TORSA

Sitarupon Namarrara

Amani Harapan Marbun
http://www.latteung.wordpress.com

Marmassam do tahe anggo pangalaho ni jolma soanari, sadalan dohot pangalaho, maragam gaya, leak, ni pahean dohot akka siadongonna na asing na pinakke ni jolma.  Dang adong halak na olo tading di gaya. Jala dinadeba sada hailaan do molo isara ni pahean, dipakke naung tinggal jaman. Arga manang naso arga, dang dipikkiri jolma i, asal ma boi mengikuti gaya, molo dihata na asing didok ma i trend. Ai sude do adong tikkina. Molo gaya ni obut manang sitarapon on pe adong do tikkina.

Masa do najolo, ditikkina i markariting. Alai masa do tong margaya gonjes. Tarlumobi ma tahe tu obut manang sitarupon ni dongan boru-boru. Marmassam ma di ula jolma i. Pahean pe tong do songoni, olo do binereng ganup taon margatti-gatti modelna. Molo dang rade manang olo hita mangihutohon gaya ni pahean na marmassam-massam on, olo gabe hita diparekkeli jolma. Didok na hatinggalan.

Nang pe halak parhuta-huta naiAdona, tong do di hiuthon ibana namasa tarlumobi tu pahean ni akka dongan ina. Dibereng do aha namasa marhite namanonton telepisi. Jala sai di sangahanon do mangihuthon akka naboi siihuthonon ni ibana, olat ni na tarbahen sihumisikna. Dang pola longang roha molo di hutai i disi, ai boi dohonon ibana ma ina na marpikkiran “up to date” taringot tu gaya manang trend. Molo na asing, jolo satonga taon pe masa gaya ni sanggul manang baju, ipe asa di tuhor songoni, alai naiAdona tor hatop do i ihuthon ibana.

Dang tiala iba, ai najolo, andorang so marhamulian ibana tu amaniAdona, leleng do ibana mangaranto tu kota na balga.

Di tikkki di tonahon boruna siakkangan na di Jakarta ibana asa ro mamereng pahompuna, siala naeng “prajabatana” boruna on sian kantorna, tung mansai las ma tutu rohana, ai berengonna nama hape ribur ni kota Jakarta. Mardalani, mamereng-mereng tu mall, mangida akka pakkean na uli, kebaya na imbaru, sipatu dohot solop na masa nuaeng. Ima sai di pikkiri ibana. Nunga leleng ibana dang marnida mall, ai saleleng on, holan kalas ni ONAN do na jotjot di ardangi ibana, ia so i, molo adong ulaon pesta tu medan, boi ma ibana mardalani tu Medan Mall mang pasar Sambu na godang partiga pahean.

* * *
Dang ha surathon be tahe boha las ni rohani ni boruna si Rumondang, marnida haroro ni inongna di arian i. Hatop do sahat inana tu jabuna, ai molo dijaman saonari on, holan masuk tu pesawat terbang, hundul satokkin, holan naeng mondohondok dope, bah…nunga sahat be tu Jakarta.

“Sehat do ho omak, sai tamba poso do ho omak, nunga sarupa ne tuatta …” ninna si Rumondang, tutu ala di bereng ibana songon na mulak poso inana i.

“Ah..ho nian boru….nga matua daging, nunga marpahoppu….”

Huhut ma nasida masihaolan pasombu sihol ni roha, rap mekkel, rap martata. Tung sombu ma sihol ni rohana mamereng boruna dohot pahompuna na samiltik na marumur  sa taon dope. Sai mastokkin ma di umma pahoppuna on pataridahon las ni rohana. Alai anggo amaniUccok dang di jabu di parroro ni naiAdona, ala sian nassogot nunga lao mar kantor ibana.

Lalap ma tutu nasida marnonang, na marinong-marboru, ai molo berengon sangombas sai hira na martinodohon do nasida, sarupa partimbona, sarupa parmokmokna. Tottu masuk akkal do i, ia naiUccok ima si Rumondang sada wanita karir do na giot karejo. Siala ni i, berengon bohina songon na hatop matua, nangpe molo sasintongna dang lobi sian tolupulu pitu taon.

