TORSA

alani tuak…..

Nian nunga salpu tabbaru. Nunga pola dua ari naung lewat, alai anggo di hutattata, samiggu  tong dope didok tabbaru. Molo apala pajuppa dialamani, sai marsijalangan be dope, huhut didok “Selamat Tabbaru”. Songoni do nang amaniJamordong. Di tahi ibana ma mangarahon amaniNatalia martabbaru tu jabu ni Kepala Sekola, Oppu ni Sihumuttal. Ai, songoni tutu dengganna, ba sai na umposo do nian mangebati akka na matua. Tarlumobi, uluan nasida do diparsikkolaan Oppu ni Sihumuttal on.

“Tu jabu ni amanta kapala sekolah ma jo hita martabbaru lae, sahuta do hita, jala hurang tabo molo dang lao hita tusi” ninna amanJamordong, tikki pajuppa nasida dipassur paridian.
“Olo tutu bah lae, mardomu libur parsikkola, ai molo jinalang di kattor minggu na ro, nunga dang tabbaru be i” ninna amaniNatalia mangolophon.

Borhat ma nasida nadua, tu jabu ni Kapala Sekola lao majjalang, huhut pasahathon tabe selamat tabbaru. Dang pola marparbue nitangan nasida mandapothon Oppu ni SiHumuttal, somalna songoni do molo ama lao martabbaru.

Dukkon sahat, di ida nasida tung mansai ribur do anggo bagas ni Oppu ni SiHumuttal, dibereng adong piga-piga motor ni par Jakarta di alaman i. “Bah, ai namarmulakan be do naeng akka anakkon ni Oppu Humuttal?”,  ninna amanJamorodong.

“Dang adong huida di gareja, natabbaru i, tamue na do i” ninna amaniNatalia mangalusi.

Huroa, na ro do tamue ni Oppu ni siHumuttal,sian Jakarta, tolu halak murid nasida na jolo.  Ise na so la tutu roha, molo di ingot murid niba dope ro tujabu nanggo pala manjjalang. Taboto ma nuaeng, molo pala ro tamue sian Jakarta, ba diboan nasida do akka si inumon na angur i.  Ia so bir, manang minuman na asing.

“Bah, ai jouon gaja do nian hamu na dua, ipe naeng tinelepon, hape nga marnatappak hamu nadua” ninna Oppu Humuttal, ala dibereng haroro ni nasida nadua.
“Ido, Tulang, apa ise tamuetta on?” ninna amanJamordong, huhut di jalang sada-sada.
“Dang di ingot jala di tanda  ho be nasida??” ninna OppunisiHumuttal manukkun, huhut ma dipatandahon sada-sada tamue on.

Las situtu roha nasida, ala boi pajuppa dohot guruna. Suang songoni do nang amanjamordong, tung las rohana, ala nunga hape godang na hasea akka murid na hian. Dungi di uduti ma suhutan, manukkun kabar nang akka na asing.

“Tabba poso do bapa” ninna Si Holong, sahalak tamuae i, tu amaniNatalia.
“Dia do kedan, tabba poso nimmu, uban nga marsap” ninna mangalusi huhut mekkel be.

Tabo ma nasida na markobbur i,  sahat borngin.

Nga songon na manginona bir dohot minuman luar negeri i. Santik anggo pakkilalaan ni amanJamordong. Tabo na mekkel i, jala mardalan mudar i. Hape anggo dimula na i, adong dope rem ni pakkataion,  saonari moru otik!. Sipata ma Oppuni si Humuttal mambaen siparekkelan, dungi martata ma nasida mekkel.

Di dilo amanNatalia ma jomna, nunga jam 9 borngin. Bah, nga bagas borngin, hape lam santik pakkilalaan, boha namaon?, ninna dibagas rohana.

“Hobas ma hita lae ba, nga botari, ba tamuetta pe, tottu adong dope ulaon nasida” amanJamorodng ala dibereng amaniNatalia nunga busisaon.
“Olo tutu lae” ninna amaniNatalia mangalusi.

“Gira tudia i, so habis dope na binoan ni akka anakta on” ninna OppuHumuttal maniopi. Dukkon marsijalangan muse, mulak ma nasida nadua, nang tamue na sian Jakarta i.

