TORSA

Anggota Dewan

“Obrolan Lapo Tuak”

Tong dope nonang di humaliang ni Lapo Tuak suhutan on. Datung na paboa-boahon na holan tu lapo tuak iba, alai na mandok, tung mansai godangdo nonang molo nga hundul iba di lapo. Sai adong do suhutan ni dongan. Godang sihataan, iba naummalo jala lupa arsak ni roha molo nga rap mekkel dohot dongan. Jolo ni nangnang asa ninungnung, jolo pinangan asa nisukkun, boi marutang manang na dang.

Sahat ma namartaringot tu akka dongan magodang. Nasa nabinoto didia akka dongan on maringanan jala ulaonna saonari, pinaboa do dah. Dang makkurangi jala dang manambai. “Ai diingot lae dope tahe donganta si Talpe?, apala donganmu mangintip hian do bayon di Passur Pakkat” ninna dongan huhut mekkel.

“Ah, tu sadaan ma ho. Datung hea ni ula songoni” ningon hatop mangalusi. Godang do tutu si ingoton hatiha dakdanak iba najolo. Sai parjolo do iba lao tu passur, martapian, alai sai umpudi mulak. Ni gosgos do na so sigosgoson, bohama asa songon na leleng na maridi on. Pamerengan mampar. Rap sa passur do antong borua dohot baoa disi.

“Ai dongan ta si Bulha, nga Kapten ateh, hape anggo najolo molo ni ingot, sai dipudi hian do huddul on, ni rippu do dang hasea be bayon. Banggam na sun..–banggam=bodoh ( bahasa hamian, Pakkat), olo muse modom di kalas”

“Nitta do i lae, ba tabereng ma nuaeng, nga Kapiten” ninna Amani Tolhas, dongan marnonang on.

“Imadah, hape iba boi dohonon adong do utohutok niba, ni ida ma saonari, nda holan mamutor baut do binoto?” nikku huhut hu dorguk muse, pa opat galas on ma rumar.

“Na hummebat dope si donganta, Benget, nunga Anggota Dewan ninna di Jakarta ateh, ise tahe manuhuthon bayon tu ahu, Lae do tahe?” ninna amaniRumana, di jopput muse tabbul i.

“Olo, au do manuhuthon i” nikku

“Jago ma baea i ateh, hape anggo na jolo parsipsip do. Saonari ibana ma sidok na tutu. Ima tahe nidok jolma na burju tobok” ninna amaniTolhas, paula songon na di piltik gitar.

“Ai anggo dang burju tobok, boi do Anggota Dewan” nikku

“Sai laos ma dah, nunga Anggota Dewan, burju muse marhuria, anggo songoni do, boi do tolu periode i, ale ikkon gatti partai” ninna NaiFitri, parlapo. Huroa dipaihut-ihut ibana do pakkataion nami i.

“Ai so jo tahe Lae amaniPartogi, sian partai dia do dibuat ibana?” ninna amaniTolhas

“Bah, ai aha sukkunanmu isi, adong mago partaim?” nikku mangalusi
“On ma ho, sai tor pago do mangalusi, denggan do iba manukkun” ninna amaniTolhas, mekkel dongan na asing mambege alushi

“Ba, Olo ma, sai hira na uso-uso ho mago ugasan mu, sibaen partai na be do dah” nikku muse.
“Nanidok rupani, asa binoto do songon dia do partai ni si Benget, dongata na burju tobok i” ninna ibana

“Ai so pola marpartai mambuat dewan nueng on” nikku
“Ai dia do ho, peol nai. Haru hepeng pe ikkon  gok do tusi, mambuat nomor calon nang malamar tu partai” ninna ibana muse.

“Ima hebat ni kedan ta on, hubege sude do donganna manolak di Anggota Dewan i, hape holan ibana do na olo manjalo, ai ninna donganna holan ibana do na talup tusi”
“Bah…, gok ni bual mi…sobur ma tuak mi, Dewan beguahai” ninna amanSakkot
“Dang porsea ho tu ahu?, anggo dang, boasa dongananmu ahu?” nikku mangalusi.
“Olo ma dah, adong ninna Anggota Dewan dang adong partai na” ninna amanSakkot muse
“Sukkun attong denggan, sian dia dalanna asa hupatorang, ro ho tu jabu” nikku muse, huhut serom

“Ollobolokni, sigodang hata, baen ma nih Dewan Beguahai…nabinoto jala na nialaman, ikkon adong do partaina. Songon iba ma, ala nomor ni sipatu do nomor niba di PartaiSolakku gabe dang monang iba di Dewan, anggo nomor sada nami, monang do” ninna ibana. Huroa hea do amaniTolhas on dohot gabe CALEG, hape ala nomor sipatu–istila tu nomor urut besar di partai– ba talu ma tutu.

“Na hudok, anggota Dewan Koinonia do kedan ta i di gereja nami” nikku mangalusi.
“Ah..narittik, nirippu Dewan Perwakilan Rakyat hape Dewan Koinonia do…ollobolokni, baen tuak i parlapo di narittik on” ninna ibana huhut di tarik lagu.

 

1 thought on “Anggota Dewan”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s