TORSA

Surat ni damang sina huta

Tung mansai las rohani siJatenggen mida surat tongosan ni among na sian Pakkat. Humalaput, dibukka ibana  surat  jala di jaha. Arop situtu do rohana, nauli jala na denggan alus  ni amongna,  AmanJatenggen di pangidoanna . Nungnga sabulan lobi dipaima ibana balos ni surat on, didok rohana na, dipatulus amana sakkap ni riohana, ima manuhor motor manang kareta dalan-dalanna tu kampus.

Didok ibana di disuratna na dibulan-bulan na salpu, ia di pudian ni ari on, tung mansai godang tugasna, tarlumobi ma na laho pasidukkon sikripsina. Siala  haporluan on, dipangido ma motor  tu amongna.

“Bapa, on nama taon parpudi au kuliah, asa tor boi au tammat taon on, ninna rohakku nian molo siat pangidoan, tongoshon ma jo hepeng asa hu tuhor motor manang kareta dison. Ai jumotjotan tu tu lapangan nama au mangalului data tu sikiripsikki. Nian molo binandikkon do tu akka dongan, dang dihana nian i. Anggo akka donganhu, markijang do, adong na markuda, adong mar panther, adong muse mar jaguar. Jadi ninna roha nian, ba, dang pola sahat tusi, holan martiger pe nian au bapa” ninna ibana isi ni surat na i.

Huhut ma ditongoshon muse akka puttenna tu bapakna di Pakkat, ninna rohana asa tung las roha ni amana mida ibana, ai malo jala toho do hape sikkola ibana. Jala satokkin nai, insiniur nama ibana. Ihut ni i, asa tor dipatulus pangidoanna i.

Dung dibukka ibana surat ni amangna i, dijaha ma nanget tu toru, manat jala marulahulak ganup baris. Didok amana ma disurat na, songon on.

“Anaha, hasian na lagu. Las do rohakku manjaha  surat mi, nang songoni inongmu, las situtu rohana mida gobbar na tinongosmi, ai hipas do ho hape amang di Jakarta. Jala tung las roha mida akka puttenmu na tinongos mi. Hupamanat, jala hujaha nanget-nanget, ba tabba ma pos ni rohakku tu ho. Dang marisuang hape gogo nami i, namapparsikkolahon i. Dang marisuang  gogo ni anggim na dua on, maru so lao mangaratto nasida, asa adong dongan nami marari-ari tu akka dongan sahutatta. Ai anak na miniahan, anak sijujung baringin do hape ho. Diboto ho, ai holan hodo pomparan ni opputta na sarjana annon. Akkup ni i, anggim nang ibotom na lima i pe, tung mansai masihol ninna tu ho, marsihgulut do nasida laho marnida gabbar mi, eu..tahe, holan i nama pasobbu sihol ni roha nasida mida ho. Sai dipatulus Tuhanta ma akka sitta-sitta ni rohami.”

Sahat tusi, songon na so siJatenggen marhosa, naeng manetek iluna, manjaha surat ni amana dohot inana. Dibayakkon ibana, amongna mamuddak salak sagoni bolon sian Sitahuis tu onan Pakkat, hosa-husa. Maradi ma di panasapan i, huhut mangisap timbaho pulos. Dungi, di ingot ma muse inana martiga ikkan asin di balerong Pakkat. “Ue..tahe damang nang daianng on”. ninna, naeng manetek iluna.

Dibukka ibana muse tu harotas na mangihut.

“Anaha, naburju, hasian ni dainang, buhabajukku, anak ni amana. Nunga takkas hujaha sude isi ni surat mi, tarlumobi na mangido hepeng ho tu hami, laho manuhor karetam. Anggia, takkas situtu diboto ho, datung adong hodatta, datung adong pantherta, suang songoni nang kijang.  Dang songon natoras ni dongan mi, amangmon. Ai diboto ho do, holan hauma sisattopak i nama artatta, ima saba na di Sitahuis i,  ipe nunga hu gagadehon tu amangborum, par-Sigalapang tikki na mangido hepeng ho natolu bulan na salpu. Asingi ni hauma i, ba arta na mararga di hami holan sada nai nama, ima pahan-pahanan ni inangmu. Boha, anak ni babi an ma hu tongoshon anggia, asa adong batak-batakonmu tu kampusmu, gatti ni tiger na pinangido mi?. Hatop alusi anggia asa huboto manongoshon”

Tarhatotong ibana manjaha surat ni amongna i.  Tarjolma ibana. Dang ditorushon be manjaha sahat tu toru.

Dungi ditoru sahali, disurathon amongna amanJatenggen ma muse “NB: Molo apala rikkot hian kareta i di ho, gadison  hu ma tong golok paragat na tajom on asa adong tongoson tu ho, manang na golok on ma hu tongoshon anaha, alusi!”

Manggirr siJatenggen manjaha surat i, ro iluna. Tartoppuk andora, ai so ditanda ise amongna.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s