TORSA

Uju di ngolukkon ma nian

Disada tikki, manang pada suatu hari–hata nuaeng on, rodo oppuJamordong mangebati pinopparna di huta Jakarta–huta naribur on. Pasombu sihol tu pahoppu uhut mandohoti ulaon adat. Molo marulaon di Jakarta sai gumodangando dibaen ari Sabtu, ninna asa boi torop ro na niottang.

Massai longang situtu rohana mida ribur ni ulaon i. Huroa parsaor do hasuhuton bolonon. “Bah, tutu, denggan ni ulaon” ninna ibana. Dang binoto rupani, dia nanidokna, denggan. Ala na ribur do ala ni uning-uningan i, marolop-olop sude na ro i, manang ala gok ni motor i. “Ipe hea huida” ninna, huhut mangupiri

Naso panagamanna pajuppa ma dohot amaniTure. Partulangnaposona, ima apala pinompar ni oppung namamupus ibana. “Bah, ai hodo i amangboru, nandigan ho ro sian huta, sai songon namulak poso ho huida, hape iba lam matua,” ninna amanTure

“Ai ho nian tulang, sai songoni do torus, ido sai las roha mida hamu. Boha be par-posona, ai nunga onom ulu” ninna. Lapatanna na onompulu tugijjang. Huhut ma nasida marsihaolan jala marsihol-sihol na marhulamarboru.

Bohama ulaon adat di Jakarta on, guttur dibaen parende i, dakkuboto rupani di luat na asing. Ai so binoto sian nandigan dipukka halak, disi maredde disi mangulosi, guttur. Dang binoto didok namangulosi i. Hape nian ido impola ni adat i, akka hata gabe-gabe, hata pasu-pasu dipasahat marhite ulos.

Alani gutturna, diarahon amaniTure ma ibana tu lapo apala jonok tusi. Akkup tusi, mardalan ma panginuman, mulai sian tuak na tonggi, ro di tuak na masom. Mekkel martata ma nasida nadua.

Manang boha ma suhutanna, nga pidda inganan parminuman, tu lapo na marlappu marhirlop-hirlop, na marpandongani anak boru na uli. “Sipasuda do amangboru, asal isi parumar asal rumar gohi” ninna amanTure madok.

“Onpe asa Jakarta, Tulang” ninna mangalusi. Disoburi tuak i, haru manetehan sian misena. Anggo parjolo sahat nasida didok OppuJamordong dang diboto ninna marende, lumobi marjoget. Hape dung pa sappuluhon dorgukan i, mulai ma makkuling mudar i. Nanget-nanget, manerser ma simanjojak na, mangupiri simanjujung, marbalikan simalolong songon na medep, jala tanganna marputori.

Dung bagas borgin, ditahi ma mulak, alai dipangido ma sada ende. “Nauli amang boru, aha ma laguna” ninna amanTure, huhut didadap sakku ni bajuna lao mangalean par-limapuluan tu parkibpot i.

“Uju di ngolukkon, ma tulang” ninna mangalusi, uhut dipajonok, lao makkusiphon. Ai nga tung tarbarita anggo lagu nasadaon. So marlapatan marende, marembas, margondang hamu molot dung mate au–ima hata ni ende i.

Tung massai tabo ma nian lagu on. Sipata diihuthon ibana nanget-nanget, nata pe godang marpeolan, ai nungnga ende tuak be.

Dung sidung lagu i, disukkun amanTure ma ibana. “Na hona do lagu i amangboru?”

“Imadah” ninna mangalusi

“Ai, lagu poda do i amang boru ateh, tutu manian”

“Toho ma nanidokmi Tulang, alai dang napalai…”

“Aha do???”

“Patoho hu hilala. Ai ido pangapianan nami akka na tu mua, so marlapatan marembas hamu molo dung mate au. Alai, anggo au, agia marembas be akka pinopparhu molo dung mate au, na sobbu be”

“Marasing do sasada ho amangboru bah, datung piga songon ho”

“Ido tulang, diboto tulang do lapatan ni lagu i, dang songon napinatorang mi”

“Aha do?”

“Andorang so mate akka hami na matua on, ikkon boanon ni akka hamuna naupposo do hami marembas, marjoget, songon nabinaen mon, beta tulang, ta embashon muse. Pangido tulang ma jo lagu terajana i asa humaitton,” ninna oppuJamordong huhut di togu anakboru na uli dilabbungna lao marjoget.

“Beta tulang, na marjoget on, paitte so mate iba” ninna ibana muse

2 thoughts on “Uju di ngolukkon ma nian”

  1. Kwakakakak teng.. sian do dakot ho suhutan on Latteung…..tole tutu marembas, paima so mate,,, alai dag dohot au disi ba.. tok jorbut mai.. hahahha

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s