Dokter beguahai. . . .

Dijaman saonari on, nunga tung massai mura-mura jolma marsahit. Adong do sahit sian sipanganon, adong jolma marsahit holan ala maruba alogo. Dungi muse sahit ala hasomalan. Somal mangallang na tabo, hape holan so diallang na tabo gabe marsahit. Adong muse dope sahit alani hamoraon. Jala sahit na ummaol ubatan ima sahit roha. Dia ma i?. Ala ni gelleng pe jolma boi marsahit. Alani amanta pe boi inantai marsahit. Adong dope nahumebat sian sude sahit, ima marsahit ala sonang halakan. Jala ubat nion, asa sonang ibana ima ikkon marsahit halakan. Lan ma tahe ragam ni parsahiton saonari.

Di ganup pittu ni gareja dibaen akka pangula ni huria do salebbbar harotas, ninna molo tung adong namarsahit ruas i, dipaboa ma. Manang sahit beguaha pe taho i, asa ditangiakkon akka pangula ni huria i. Ganup minggu, martabba-tabba do akka na mangisi harotas on. Lapatanna, godang namarsahit. Gabe dohot pangula ni huria loja ala ni parsahitan ni akka raus i.

Amani Pereddi, sahalak pandita. Nda dohonon dah!. Sai ringgas do ibana manunggul-nungguli akka ruasna asa ro tu parmingguan. Ia so i asa ro tu partangiangan weik. Suang songoni mangurupi akka hombar jabuna, namarsahit nang akka na asing ma tahe. Umbahen i, sude do nasa ruasna marholong ni roha tu ibana. Ai so pola mangigil ibana, nunga ditaruhon akka ruas i parbue ni jama-jamana. Dang piga dan nai, adong muse mamboan boras ni haumana. Sude ma tahe marlas ni roha mida ibana. Nunga dengan marpalilung, lambok muse makkatai nang mura tarserom. Ganup adong namarsahit sian ruas i, sai tor hatop do ibana lao manotop, panomat martangiang huhut mangaleanubat ni partondion asa tumibu malum dihilala.

Disada tikki, diari onan, lao ma ibana mandongani inanta pandita maronan. Ra, anggo di huta i, tung massai bakkol dope rohani ama-ama maniop karajjang ni inanta. Molo tung pe rap maronan, sai di lapo i do amanta paimahon. Datung hea ama-ama lao tu onan i, mangurupi inanta. “Dang adong na manguman amanta pandita on ateh, didongani do inang i manang tudia” ninna oppu Humirlap, partiga ikkan asin, dung dibereng amanta pandita, amaniPereddi mamolus, rappak dohot inanta i.

“Olo ma tutu eda, na sumalim do burju ni amang i” ninna sahalak partiga-tiga sian samula siamun.

Gabe martaringot nasida tu pangalaho ni amatta. Didok oppuniHumirlap, adong ninna ama-ama nanggo mangapusi kotoran ni dukakna pe dang haparbaga. Dungi, adong ninna muse ama-ama, sai lao marlapo hape inantana marsahit di jabu. Na humebat dope, di ida ibana ninna ditipi panirang-nirangon ama-ama ala dibereng uli parende, ujungna mangoli muse paredde i tu ama-ama na gittalan i. “Hebat ma nian akka namasaon eda, lao suddut nama portibi on, anggo songon nama namasa ganup ari”.

“Boasa huroa, ai soholan ama-ama naso tarpissang, adong eda..dia do hamu, ai ina-ina naso tarpissang pe adong do. haru ina-ina nunga di pagis-gadis ianakkonna, nang pe dibortian dope” ninna oppu Halasson sian bariba an, sahalak partiga sabe.

“Nungnga be i hamuna bah, ula be ma ulaonna, dia jo ressean mi eda, dang nanggo adong tukkar-tukkar hu neh” ninna OppuMangomo sahalak partiga salak.

Tep, pajuppa ma AmaniPereddi dohot sahalak ruas na, OppuniSomarhasoan boru. “Bah, horas inang, didia amanta, songon na leleng dang pajuppa, ai partangiangan di weik ta pe dang hea be nasida” ninna.
“Imadah amang, ai hurang sehat amanta, sai holan di jabu do” ninna mangalusi.
“Aha sahit nasida, songon naso heado nasida binege marun-marun?”
“Songoni ma amang, sahit na masa saonari on, ai dang pola na dia nian, alai ima huroa” ninna dang dipagajjang jala dang dipatorang parsahiton ni OppuSomarhasoan doli.

Tutu ma nian, molo adong ruas na somal dohot tu parpunguan, hape tor toppu mago, bah ise naso lulululu dah. Ai nunga dua hali partangiangan weik OppuniNasomarhasoan dang ro. Somalna, so dipukka dope partangiangan, nunga disi oppuSomarhasoan. Ditahi amanta pandita on ma lao mangebati nasida. Dituhor ma sipanganon, pisang, utte na tonggi. Ai didok, hurang sehat, jala dijabu do modom-modom.

* * *

Di ida amanta pandita, amaniPereddi, songon na langa, dang habegean soara ni jolma. Alai, adong piga-piga karena–motor. Ah, tohodo namarsahit amanta on, ai akka pamilina nunga marroan, nidulo ma jo tubagas, ima dirohana. Diboan ma siboanon nakkinon masuk tu jabu. Nanget.

Hape di ida ma, mar-leng do OppuniSomarhasoan di jabu, rap dohot opat halak donganna. Tabo ma nasida na marjuji i, huhut mangalsik sigaret. “Sabento jo dison” ninna oppuSomarhasoan. Hordit ma rohana, ai nga jonjong amanta pandita disi.

“Bah…bah….ai marahuai do hamu, amang” ninna amanta pandita on, dang mago dipe hordit ni rohana.
“E…e….ai..ai..ee….sian dia hamu amang, hundul hamu” ninna oppuniSomarhasoan, huhut dipeakkon toppu kartuna. Tarhatotong nang akka donganna i. Ai dua sian na marjuji i, sintua do, pa tolu oppuniSomarhasoan, sahalak sittua lerning.

“Ai didok marsahit hamu, hape marjuji do diula hamu,…”ninna amantaPandita i
“Na marmeam-meam do amang, daun lalap”
“Daunlalap boha?” ninna amantaPandita on. Alai anggo na opat nai, nunga mangissir nanget tu mulak be tujabuna.
“Sian dia amang?” ninna dang dialusi sukkun-sukkun ni panditai

“Ai didok marsahit hamu, hape songon do diula hamu”
“Olo amang, tohodo, marsahit do au, ai didokkon dokter i, asa patonang pikkiran ninna, ido asa unang manombo sahit i”
“Patonang pikkiran? Marjuji patonang pikkiran?, ai dokter beguahai?” ninna amanta pandita on, murukan.
“Nga marsahit situtu hamu na opat” ninna pandita on muse manguduti huhut mulak sian jabu i, diboan utte manis nang pisan nadituhorna nakkinon.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s