True Story

S a k k o t a n

Sakkotan: Tempat Jemuran Kain

 

Tung mansai las do rohani si Tio, ala boi do hape ibana manorushon parsikkolaann tu sikkola atas.  Sian na menek nga marsitta-sitta ikkon sikkola satibbona. Alai molo di ingot natua-tuana, ra, holan diangan-anganna do sitta-sitta na i. Takkas do diboto ibana naso tuk gogo ni amana pasikkolahossa. Ido na hinalassonna.

Nangpe ikkon di jabu ni sisolhot na olo pasikkolahon ibana i, manang na piga taon tujolo, dihalashon do asalma sikkola.  Tutu ma nian, dang masa marsimulak tu jabu ni inongna ganup bulan,–songon namasa di ula parsikkola hatiha i–. Ia hutana atttar  holang do Pakkat, pola do olat ni ualu jom mardalan. Ai so masa motor, jala dang ditanda halak dope listirik di hutana.

 

Lampu togok, ia so i lampu sitarongkeng i dope masa. Naginoaran tipi, dang hea diida nasida i, alai hea do tarbege tu nasida na saluat ima na adong ninna jolma na metmet boi masuk tu poti-poti jala boi muse makkatai nang marende. Anggo diroha nasida tung na so masa do i, bah molo jolma, jolma ma, jolma beguaha ma i molo boi masuk tu poti-poti i. Jolma beguattuk na ma ra i, ido anggo pamotoan nasida.

Dibotari na, rambon-rambon manuk, sahat si Tio tu jabu ni AmanJatikkos, di Pakkat. Tutu, tardok do namora natinopotna on, adong tipi jala nga marlistirik jabu i. Olat ni i, nga tardok namora.

 

Longan situtu si Tio holan dibereng tipi ni parjabu i, “Bah tutu….nion do hape nanidok ni jolma na dihutaan, boi masuk jolma tu poti-poti, nunga porsea be ahu ala nunga hu ida”. Ninna  dibagas rohana.

“Ai molo haluar nasida sian bagasan poti on, dia ma ulaning dalanna, jala boha do naeng, met-met ni jolma”, sai ima dirohani si Tio sahat tu namodom. Dang marnapit-pit be simalolongna holan mamikkiri namasa na baru ni idana i.

 

Dimanogot nai, ro ma nantulangna,–NanJatikkos– manjouhon. Didok “Tio…jomurhon jo bere akka baju-baju i, asa hatop mahiang”

Hatop do diolohon si Tio, jala di hindat ibana ma ebber panussian on tu jolo ni jabu i.

 

Tarngongong ibana, dibereng  tu ginjang. Di ranap tu hambirang – siamun, tu hombar jabu dang adong jolma, lao sukkunonna.

“Bah…tibbo ni sakkotan, ai jolma beguaha nama parhuta on, songoni tibbo ni sakkotan” ninna ibana  dibagas rohana.

“Boha do baenon manjomurhon akka abit on? ikkon adong nama jukkit-jukkit” ninna  ibana muse dibagas rohana. Jala sai dilului ma dalan laho manjomurhon baju-baju on. Nunga tung leleng ibana namarpikkir on.  Disukkun ma tu jabu, tu nantulangna

 

“Nantulang….dang hajomurhon au baju on, tok tibbo-tibbo hian sakkotanna, ai ikkon martangga do au….”

“Sakkotan dia?”

“Bereng ma neh, Nantulang, tibbo ni sakkotaan……” ninna si Tion patuduhon sakkotan nanidokna i

 

“Ai dang sakkotan i Tio, dang tusi jomurhononmu, tiang ni listrik do i…nga tok jim ho dah….”. Mekkel NanJatikkos. Hape tian ni listrik si tolu kabel do dipatuduhon.



1 thought on “S a k k o t a n”

  1. nga songon na huboto on i tulang, baru ro ibana sian huta na songon na dicarita ni tulang i, dibereng ma tiang listrik dohot tiang telepon, gabe didokma,
    Ue…bea, timbo-timbo ma jomuran di huta muna on..???

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s