sappulu, jek, pro

Molo nga margatti bulan, sai tor tarsunggul do turoha,  di ari minggu parjolo sahat tu minggu na patoluhon mar-arisan. Jala attar ima hasomalan ni halak Batak di tano parserahan on. Marganiba, marga ni inanta soripada, marga ni tulang niba, dohot parsahutaon, dohot arisan na asing muse. Dang binoto sian taon sadia diulahon halak batak parpungu-punguan sisongonon. Olo sipata dang sae ari-ari i holan lao tu arisan. Molo halak na asing, diari minggu ima ari na denggan rappak dohot keluarga. Dijabuna be do halak, ia so i, lao marliburan. Hape anggo halak batak, tor arisan do dipungga. Olo muse dope tolu arisan sadari i.

Didok dongan, nga hasomalan ni halak batak namarpungu-pungu sisongoni. Jala tutu tohodo, ai hatiha mararisan on do boi pajuppang dohot dongan samarga, saoppu nang sahuta. Dipamboan be do gellengna tu arisan, mulai sian poso-poso sahat rodi bajar-bajar. Tutu ma nian, rikkot do molo parsidohot nasida, asa diboto muse, ise do ibana, jala didia akka sisolhotna.

Songoni do nang amanJamordong, nang pe rupani ripe naposo nasida, alai didohoti nasida do nasa punguan na adong dihuta i. “Jonok partubu, jonohan do parhundul” ninna ibana, jala ima alana asa didohoti akka punguan i. “Ai manang mahua iba, akka sisolhot nang dongan sahhuta nadison do jumolo mandulo iba” ninna muse.

Ganup lao ibana mararisan sai diboan do siJamordong namarumur tolu taon.

Ninna ibana, asa somal tu punguan ni halak batak, jala asa diboto ibana na halak batak ibana. Ido tutu, ai molo binereng sian hobbar jabu ni ibana, datung adong parsaoranna dohot halak batak nadisi, jai tung mansai biar do rohani ibana molo tung dang boi marsaor siJamordong  muse dohot halak batak.

Akkup ni i, somal do rupani sidung mararisan dipukka akka ulaon daonlalap. Adong ma on namarnonang, akka inanta godang marsitariashon pengalamanna be. “Dang tabaen sapalak?, ollat ni jam pitu borngin, sukkup do kakki” ninna OppuJumukkot. Lapatanna, naeng markartu do nasida. Ai diboto ibana, pitu sian sappulu ama nadisi, apala giot do tu parmeamon songonon.

“I tutu bah, amanguda, hatop dope ari” ninna amaniRumanap, huhut diundukhon akka donganna na asing.
“Disan ho amanniJamordong, paitte golap ari” ninna muse mandok tu amanJamordong.

Songoni ma ganup arisan, sai jolo marleng ma nasida. Tutu ma nian, tabba ma ringgas ni akka amatta arisan. Hatop dope ari nunga marpungu nasida, asa jolo marleng. Ninna daonlalap. Nunga gabe hasomalan.

*   *   *

Dinasadari, ro ma telepon sian parsikkolaan ni siJamordong. Sian sikkola te-ka. Hordit rohani ibana, aha namasa.  Dihumalaputi ma mandapothon parsikkolaan, manukkun boasa pola martelepon guru i.
“Aha namasa gurunami, boasa pola jouon muna au?” ninna amanJamordong manukkun
“Dang na pola dia nian amang, ai somal do hami songoni, molo adong na hurang lobi diakka murid nami sai hupaboa hami do tu natua-tuana” ninna guru on
“Baen ma jo gurunami”
“Imadah. Ianggo anakta siJamordong, nian, dakdanak napistar do, jala binereng rupani sian parbinotoanna, tung na hatop do dapot ibana na niajarhon ni guruna”
“Bah, ido hape” ninna amanJamordong, las situtu rohana umbegesa.
“Imadah guru nami, ai sai niajaran do dijabu, hami natorasna pe dang marnaloja mangajari” ninna ibana
“Ikkon songoni do amang, alai..” ninna guru on, Sip satokkin

“Diajari guruna ibana mamilangi, sian sada rodi sappululima, hatop do dialusi, alai asing sian na somal” ninna guru on
“Boha parasingna?”
“Sukkun ma ibana, asa hujou” ninan guru on. Dungi dijouhon ma siJamorodng topet marmeami dialaman i. Abingma ibana tuamongna, las rohana ala di ida ro amongna. Disukkun guru ima ibana, mamilangi sada rodi dua pulu.
Denggan do dialusi sukkun-sukkun ni guru i, alai dung di nomor sappulu, didok iba ma ” Sia, Sappulu, Jek, Pro, King…” ninna.

Maup!.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s