TORSA

Jujur partikkian di ari minggu

Pukul 08:30

Dihumalaputi amanJamordong ma pasikkophon ulaonna padippos-dippos lereng ni si Jamordong. Di ida nanJamorodong nga sai maos gumasuksak marhobas-hobas sanakkaning. Sipata mangupir ibana mida nanJamorodong. Maos, puas-pais. Marputar tusan marputar tuson di jolo ni kassa bolak i. Sipata bohina di padenggan-denggan, sipata sisilonna di lukkiti.

“Pa, bereng jo satokkin, nga pas be bajukkon tu jas mi annon?” ninna NaiJamorodong, dung ro amanJamrodong tu bilut nasida.

“Nga denggan be sude i” ninna mangalusi. Paula so di ida.

Disarathon ibana adduk lao martapian.

“Pa, bereng jo satokkin, dia dope na hurang” ninna NanJamordong muse sahali nari.

Dipaso amanJamordong lakkana. Diboto do hasomalan ni niolina i, ai molo nga apala disukkun dua hali namarlapatan ma i ikkon dialusi dohot denggan. Ai olo do annon ala nin na saotik i gabe murhing lao tu gareja. Lobian, sahat rodi na mulak sian gareja dang masipakkulingan.

“Bereng ma jo peyek ni kabayakkon, denggan do di ida ho bunga na i?” ninna muse manukkun

“Denggan” ninna amanJamorodng mangalusi. Lobi sa jom holan marhobas-hobas, dang mar na sidung.

Dapot tikkina borhat ma nasida tu gareja.

Pukkul 09:30

Dang piga-piga halak dope na ro parminggu. Songoni do huroa tikki ni halak batak on. Sude do jam karet, meddat, dang hea pas. Didok jam sappulu parmingguon alai songon hasomalan olo dotu jom satonga sampulu sada. Datung mandok asa tor manjaha bibel NanJamordong di gareja asa sai dipatibu sahat. Nda holan asa boi do di ida ibana sude pahean ni donganna ina.Tutu ma nian, holan hundul Nai Maralus–donganna parlogu dua– dilabbungna datung bukku ende manang bibel di bukka.

Dang dao sian pahean, sipatu, mas, sanggul na asing dope.

“Songon na uli bajum eda, na dapot bonus do ito amanJamordong?” ninna Naimaralus

“Hamu nian eda, bohama parulina” ninna mangalusi alai anggo dirohana nunga tung las.

“Ue, bereng ma neh eda, lao do au nantoari tu Onan manuhor bahan kebaya na baru, huida uli dipakke sahalak ina di tipi” ninna NaiMaralus.

“Didia diida ho eda, ai au pe nga hutuhor bahanna, nang songketna” ninna NanJamordong. Dia tutui, hata gabus do. Bohama asa unang talu do tu NaiMaralus.

Tep, dang piga lelelngnai, mullop ma muse NaiJatikkos, martas nabolon jala marsanggul sasak na bolon. Dungi horungna marlinong, uhut siatuna na timbo.

“Hurippu nga dipukka parmingguonon” ninna ibana, hut dipadenggan saotik badakna.

“Anggo so ro dope ho eda tang mulaion parmingguon on” ninna NanJamordong mangalusi. Dang dao sian donganna na dua on, tor dipukka ma nonang.

“Imadah eda, ibban na tu hamu nadua do asa hupaboa i” ninna mandok donganna.

Lalap ma nasida marnonang sahat rodi na dipukka parmingguon.

Pukkul 10:30

Dijouhon paragenda ma asa marende punguan ina parari kamis. Dungi hehe ma OppuHalasson, di tarik ma tone ni edde on, huhut ma di baen tandana asa jonjong sude parari kamis. Andorang so hehe ibana, dipadenggan NaiJamordong jo saleddangna, ditari tu siamun nang tu hambirang patikos-tikkoshon parpeakna.

Sasahali di husiphon tu nadipudina “Teleng sanggul hi eda?” ninna manukkun. Mangupir inanta nadipudi i

Aut sura adong lima songon NanJamordong on, ra, olo do satonga jom holan marhobas-hobas uhut manarik ton dirijen na i. Uleleng sian namarende i.

Pukkul 11:00

Massai tabo ma nian inang Pandita on na marjamita i. Sipata mekkel ruas i dibaen, angon-angon suara i. Alai toppu disonggak sian ginjang. Ia so i diarahon ruas i manjahahon na tarsurat di bukku nabadia i. Gabe dang mondohondok ruas i.

“Ai sai holan i do huida sibong ni inang Pandita on, da marganti ma nian nanggo salahi dua bulan?” ninna NanJamordong tu NanJatikkos, marhusip

“Au pe, dang nanggo hatuhorsa mas, ningon?” ninna mangalusi

“Bereng ma neh eda, inanta sintua sijaha tikting –NaiHasundutan an, bagak bah model ni kabaya na i bah”

“Ido eda, apala boruna na di Bandung i do manjait i, ninna adong tukkang jait na malo disan” ninna NaiJatikkos mangalusi.

“Alai umbagag do kabaya mi eda” ninna Nanjamordong

“Hamu nian eda”

“Ai di jabu nise hamu mararisan eda” ninna NanJamordong, tong marhusip-husip

“Dijabu ni hula-hula an, amaniLamdenggan, boha huroa?”

“Daong, na manukkun do, na huida do NaiHasomalan, donganmu sa arisan an humasiksak di onan manuhiri situhoron” ninna mangalusi

Songoni manasida marhusip-husip dibangkuna be.

Dungi didok NanJamordong muse”leleng ma inanta pandita on marjamita, bosan iba” ninna marungut-ungut

Pukkul 13:00

“Pa, tabo do ende nami i?” ninna NanJamordong manukkun niolina hatiha di motor dope nasida.

“Tabo, ai sude ende na lao mamuji Tuhan i, tung na tabo do sude, dang adong na hurang”

“Boha baju nami, uli do?, sitelan nise na ummuli”

“Dia ma pinarrohanon i da inang, tinggalna molo nga marende hamu ba pinasip, nilapati endemuna i”

“Ai dang nanggo diboto ho marnida baju na denggan manang na roa?” ninna muse manukkun

“Dia niantusan i, dang pinarrohahon, ai so naniula molo marminggu iba”

“Jei aha do hape lapatanmu mar minggu, nanggo marnida baju na uli pe dang boi dibedahon ho?”

“Bah?!”

“Ima hamu amai, ganup minggu tu gareja alai memereng baju na denggan pe dang boi, manang aha  do hape diparrohahon hamu” ninna Nanjamordong marbete-bete.

Ujungna rap sip nasida nadua di motor i sahat ro di jabu.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s