Alai ditongan dalan, di husiphon amani Natalia ma sian bossengan ni kareta i. “Ai hu arahon pe lae mulak, asa tu lapo an do hita, songon na tanggung na minum on”
“Imadah, ai au pe nga gabe gattung, dang tabo godang minum di jabu ni kapalai puang, jadi boha lae??” ninna manukkun.

“Beta ma lae, tu lapoan ma ta uduti, nga songon na santik on” ninna amaniNatalia.

Tutu ma nian, ditorushon nasida na dua ma na minum i. Nga rarat be hata, jala holan na mekkel nama di ula nasida na dua. Sipata sappe naeng ro iluna, alani na mekkel i.

Dukkon  lam bagas borngin, martahi mulak ma nasida. “Mulak ma hita laekku, nga borngin on, sotung di sordak parlapo on hita” ninna amanJamordong.
“Hamu nian ito, unang pagait hu” ninna oppuPardomuan boru sian balik ni siteleng i.
“Beta lae,…tudia lae, tu si au, tusi au, tu si ma lae ateh…aha urroa” ninna amaniNatalia mangalusi. Huhut mekkel muse.
“Parlapo, mulak ma hami, marsogot ma minuman on, boi do??” ninna amanJamordong, alai didadap sakukku ni bajuna.

“Olo ito, dang pola bohai” ninna oppuPardomuan boru, ai ditanda do nasida nadua.
“Mauliate nabboru, gajjang ma umurmu, ala dipaloas ho hami marutang” ninna amanJamordong.

“Olo ito,…manat-manat hamu dah” ninna OppuPardomuan boru muse, ala di ida dang tikkos be mardalan naduai.

Dungi diengkol amaniNatalia ma kareta on, sahali, dua hali, sappe tu sappulu hali. Alai dang mangolu.
“Bah, nga dohot bayon mangarsahi, ala naso dohot do minum?” ninna marungut-ungut. Huhut di hutur kareta i.

Margalusak miak i di bagasan. “Godang do kodo miak” ninna ibana muse.

“Bereng hamu jo gusi na i, aha do goarna, busi do, gusi do….” ninna amanJamrodong. Huhut ma di pahuddul di alaman i, ai nunga tung mirdong diahap ibana.

“Nga dohot ho mangarsahi hasian, boasa arsahanmu au…” ninna amaniNatalia tu karetana i.

“Nga sae be i laekku, tadalani ma, ta ojjar-ojarma, beta ma” ninna amanJamordong.
“Imatutu, beta ma lae, molo tung aha innon, tabatak di tuat-tuatan an”.

AmanNatalia ma manogu jala amanJamrodong ma manorong sian pudi. Huhut ma nasida marsuhutan didalan i, jala rap mekkel. Sipata idaon, tu siamun do nasida, dungi tu ambirang muse, bohama golap.

Dipataru amaniNatalia do amanJamordong sahat tu jabuna. Jala dung sahat nasida di alaman ni amanJamordong, parmisi ma amaniNatalia lao mulak.

“Dang pola maradi be au laekku, nga bagas borngin”
“Olo lae, mauliate ma, nga dipataru hamu au, alai dang pataru onku hamu?”
“Daong lae, masipataruan hita innon, gabe sai hira na mabuk hita ” ninna amaniNatalia mangalusi.
“Attong nauli lae, manat-manat hamu lae dah”
“Olo lae,….”

Dungi ditou-togu amaniNatalia ma muse kareta na on, sahat tu jabu. Nian, nunga tung na rittik situtu be. Molo sian lapo ni OppuPardomuan, sada do tu siamun, sada tu hambirang do. Alai ikkon dipataru ninna.

“Ollo bolokna i, nga loja iba, alani kareta on ma i, mangagol on” ninna makkatai sahalakna. Dukkon sahat di jabu,  didadap ma sakku ni saloarna, lao mambuat kussi ni pittu ni alaman i. Diboto ibana, dipasada do kussi ni pittu i dohot kussi ni kareta i. Dibuat ma kussi sian sakkuna, dibukka pittu.
“Bah…kussi ni kareta….ai naso hupasuk do hape kussina, patut do dang boi engkolon…..” ninna marbete-bete.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s