Nonang di Lapo Tuak

“Alai hata di hita ma jo on”

Ninna amaniHasoan. Dungi sip. Dialsik sigaretna paima so ditorushon hatana. Ianggo donganna dipaima do udut ni hatana i. “Ai diboto hamu do, halak hita saonari?” ninna ibana manguduti. Dang haru binoto manang tudia do lao ni pakkataiaonna. So jo muse, dungi dihiddat galasna, didorguk.

Disuhuthon ibana ma parsorion ni donganna, di suhuhuthon muse hamajuon ni halak hita di tano parserahan on. Diboto sude!. Songoni nang amaniPartogi, omma pa tolu galashon di parumar ibana galas i. Sasahali di jahuti ibana pandohan ni amaniHasoan. Ninna dongan molo nga tolu galas rumar, ba  tabba do parbinotoan. Ai boi nihataan naso ni ida ni mata naso binege ni pinggol. Adong muse dope dongan, moloattar rumar dua galas tabba parbinotoanna mar hata inggiris nang marhata sina. Marsikkat soring nasida masibaen nonangna be. “Unang sai akka pangula i –dongan partohonan, nidokna–, hatai hamu” ninna amani Partogi. Huroa sahat do nonang di lapo i tu sitiop tohonan. Dang haru takkas ise na mamukka nonang i, ai songoni do nonang dilapo, rarat songon na manutung ri.

Dang na paroa-roahon rupani –ninna nasida adong do parniulaan ni dongan partohonan on na hurang tama–, holan na martaringot sambing do. Alai ganup rupani dimulai sada suhutan sai didok do “Hata di hita ma on dah, unang sahat tu duru an” ninna amaniHasoan dung sidung ibana marsuhutan.

Dang ni hilala nga onom jom di lapo. Ni dilo tu siteleng ni naiHumolong nga rumar, rodi huana pe marsik. Songoni nang tuak, tading holan raruna. Alai, ipe nga dohot di hilhili.

“Imadah ito, songon nidok ni situa-tua do dah ito, Parlapo, NaiHumolong, Ba sipanganon na pinarademunaon, sai pamurnas ma i tu daging saudara tu bohi, sipalomak ibbulu, sipaneang holi-holi” ninna amaniPartogi

“Ah, lae on, unang sahat-sahat tu ibbulu hatamunai, sotung gabe songon bodat iba annon, sai tubu ibbulu” ninna amaniSoloman.

“Ima tutubah, nga songon na neang holi-holi on” ninna amaniHasoan, ai ibana gumodang manobur tuak i.
“Olo ito, las do roha paradehonsa” ninna Naihumolong
“Alai dah, jolo ni nangnang do asa ninungnung, jolo pinangan do asa sinukkun” ninna amaniParogi muse
“Aha ma i ito, na hurang sira do tabbul na i?”
“Tabo do ito, pas do anggp sirana, nahudok, manukkun majo tu hamu, ia padomu ito ma tu bon si nantoari i apala minuman nami sadari on, boha?”
“Imadah ito, hata dihita ma on, jala holan tu hamu do huhatahon on, ba habis lebbaran ni bukkun bon, je tudia be suraton bon muna sadarion?”
“Unang songoni ito”
“Ai ibban na tu hamu do asa olo iba mangalean marutang, anggo tu halakan do, dang porsea iba. Alai hata di hita ma on, unang sahat tu duru” ninna naiHumolong
“Bah, nga gabe dohot parlapo mandok songoni, jei dang boi be bon sadarion?”
“Olo ma ito amaniHasoan, adong do nian piga opsi na boi pillitonmuna molo naikkon marbon hamu, ipe molo olo hamu” ninna naiHumolong huhut dibukka bukku bonna.

“Bah, sai hira anggota dewan do hamu huida” ninna amaniPartogi
“Asa win-win solusion” ninna NaiHumolong muse, huroa jotjot do ibana manonton tipi je diantusi do rupani piga istila na baru binege. Ia so i, ala massam ni jolma na ro tu lapo i ba tabba ma parbinotoanna.
“Bah, ai dia do muse…baen ma ito, dia ma sibaen na denggan”
“Opsi A, ikkon gararon muna do minuman muna saulakon, alana dang manuhor tiga-tiga dope hami, aha do allaongon ni panuhor marsogot. Doppon hamu dirimuna, ai arga ni situhoron, implasi dohot hagutturon ni politik sinuaeng on gabe tabba do argani andaliman” ninna naiHumolong. Huroa sahat do pikkiranna tu implasi.

“Opsi na asing aha muse” ninna amaniJarikkot, huhut dijukkiti iponna, huroa adong solot suha ni tabbul i
“Opsi paduahon, Opsi B, ba tadikkon hamu sada motor muna i, asa adong gadeonon” ninna
“Bah, nga repot..”
“Unang sanga anarkis au, ai bon muna bulan na salpu so margarar dope, alani i gabe sega Jurnal Pembukuanku. Jala ikkon auditon nama sude pembukuan on” ninna NaiHumolong muse.
“Adong dope opsi na asing sian i?” ninna amaniPartogi
“Adong, Opsi C, ima  ikkon hamu mangula di jabu namion, pinomat tolu ari be, nadia pillitonmuna?” ninna NaiHumolong, huhut di bukkai sasalebbar bukku bon i, mangalului goar ni nasida na opat.

“Bah, nga gabe tu roha, ai so holan hami na marutang”
“Olo ma, alai hamudo kreditor naumbalga jala penunggak na ullengna, halakan saminggu dung D.O do hape hamu olo marbulan-bulan” ninna naiHumolong mangalusi
“Bah, ai gok ma istila ni parlapoon, aha maksud muna D. O, deliperi order do?, ai so hea hami mambukkusi dah..” ninna amaniJarikkot, dang dijalo ibana hatani parlapo i.
“Dia do muse, D. O  DiOssop. Ai jolo diossop hamu do asa digara hamu kan?, boa porlu mardalan dep kolektor manungguli utang muna on?, manang ikkon pailiton nama hamu na opat?” ninna NaiHumolong
“Ibban na tu hamu do asa ni lehon marutang leleng” ninna NaiHumolong, huhut di pissiti kalkulatorna

“Toe ma lae, leatton ma i, sotung so boi hita marmitu minggu na ro” ninna AmaniPartogi
“Sadia huroa utang nami”
“Dua ratus pitu pulu lima ribu, molo ta etong do dohot bungana, gabe tolu ratus ribu ma holan tuak, ai bunga na i hu sesuaihon do tu suku bunga Bank Indonesia, pos rohamuna dang songon na asing au” ninna NaiHumolong.

Didadap amaniHasoan ma doppetna, dungi di pahaluar ma kartu kredit. “Nion ito, onmma baen manggarar, padomu ma sude utang nami dohot utang ni hombar balok an, au pe manggarar, ososhon ma nah” ninna

“Bah, ai mandok sipiga do hamu nuaeng, tu dia do ososhononkon kartu muna i, tu suhi-suhi ni siteleng an ma ni ososhon dah” ninna ibana marungut-ungut.

“Omma hamu nian, ia naeng ginarar utang  dang tarjalo hamu. Holan lapo muna on nama di luat on naso boi mangososhon kartu kredit. Alai ibban na tu hamu do hupabo i, hata di hita ma on” ninna amaniHasoan Dang tardok naiHumolong be, gabe marutang ma muse nasida.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s