Ai massiattusan do anggo roha nasida, tarlumobi ma tahe si Rumondang tu hasomalan ni inana, na sai tinggil tu model pahean. Diparnonangon nasida i, tutu lao ma simalolong ni naiAdona mamereng gaya ni obut ni si Rumondang on. Bah, ai najolo birong do obutna pinaborhat sian huta, ia saonari, nunga marrara-marmera songon obut ni boladda. Ninna rohana sukkun-sukkun.

“E, Tahe nai ussok, ai boasa gabe marraraan obut mi, sai hira hau na ranggason, nga sai hira boladda ho…”
“Omak on nian,…..ai songon nama model ni obut saonari….”

“Bah,…na si set (cat ; red) ho do hape inang i?, ai adong do hape set ni obuk na rara?”
“Ai boha huroa omak…on ma goarna di hailai …”

“Ai dia do ho dah….hailaan nimmu, goar begu aha mai, jayana ma i…”
“Daong hailaan omak, hailai do….” huhut serom jala di haol inong na i
“Songon na uli huida, jala potonganna pe songon nan asing, dang masa dihutatta songoni, ai di ingot ho do nantulangmu parsalon i? holan sammassam do diboto i gaya ni obut” alai di rohana adong do hirim lao mambaen songon obut ni borunai

Lalap ma nasida manghatai obut on, jala satahi ma nasida nadua, balissan torang dope ari, lao ma nasida tu salon na jumenek tu jabuna i, marsalon, manggatti sitelan ni obutna, asa sarupa dohot boruna i.

Tung mansai las do rohani naiAdona mamereng sitelan ni obutna na imbaru i, sai dipahusor-husol ma simajujungna doppak kassa nabolak i, laho mamereng sian pudi. Massai longang situtudo tahe rohani nai Uccok, si Rumondang, boru na i, mamereng ibana, ai nunga tamba poso hian be jala dang suman parhuta-huta idaon. Boi dohonon nunga talu be ibana anggo soal gaya. Sai di papuji-puji ma inong na i, jala halak namarnidasa, songon akka tetangga na i, didok ma nasida na martinodohon.

* * *
Dibotari i, di tahi si Rumondang ma laho tu Pasar swalayan manuhor ikkau dohot sabbalging jagal lahon loppan dimangan botari annon. “Di son ma jo ho omak da, satokkin nai mulak nama helam sian kantor, jadi asa lao jo au manuhor ikkan satokkin, jaga jo pahoppumon, jala loppahon ma jo indahanta…”

Diboto AmaniUccok do naung dijabu simatuanai, ai matelepon do nai Uccok paboahon naung sahat tu jakarta. Alani i dipahatop ibana ma mulak sian kantor, denggan do ibana parmisi sian atasanna, jala di paboa do boasa mulak hatop. Dihobasi ma ugasannam, mulak ma ibana.

Sahat dijabu,

Dibereng songon na langa, dang adong jolma, tudia lao omak ni si Uccok?…bah, didulo ma nanget tu dapur. Ah…dison do hape, mangaloppa, tontu inang simatua modom di bilut, nunga loja sian pardalanan. Ima ro tu pikkiranna

Mardalan ma ibana nanget-nanget, dungi dipekkaon ma tasna di meja nadi dapur i.

Dihaol ma gomos sian pudi, huhut diumma pardopahanna i jala didok ” Masak apa sayang, duh…rajinnya, …” jala dang dipalua tanganna i, mesra ma idaon. Marsihaolan, naeng diabing…. .

Toppu ma manggujjal na diahol na on, marsurak ma didok ma ” Tolong…tolong…”

Alai holan dibereng, ise na manghaol ibana i didok ma “Au do i amang hela, simatuamu do au, dang omak ni si uccok au…”

Aha namasa? sian pudi idaon, sarupa do potongan dohot rupa ni obut, pardagingon pe sarupa, jala dipakke naiAdona do pahean ni boruna laho pahean ari-arina….Jayana ma i, alani obut, gabe tarsubang tu simatua.!!

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s