon biang, alai nanggo soarana dang habegean.

Ditomu-tomu amaniHasomalan do nasida, jala huhut ma di dijalang NaiJarikkot. huhut di togihon masuk tu jabu.

“Nga mangan ho, papi?” ninna NaiHasomalan, huroa mar papi-mami do anggo NaiHasomalan di jabu.
“Dang dope bah, ai soadong sipanganon, jala ipe mulak iba dah….adong diboan ho indahan?” ninna amani Hasomalan

“Adong  do, di tas hi, huboan do” ninna mangalusi huhut di pahaluar sian tasna, jala diboan tu dapur.

Ro ma tu rohani ni naiJarikkot, “Patut do attong, na burju do biang ni inanta on, biang na boi donganon modom…”.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s