HATA SO PISIK

AmanJalukkit

http://www.latteung.wordpress.com

Somal do amaniJalukkit marnonang di lapo ni oppuHaposan, ganup potang ari dukkon mulak ibana sian parkarejoanna. Binoto, dang alani na holan tabo tabbul nituak, alai ala godang do dongan markombur disan. Inganan parmituan ni halak batak sian na marragam professi, molo didok hata nuaeng on. Ai rodo tusi minum tuak tentara, guru, pengusaha, parkarejo di pabrik nang na asing. Jala dihatai do disi sian suan-suanan, mambaen raru na tabo, sahat ro di rapot ni parpolitik. Ai, dang likkang pakkataion sian rapot ni pansus, bank senturi. Ra, dukkon sidung pe rapot i, asa sidung dihatai nasida di lapo i.

Ninna amanJalukkit, diboto ibana do tudia lao hepeng ni bank senturi i. Jala didok, ai halak batak do nappunasa bank i, ima marga Sianturi, ido asa gabe bang senturi goarna. Ima ninna. Pattang so diboto, pattang sobilak.  Ba, molo nga disi ibana, sai tu tambana ma sihataan. Tabbana siparekkelon.

“Dang adong be hubereng portibi on, nga lam tu segana be anggo hajolmaon on, diboto ho do nabboru? haru akka pangula, nunga marpeolan ula-ulana” ninna ibana tu OppuHaposan boru. Pangula nanidokna ima pangula ni huria, sintua, nang pandita.

“Dia ma tahe, anggo nuaeng marsikkola anakkon tu sikkola pandita, holan asa dapot karejonama, datung naeng pararatton barita nauli i, ia so i alana manakko, ala na jugul ni anak, manang ala naso dijalo di unipersitas” ninna manguduti huhut dihindat galas na manobur tuak i.

“Olo, alai dang sude songoni, gumodangando mangula di dalan ni Tuhan i, lae”, ninna sahalak na hundul disi.
“Ah, sammassam do huida, mata hepengon do anggo pandita saonari, gila jabatan. Sai tor dijua akka pandita i do molo dibaen ibana marhobas tu huria na memet manang dihuta-hutai,”
“Olo lae, sai adong do i, alai habilangan do i” ninna amantai muse tu amanJalukkit.
“Nga piga binereng daba ai gabe pandita i do pabadahon ruas i”
“Ah, dang sai songoni lae,…”
“Ido lae, songon pandita na hubotoon, alai tarsingotna marga aha do hamu tahe, sai marnonang hita hape dang marsitandaan, tamue ni parhutatta on do hamu?”
“I tutu lae, marga Marbun do hami bah, apala tulang ni si Sitaripar, na mangebati nasida do tu huta on” ninna amanta dongan ni amanJalukkit marnonang nakkin. Di uduti nasida ma namarnonang i sahat tu na botari. Alai anggo nonang i rupani dang dao sian akka pangalaho ni akka partohonan di huria i.

“Boha di huria muna lae, adong do kasus ni pandita?, molo adong, tor papidda hamu, asa unang manegai” ninna ibana
“Daong lae, burju do pandita nami, sai laus ma”
“Aut sura didok kedanhu, mangido asa sikkola paddita ibana, datung loason bah,..”
“Boasa, sada sitta-sitta na denggan do i”
“Ah, nga binereng lae, dang siappinan pandita saonari, boha dangi inna hamu?, talak songon indahan dibalanga do akka ulaon nabinaen ni paddita i” ninna muse.
“Talak bohado?”
“Ah, berengon do songon na suman marjamita, anggo roha i, ise ubboto i, tong do tong..”
“Dang songoni dah lae, ai anggo jolma dope nasida, dang malua sian dosa” ninna amaniTarhatotong sian labbung jaddela, huroa dang tartahansa dang mangalean padapot.
“Bah, boasa nimmu ma, amang boru, dang diboto ho boha kasus ni pandita si anu tu siadona, dungi si adona muse?” ninna mangalusi.

Dipaboa jala disuhuthon amanJalukkit ma sude rumang ni pangulaon di huria i, tu amanta, donganna namarnonang i.  Dang holan paddita, dohot do sittua dipahata-hata ibana. “Jadi songoni do lae di huria on, tung ise be sitiruon, dang sittua dang pangula na asing, ai pandita pe nga godang mangulahon akka ulaon sipissangon”, ninna ibana.

“Ai jolma dope nasida i lae, tatangingakkon ma asa denggan jala asa totop mardalan di dalan ni Tuhanta akka pangulani huria i, jala muse,  hita ruas pe boi do pasingothon nasida, molo tung sala lakka” ninna amanta siMarbun on.
“Olo ma, alai na binoto nunga siboto surat nasida, sarupa do hape songon hita on??” ninna amanJulikkit dang olo talu.

*  *  *

Nian, sahalak na burju marhuria do ibana. Ai dang hea dang lao tu gareja. Alai, ima huroa, sai akka pangula ido dipamanat ibana. Nang di partangiangan weik pe tung na ringgas do amanJalukkit. Habilangan do naso ro ibana tu partangiangan eaik.

Dibodari i, dukkon mulak ibana sian lapo ni OppuHaposan ditahi rohana do lao tu jabu ni AmanJatorbang, ima sabareddeng jabu dohot amanTaripar. Diengger ibana do parsahat na hira-hira naeng jamita ma. Ai molo hatop ibana sahat, bah, olo gabie ibana sibaen tangiang. Sai dipasiding do anggo na sada on. “Dang talup dope iba makkatai tu Tuhan i, gok dosa iba, dah” ninna ibana alasanna.

Toho ma, nunga marjamita. Disorohon amanJalukkit ma masuk tu jabu. Sipsip ibana, jala huddul apala pas paadop-adop dohot amanta pandita parjamita.

Jonjong ma amanta pandita, didok ma “Amanami, inanami, andorang so hu patolhas jamita on, porlu do patandaon diri nami. Ia hami ima Pandita Marbun sian Huria Nasonang, jala haroro nami tu huta on, ima na mangebati keluarga ni lae nami, amaniTaripar, apala hombar jabu ni parpunguanta sabornginon. Dipangidohon huriatta nadi hutaon do asa au marjamita, jala nian nunga marsitandaan hami dohot piga-piga ruas nakkinon arian i, tarlumobi dohot amang amaniJalukkit, nunga tung godang hami marnonang. Jadi horas ma dihita saluhutna”, ninna, huhut di bereng amanJalukkit dijolona, serom pandita i.

Holan diboto amanJalukkit, ise namarjamita i, morot nanget ma ibana tu pudi, bolak-bolak bohina, mulak tujabuna. Longan jolma torop, aha namasa??

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s