Remot si maup…

Di na sahali, lao ma amanTarune tu Polandia. Sada negara di Eropa Timur ma on. Topet tikki masa-masa ni abbolas manang salju molo di dok dihutai. Ra, nga taboto boha molo ari-par-salju. Haru holan ari par-udan do masa di hitaan nda nunga tung ngali, manihit pakkilalaan?.

Atung pe rupani sian Dolok Sanggul huta ni AmanTarune on, alai anggo sangobbas on tung manorus do tu holi-holina ima ngali ni ari i. Nian, nunga diboan ibana hian akka pahean na hapal, ima nasomal di pake ibana di Dolok Sanggul. “Tor boha ngalina, gari di Dolok Sanggul holan marsaloar puttung do iba, hape i nama ngali ni ari..” ninna andorang didok donganna tung ngali do di Polandia. Ai dang porsea ibana anggo so di ida jala di hilala

Dung pe di hilala ibana, dung tolu ari ibana di huta i, asa diboto ibana mandok ” tung na ngali ma hutaon, palobi Dolok Sanggul, datung diha-dihana hape huta nami” huhut ma  sai dipamasuk ibana tanganna tu sakku ni bajuna.

“Anggo songonon do hamatean nama on, nga sude marharukkut neh, boha nama jolma mangolu di hutaon, sude na humaliang nga gabe Es ” ninna ibana muse tu donganna, ala dibereng ma sude nga radak jala nga marbottar.

Hape ikkon dua bulan ibana dohot donganna si Joko na sian huta Surakarta di Polandia.

Dukkon saminggu ibana di hutai, sai maos do sukkun-sukkun ibana di rohana ” Bah, ai sarupa do naeng songon au jolma on sude?, ia molo maridi iba, tung mansai manihit ma i. Dagah…anggo sonongon do torus dah, hamatean namaon “. Didok songoni ala nga saminggu ibana maridi alai sai maridi aek na tung mansai ngali situtu.

Modom pe ibana ikkon marbulus nama. Dua ari na salpu, dipangido ibana do tolu gobar tu nappunasa hotel i. Denggan do dipasahat rupani, ai niattusan ma, anggo serpis ni hotel i songoni denggan do.

“Ai aeon nama on sahat tu bulan na ro?” ninna ibana tu donganna

“Ai mahua huroa?” ninna si Joko, donganna na sian Surakarta i
“Olo ma dah, tung na ngali ma huta on, nga ngali huta nami, lobi ngali dope on” ninna mangalusi.

Pa dua minggu hon nama ibana di hotel i. Jala pa dua mingguhon ma ibana na maridi aek ngali dohot marbulusan gobar opat lappis. Humitir ibana dung sae maridi. Ditahi dang maridi, dang toho.

Dinasadari, lao ma ibana tu bilut na asing, jala tung longang situtu rohana mida bilut i. Dung masuk ibana, dang ngali di bagasan, alai mohop do. Jala di dilo tu kamar maddi, tarsor di ida maruap-uap aek i. Di jama ibana, jala longang rohana “Bah, mohop, dangol-dangol sasilon aek on, jala kamarna pe dang songon kamar hi ngali, namardikkan do huroa par-hotel on, ala diboto iba halak Indonesia” ninna dibagasan rohana. Alai di pasip.

Nunga mohop rohana, dang toho be molo sai maringanan di hotel on iba, ninna amanTarune dibagas rohana.

“Pidda ma hita, kedan, dang motan par hotel on, mardikkan. Heado mardikkan tu tamu, ia hita na roa-roa i dilean kamarna, hape ala parhutaon nasida, denggan dilean. Hape rap sarupa mambayar do” ninna ibana.

Nang pe songoni, di oloi si Joko do, jala mussat hotel ma nasida. Nang pe rupani manginongi dibagas rohani si Joko ima ungut-ungut ni amanTarune on, ala sai didok dang motan parhotel i.

Dibodarina, dung mussat nasida tu hotel na asing, tarsunggul ma amaniTarune sian podomanna ala ni ngalina. Didok ibana ma muse “Ah, tung soadong do na motan hape jolma di hutaon, ala halak eropa, dang nanggo hormat tu tamu” ninna. Borngin i, lao ma ibana tu kamar ni si Joko. Dungi di hilala ibana ma, songon naso ngali di kamar i. Mohop do.

Maila ibana manukkun. Bohama, ia disukkun annon, patanda hu parhuta-huta. Ai ninna rohana, ummalo do ibana sian si Joko. Mardomu muse, si Joko on, kedanna do diparkarejoan. Sip ibana mulak tu bilutna.

Sai manginongi ma dibagas rohana. Dang tartaon be on. Ikkon hu paduppar, ninna ibana. Lao ma ibana mandapothon resepsionis ni hotel i. Jala didok ma “Aha do maksudmuna puang, mardikkan hamu. Ia donganhu dilean hamu bilut na denggan, hape ia tu au, bilut na roa, na tung massai ngali. Aek na pe tong songoni nama ngalina, manihit. Ala bayaron on arga hotel on” ninna ibana.

Bolak-bolak bohini par hotel i mida muruk ni amanTarune, jala hatop mangido maap, sobba-sobba. Didok ma, “Beta ma amang, ta ida ma jo na dia nanidok muna na hurang di pambahenan nami”.

“Olo, beta ma tabereng” ninna.

Dung didulo tu bilut ni amanTarune, dipagalak ma aek dohot kipas angin. Hape pagalakkon datung kontak-kontak ni listrik songon na adong dihita on. Soadong kontak ni listirik. Remot do goarna. Nda holan i do.

Dipissit-pissit par-hotel ima rupani. Dungi saminit nai, di jama tu aek  nadi kamar maddi, nunga mohop jala margumo-gumo. Mangupir par hotel i. Dungi di-remot muse tu kipas angin i manang AC. Mangullus ma alogo na mohop nanget. Dipissit aulak nai, lam mohop situtu ma alogo i. “Dihana ma na sega??” ninna par-hotel i.

“Ah…nga maup on, ai pakke remot dohot lao maridi aek las. Jala pakke remot dohot palashon bagas on” ninna di bagas rohana. Tung maila situtu amanTarune. Ai diboto AC i, pangalihon do i. Songon na adong di jabuna di Jakarta.  Moop ma tutu kamar i.

Alai dang batak anggo so diboto maralus. “Ah, nakkinon so las, na sega do ra remot na i, ia so i nga habis batere, ai songoni do hubaen nakkinon” ninna ibana. Mangupir muse parhotel i, ditadikkon amanTarune. Sai dipapissit-pissit ibana ma remot simaup i.

“Dua minggu au maridi aek ngali na tung manihit, jala marbulusan, hape holan alani beguattuk on” ninna. Ai so diattusi mamaekke remot i, ala bahasa Polandia dibaen jala maila manukkun. taon!.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s