Pahoppu Panggoaran

Dang tarhatahon boha las roha ni NaiMaralus dung sidung martelepon siMaralus sian Jakarta. Paboahon naung sorang pahoppuna. Tolu ari manipat, marpiar-piar las nirohana makkatahonsa tu akka donganna. Marbarita sosukkunon ibana di parpunguan nang tu ganup hombar balokna. Martahi ma nasida nadua, naiMaralus dohot tungganedolina mangebati pahoppuna. Domu tusi, martading hata nasida palumehon jabu, naeng tu di Cikarang. Ima inganna ni si Maralus.

Hanget ni rohana do asa dipaboa-boa tu saluhut. Tu parari kamis donganna sapargurendean tong martading hata, donganna saparonanan, nanaeng laho mamereng pahompuna. Dang hapalang tahe. Pahompu panggoaran nunga sorang, jala goar ni pahoppu na on nama pakkeon ni ibana tu joloan on.

Nian, nunga adong pahoppuna sian boru, jala goar ni pahoppu na ondo dibahen ibana goarna. Ido sada panjouon di halak batak. Molo pinakke goar ni pahoppu sian boru, digoari ma Oppung ni si adona, ninna. Alai molo pahoppu sian anak do, didok ma OppuAdona.

Ninna rohana jouon ni donganna pararikamis ma OppuRomaHamonangan. “Ikkon si Roma Hamonangan do goar ni pahoppukki” ninna ibana tu parumaenna naiPaimaon–hatihai. “Ai nunga monang au marpahoppu sian anak nang sian boru, molo naeng tambaan mu goarna, tambai hamu, alai goar sian oppungna, ima” ninna ibana manguduti.

Hatiha martelepon boruna siakkangan sian Jerman, dipaboa ibana do naung sorang pahoppuna i. “Naeng tu Jakarta au inang, nga sorang paramanmu” ninna ibana. Ondo boruna siakkangan, jala maringanan di huta ni opputta siNomensen, mangihuthon niolina ala karejo di san.
“Ima tutu inong, attong hutongoshon pe pasitikketmu dohot bapa” ninna boruna par Jerman i. Dungi lalap masirarian ma nasida, bohama na marboru on, sude do dihatai. Sian rumang ni pahean ni pararikamis sahat rodi partaonan ni Naimaralus.

* * *

Pukkul sia manogot ni ari minggu, marhobas-hobas be ma nasida lao borhat tu gareja. Mar-Jas baget do anggo amaniUssok, si Maralus. Marsitabolan tu siamun huhut mamakke miak na hussus. Songoni nang naiUssok, dipakke kabaya pengantin i. Uli ma tahe idaon nasida nadua. Dungi dibaen ma baju na bottar di siussok, anak panggoaran i. Dang hatinggalan, songoni do nang amaniMaralus, denggan marpahean. “Hu pajaithon jas on anaha, holan tu ari pandidion ni pahoppukkon do” ninna ibana tu si Maralus huhut dililithon dasina tu rukkungna. Marsiberengan nasida nadua.

Tutu ma nian, songon na mulak poso do amaniMaralus. Takkup mamaekke jas nabaru i.

“Bah, marpahean ma ho attong oppuHamonangan” ninna amaniMaralus tu niolina.
“Daung!, hamu ma marminggu, di jabu ma au, pasikkophon sipanganon on” ninna mangalusi.
“Dang songoni nian na ruhakku bah, las ma roham. Dang pataridahononmu na so sikkop nadibagasa rohami” ninna amaniMaralus ala di ida songon na so tabo idaon bohi ni naiMaralus.
“Olo ma dah, so binoto amaniHamonangan on, tung so diboto nadibagas roha on” ninna mangalusi.

“Ahai bapa, uma, songon na marhata metmet hamu” ninna siMaralus ala dibege natorasna marhata metmet.
“Nion do dah, omak mon, dang dohot ninna tu gareja ala naeng makkobasi sipanganon” ninna amaniMaralus.
“Ikkon marminggu do ho umak, asa rapmarpoto hita dohot amantaPandita innon” ninna si Maralus. “Anggo sipanganon i, lok si Lamtiur paturehon, ai holan mangaloppa indahan nama, anggo ikkanna rupe na sikkop do sian katering” ninna muse, alai dang diboto aha na dibagasan roha ni inongna.

