Tilahaon

Ninna umpasa “manuk ni pealangge, hotek-hotek lao marpira, sirang marale-ale, lobian matean ina”. Alai anggo di oppuSakkot datung songoni. “Sirang marale-ale tumagonan sian na matean biang”. Tarida do hagaleon ni rohana, ai nunga marpiga hali ibana dang ro tu pargurendean, ina hanna.

Lumobi muse di na sabulan on dang hea be ibana marminggu. Tandi ma tutu soara dua i dang marbatu be. Ai holan suarana hian do di ihut-ihuthon akka donganna. Sude do mamboto na malo do oppuSakkot na marende i. Piga minggu on, sai lulu-lulu do rohani amanta Pandita, molo nga jonjong inna hanna lao marende. “Bah, ai naso marminggu dope inang OppuSakkot?, ai aha namasa” ninna sian hundulan ni parjamita.

Dung sippul parmingguan, di sangahon amantaPandita ma menukkun par-ina-hanna. “Imadah amang pandita, songoni do molo ro sitaonon i, niauhon diri, ba, manang marahua pelosok roha” ninna NaiAduna, alai huhut serom.
“Sitaonon aha inang?” ninna amanta Pandita muse manukkun
“Tilahaon”
“Bah, ai boasa dang huboto jala dang ditiktikkon ibban naso dison i do au na dua minggu on?” ninna amantaPandita longang jala hordit rohana umbege barita i. Tutu nian, mandohoti rapot pandita nasida di kattor pusat, jadi dang diboto nasida manang aha namasa. Alai boasa dang martaringot akka dongan sittua, sukkun-sukkun tu rohana. “Parsumaliman on akka dongan parhalado on” ninna, huhut lao ibana mulak.

* * *

Potang ari, lao ma amanta Pandita tu jabu ni oppuSakkot. Sian narian, nga ditahi naeng mamereng ruasna on. Gok do sukkun-sukkun ro tu rohana, boasa dang adong boa-boa na adong siaonon di ruasna.

Jeppek hata dohonon sahat ma amantaPandita.

“Dijabu do hamu inang, songon na langa” ninna amanta Pandita. Bukka pittu alai dang adong jolma.
Dituktuhi amantaPandita on ma jabu i, pola piga-piga dan lelengna. Longan jala hordit situtju rohani OppuSakkot mida nga jonjong amanta Pandita. Ise na so hordit tutu molo nga pala ro pandita tu jabut. Najolo, hira na mamereng suru-suruan i nama iba molo nga maradi nasida dijabu niba. Lumobi molo jinalang amanta pandita on, songoni nama damena ninna roha. Jala sonang ni hilala molo di apus pandita simajujung niba.

“Bah, amangPandita, hordit roha haroro muna on, aha namasa amang, sian dia halak amang?” ninna oppuSakkot manukkun
“Namandulo hamu do inang” ninna mangalusi, serom.

Dung masuk amanta pandita i tu jabu, dihumalaputi oppuSakkot ma tu dapur lao parade si inumon. Ido tutu, songon hatakku nakkinon, molo nung tu parhobas di joro ni Tuhan i, sai na dumenggan do leanon. Inna marlipat ganda baloshononni na marhuaso i.

Jonjong amanta pandita on sian hundulanna lao mamereng akka gombaran na adong di dorpi ni jabu i. Songon na paimahon haroro ni oppuSakkot sian dapur. Longang situtu do rohana, ai sude do hape anakkon ni oppuSakkot on naung sarjana. Marjojor do attong gombaran on, sian oppuSakkot doli sahat tu gombaran ni anakkonna, ris.

Pamotoan ni amanta pandita, opat do anakkon ni OppuSakot, alai di etong ibana adong pitu gobbaran i. Jala disurathon di dindingi, na lima anakkonna. Sukkun-sukkun rohana.

Dung rap hundul nasida, disukkun amantaPandita ma oppuSangkot. “Imadah inang, na hubege do adong barita habot niroha di hamu, dang jalo nieahan hamu. Jinalang di gareja ma dah, ningon, hape songon na leleng ndang haidaan hamu inang, jala dipargurendean pe nga marpiga hali dang margurende di ina hanna”
“Imadah amang, toho ma i pandohan muna i”
“Bah, ai mardomu dua minggu na salpu dang dison au, jai dang huboto barita i, jinalang ma jo hamu muse sahali nai, sai dipargogoi tuhanta hamu manaon sudena i. Tumibu tarapul rohamuna, dalan ni Debata no na ikkon saut”
“Olo amang, dang apala dia nian, nunga saep be rohakku” ninna oppuSakkot
“Manukkun ma jo au tahe inang, ianakkon muna nadia ma nuaeng na lao on”
“Siappudan i amang”
“I do na di makassar i tahe inang?”
“Daong amang, dison do, ido mandongani au, holan i hian nama mandongani au manag na tudia,” ninna Oppusakkot

“Nadia ma nuaeng i, inang?” ninna amanta pandita manukkun huhut di ranap doppak gombaran na marsakkotan i
“Nian ma amang” ninna oppuSakkot patuduhon gombaran na parpudi sahali

Hordit situtu rohani amantaPandita mida gombaran na pinatudu ni oppuSakkot, ai gombaran ni panaggai do. Martahuluk pananggai on, huhut marpita-pita, sai hira jolma.

“Ido siappudan nami amangPandita, jala ido mandongani au dijabu on, i do mandongani au modom, dua minggu na salpu di langgar deba di dalan an” ninna oppuSakkot.

“Sapala naung ro hamu amang, tangianghon hamu ma jo siappudan nami i” ninna muse.

Lam dipatakkas amantaPandita, disurathon do di dorpi i, goar-goar ni anakkon ni oppuSakkot, si Holong, si Asi, si Mian, si Ulian, siLomuk. Tippas ma…!!, ngongong amanta pandita. Patut do dang dibaen tikting na monding digareja, jala patutt do serom oppuHamonangan, leder ni ina hanna hatiha disukkun diha ni oppuSakkot na monding. “Siappudannna” ninna hatiha i.

Hatop, mulak amanta pandita, dang tardoksa manang aha, ue tahe ikkon songoni ma hagaleon ni roha holan alani matean biang.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s