TORSA

Tangiang Gossap

http://www.latteung.wordpress.com

Ise mandok na mura-mura martangiang i?. Molo ni ingot najolo, nunga bajar-bajar / remaja iba, alai anggo tangiang holan tangiang si opat hata i do tangiang mangan. Sahat tu saonari, olo do sipata tangiang on nidokkon asa humatop. ” Ale Tuhan Pasupasuma sipanganonon, amen”. Lima hata dohot amen-na. Ia so i, ” met-met au on” ujungna marmetmet ma torus.

Songoni nang amaniGokholong. Ra, dang sangka roha ni donganna sa punguan ama, naso hea dope ibana mambaen tangiang di jolo ni loloan natorop. Pamotoan ni halak, molo nga masuk tu punguan ama, manang na bohape dah, nda nga haparbaga mambaen tangiang?.

Di gorahon si baen acara ma asa ibana martangiang, ima tangiang pangondianon. Diranap tu siamun, tuhambirang, ba sude donganna unduk, hohom. Ia didok, unang ma au, songon na bakkol rohana mandoksa. Dang dialusi, sip. Mardalan ma ulaon i, sian na marende pamuhai sahat rodi na marjamita.

Dipatupa punguan ama do ulaon martabbaru hatiha i. Jala marpungu do sude punguan parende koor ama dohot ripena di jabu ni katua, ima amanTure.

Tikki marjamita dope amanta pandita, nunga sai busisaon amaniGokholong di hundulanna. Marhite partording ni ulaon, sippul jamita annon, marende saayat dungi martangiang ma, ima tangiang pangondianon. Manetek ma hodokna, bolon-bolon, alai dang alani mohop ni ari. Alani tangiang on do.

Ditobbis ma nanget amanSumurung.

“Lae, hamu ma jo gattikku bah, batuhon au”
“Hamuma, apala hamu nakkinon didok katua i, ” ninna, tong marhusip nasida nadua di sugut-sugut i.
“Nga pailahon on”
“Boasa pailahon”
“So huboto martangiang, olo mate ditonga dalan innon tangiang i, suttol”. Di ingot ibana, hea martangiang di loloan na torop. Holan didok amen, mekkel jolma i mambege tangiang i. Mandok “ale Tuhan …..”, didok ibana “Ale, tulang….” Dungi muse hea didok” Ale tuhan, ramoti hamu, naeng mulak hami tu hitaan…..” ninna. Tikki lao ibana mangebati pamilina tu Jakarta.

“Hamu nian, geok nai..” ninna amanSumurung.
“Olo, lae, pangidoanhu, unang paila hamu au”
“Bah,..nga gabe tu roha, situtu do…?”
“Olo lae”
“Toe ma molo buti, alai marupa do na loja dah..”
“Eh..lae on nian”
“Olo, dia ma gossapan i”
“Bah, ai basa gabe tusi??”
“Ba unang, molo dang olo hamu, ba baen hamu ma tangiang i, dang na mamaksa au” ninna huhut serom otik, sipata dibereng tu amanta Pandita na marjamita i.

Naeng-naeng sidung nama jamita on, dibege ma dijahahon amanta pandita, ima panimpuli ni jamita, ba tamba ma hodok ni amaniGokholong. Maup!, narohana. Dibereng tusiamun, ba nunga martangiang pamuhai, nakkinon, dang toho be molo amaniMarolop muse mambaen tangiang on, ai ibana do tangiang pamuhai. Holan amaniSumurung nama na boi.

“Boha do lae, tangiang nama dah..”
“Olo, situtu do on, diama gossapan i”

Ai nunga ubborat namartangiang sian arga ni gossapan i, gabe dang tarjuasa be ujungna didadap amaniGokholong ma sakku ni jasna. “Tolupulu nama lae, boha do i?”

“Satonga tangiang…”
“Unang jo gait lae, eah…nga amen neh” ninna amaniGokholong, ala dibege hata amen didok pandita. Jala ditorushon panditai tangiang songon paonimpuli ni jamita i.
“Hamuma dah, molo dang adong gossapan i, ba baen hamuma tangiang i”
“Dang boi marsiurupan be hape” ninna amaniGokholong, huhut dilean gossapan i.
“Dang sipaulak dah” ninna amanSumurung.

Dijouhon protokolma sian jolo.

“Tangiang pangondianon sian sahalak anggota”
Ba, sude do attong mamereng tu amaniGokholong, jala mangarade lao martangiang, diloppit be tanganna.

Tor jonjong ma amanSumurung, didok ma “Martangiang ma hita, ale amanami…….” longang jala sukkun-sukkun dongan ama, ai boasa dang amaniGokholong sibaen tangiang. Alai, ala nunga dihojor amanSumurung na martangiang i, ba dang adong na manukkun be. Dibagas rohana be ma disukkun.

“…..Amanami, Debata nami, hurang malo do hami mangido doppak ho, akkup ni i, ajari hami. Ajari hami martangiang, mangido, nang mamuji goarmu marhite tangiang nami. Molo tung pe adong na hurang malo martangiang, suru ma tondi porbadia mi tu ganup hami, lao mangajari hami……..dst, amen”

Holan dibege amanGokholong isi ni tangiang i, tartoppuk addora ma ibana. “Bah, na tu au nama tangiang on, ai ikkon marhite tangiang do pailaon ni bayon au?, nga binayar gossap, hape tong pailahon” ninna di bags rohana.

Dukkon didok amaniSumurng amen, bah pittor toppu ma didok amaniGokholong. “Botul-botul do na pailahon ho bah, nga binayar gossap hape ikkon tiktikkononmu tu jolma torop naso binoto martangiang”.
“Bah, ai tangiang tu Debata do i, datung tu ho, anungi manangiakkon akka na asing muse”
“Olo ma, paulak i hepeng i, nga maila iba” ninna

Ujung na gabe habotoan ma tu dongan ama na asing, na binayar gossap do tangiang i. Adong ma dongan na asing mandok “Toe ma lae, paulak dua pulu ribu, tolu pulu ma tangiang mi..” huhut mekkel nasida. Alai anggo amaniGokholong, dang boi mekkel be.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s