* * *

Logu nasomal, nomor saratus opat pulu onom do attong anggo ende di pandidion nabadia, paian ma di hami. Dungi jonjong be ma natoras na maboan dakdanak sididion. Holan diendehon sa ayat, tor mangissurut naiMaralus tu pudi. Laho haluar. “Tudia ho, pandidion nama” ninna amaniMaralus marhusip. Dang dialusi, sip. Jonjong ma na mamboan dakdanak sididion, mangalusi sukkun-sukkun ni pandita i.

Geok do sipata molo binege akka goar ni dakdanak i. Habilangan jari do na mamakke goar batak. Dang haru binoto, dia bossirna. Na maila do manang na alani beguaha. Geookna muse, olo gabe goar jawa di baen amana. Ai da tung denggan ma nian molo dibaen goar ni dakdanak i sian hata batak?. Godang hata batak na massai uli mambaen goar.

Sahat ma tu siMaralus. Diboan ma siussok tu langgatan. Dibaen ma songon naung nadiparguruhon nasida minggu na salpu. Dungi dijouhon amantaPanditama goar ni siussok on. “Ale…Ale…” ninna, so jo satokkin. Dipadenggan muse harotas i. Huroa hurang takkas dijaha amantaPandita i.

“Ale,…ale Jek… Luit… Bento Roma Hamonangan Sima…Tupang, hudidi ma ho…” ninna amantaPandita i. Alani gajjang ni goar i, marudut tu toru panurathonon ni marga nasida. Simatupang, gabe Sima..tupang. Mekkel suping pandita i. Gear ruas umbegesa.

On do huroa na niarsakkon ni NaiMaralus.

Dua ari na salpu nga didok ibana tu siMaralus, “Ai goar beguahai, maol jahaon ni deba, ia tung na mura-mura i ma nian dibaen”, ninna ibana. Ido, si Jacqluit Bento Roma Hamonangan do goar ni si ussok on dibaen siMaralus. Nga leleng diparsitta ibana goar Jacqluine, alai goar ni borua do on. Hape ala si ussok do na tubu, gabe dibaen ibana ma si Jacqluit.

Ro do tu pikkiranna, jouon ni donganna pararikamis ma ibana, OppuJekluit, ia so i OppuBento. “Bah, disilanghu muse, haduan…, baenonna ma hae Oppu Jek Luit Bento au?” ninna ibana marungut-ungut.

Padua hali on ma ibana haboratan digoar di pahoppuna. Hatiha sorang si ussok di boruna parJerman i, nunga didok asa goar Batak di baen. Alai asing pikkiran ni naiMaralus, asing muse do dibaen helana. Dibaen do goarna Jaugher. “Asa goar Jerman, inong” ninna boruna, naiJaugher.

Andorang so sorang pahoppu panggoaran si Jekluit, Oppung ni siJouher Karo do tarbarita goarna. Ala par Berastagi marga Karo-karo do helana. Tutu ma nian, tung marsak do rohani naiMaralus. Sian Oppung ni si Joker Karo gabe Oppu Jek Luit Bento Roma Hamonangan. “Tippas…” ninna naiMaralus

5 pemikiran pada “Pahoppu Panggoaran

  1. Kwakakakak hahaha hihihi sabbor,, loja au mekkel sasada au,, ai sian dia do dapotmu suhutan on Latteung.. ah namalo mahoba,, ikkon husuhuthon on muse tu dongan asa dohot taruli di goar na erget…. hahaha salut bah..

  2. huaaaaaa………. gile….gile……..asi nai rohakku mamereng oppung ni sijeckuit boru i….gabe sai siparekkelon ma hape inanttai di pararikamisan.

    tohodoi cerita muna i laeeeee……

  3. Pas do na didok ni amani Partogi i,ai bingung do iba di jaman nuaeng,adong doi mambahen Goar ni anakna sian Bibel contoh Yohannes, Jakkobus,Niko Demus,alai dung balga sada pe pangalahona dang adong natikkos,alias gabe Pamangus na tumangonan do dibahen goar Batak na bisa biasa i asa molo jahat pe dakdanaki dung balga dang gabe si hataon natua tua,he…he..he….

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s