Surat tu damang–masihol au bapa–

by: erik rimson manik

ilustrasi musik: Uju Dingolukkon ma nian

Tano Parserahan, 27 April 2010

Horas ma bapa,

Bapa, sehat do ho Bapa? Sadarion sai maneteki ilukku ala masihol tu Bapa. Sai tu Bapa pikkirakku. Mardomu hubege barita, na sai marsahit-sahit do ninna ho  Among na basa. Dung ma tahe parmodding ni dainang pangittubukki, lam jot-jot  ho marsahit. Pa posma roham Bapa,  di hangoluan on, adong dope au annakkon mu nalao manogu ho haduan
molo dung matua ho, Bapa. Manghaholongi, mangapusi ilumi, manogu ho sian podoman mi, paradehon sipanganon mu, paiashon paheanmu, molo sorat dihilala ho bapa.

Molo hu bereng akka dongan satorbakku marudur tudolok-tutaruan dohat amangna na be, gabe huingot lojami bapa tikki dihaposoon ni pamatangmi. Mangalului ngolu-ngolu siapari, tu dolok tu toruan holan na lao hu mokkop hami anakkommu. Dang marnaloja, dang marhasoan, hir hodokmu manetehi sian simanjujungmi. So diboto ho marpahean na uli, sodiboto ho martimbaho na arga, sodiboto ho marlapo rappak dohot akka donganmu. Sipata huingot ma muse bapa nalao tu tombak Simasik, tu tombak Sugut-sugut dohot tu  Tombak si Pultak ima nalao mangguris di partahuakni manuk i. Sogot manogot i, nunga diparadeho balajjom, dibaen ho indahan dohot ulu ni dekke asin tu hajut mi, nang kopi na paet i.

Hu bereng ma bapa mangalayan di paccur Sitiotio  laho patajoppon guris i. Huhut ma ho marmilmil, mangendehon ende hasonangan ni roham, Anakhon hi do hamoraon di au. Dukkon i, diendehon ho ma nanget-nanget logu huria bukku ende

Sai patogu rohangki, ale Jesus Tuhanki
Golom dohot tanganmi au dipardalananki
Molo loja au dison pargogo i tongtong.
Dok tu au : Hutogu pe ho tu surgo i muse.

Mian ma dilambungki, molo ro ujian i.
Unang loas ganggu au sian sinondangmu dao.
Molo maol dalan i jalan ponjot rohangki,
Dok tu au : Hutogu pe ho tu surgo i muse.

Huhaol ho Amang sian pudi. Nakkok au tu tanggurung mi. Diumma ho au, huhut diapus ho simanjujung hi, sonang huhilala. “Tusan ho marmeam dohot anggim, marorot ho asa unang mangarsahi tu inongmu” nimmu tu au.

Dang marhasoan. Masa ulaon tu saba, ba, so bissar dope mataniari, nunga diparade ho pakkur nang pahean tu saba, lao mangurupi inong.

Diboan ho ma hajutmu, dibagasanna gadong na tata, dungi boras dua takkar, loppaon di balian annon. Didok ho ma tu ahu, dung mulak ho sian sikkola, hatop ho tu saba dah, unang marmeam-meam ho, ai suanon nuaeng. Nimmu, huhut serom ho tu ahu.

Di nasahali marnipi mau tu bapa, na jong-jong bapa di udean  ni dainang pangittubu i,ninna rohakku ma “Nunga matua hape amonghon, nunga tung loja pamatang na na mangoluon, marniang sibukna, sap uban simanjujung marharharan iponna, redep simalolongna”. Asi roham Debata, lean umur na ganjang di amonghi, asa torus hipas bapa i. Asa sanga hupasonang rohana i.

Bapa, diingot hodope ha hea di lisssing ho au, ala lola au karejo, mangalului labbuk sipanganon ni babitta?. Huingot do bapa i, sahat tu saonari maripos-ipos dope di tanggurung hi. Mangangguk bobar au bapa hatiha i,  molo huingot i, olo ro ilukku. Dung pe saonari huboto, na holong niroham do saluhutna i.  Maos dipandokho ikkon giot do karejo, ai so adong arta manang pusakko nalaho tading-tandingan di hamu, nimmu do. Ikkon nunut marsiajar, unang ni tiru akka dongan na gabe i, ai na pogos do hita, ido podam tu hami.

Borngin na i, diapus ho tanggurung hi. Diaben ho miak ni harambir mangubati nanilissing mi. Diapus ho tanggurung hi, dungi modom ma au diabinganmi. Huboto do bapa, naeng manetek ilum, alai dipasip ho.

Huida di gobbaran na tinongosmu, nunga mago be sude sibuk mi. Hagogoon mi. Nga maheu pamatang mi. Hosada naso mago. Parekkel mi, mambaen sonnang rohakki.

Bapa, tangianghon au anakkonmon. Anak hasianmon, Bapa.Dang tardok au manang aha bapa sonari, holan hata sihol  ma sian au tu bapa, sai gajjang ma umurmu asa sai adong mamodai hami gellengmu…..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s