Ipon Palsu

Suhutan di hita ma jo on, unang haruar sian lapo on ateh….

Molo nunga hundul amanJatikkos  di lapo, sai tor las do roha. Tung mansai godang doturi-turian ni on,  sobinoto sian dia dipapungu-pungu. Ido asa sai las roha mida ibana. Ai sitau margahargak nama iba mengkel. Songoni ma dua ari na salpu, sai pinaima harorona alai dang marna mullop. Maos pinatonggor simalolong tu heppon ni Sina on, atik adong tonana mandok ro.

Tutu ma nian, holan ditaringoti amaniJatolhas ibana, nga tor mullop dialaman i, “Ah, ai jouon gaja do nian bayon” ninna ibana. Lapatanna datung na manjou gaja iba tu ibana, alai nanidokna, topet nitaringota, ba tor mullop. Ia so i, holan dijou sahali tor ro. Nian datung hea dope iba manjou gaja. Lioat i.

“Ai leleng ma ho puang, nga bari-bari tuak on, jala dang adong mantolui” ninna amani Jatolhas, —marsuara tolu, nidokna–. Nian binoto do sian dia amaniaJatikkos sadari on, ai nda na dohot do ibana marulaon adat di Jakarta, ima apala par-tungganeonna.

“Imadah,  au pe nga tok ulu. Leleng, maredet-edet adat batak di Jakarta on, gabe dohot iba sai tangging, mardomu gabe au mandongani tulang Oppu ni Jagabe, ro sian huta” ninna, huhut dijalo sipanganon tu parlapo, dung hundul ibana.

“Sian pesta ho, hape tor mangido mangan muse dison, ai aha nama disiubeon mi” ninna dongan, huhut si sitel gitarna.
“Olo bah, ai dang mangan sanangkaning, adong na geok gabe so lakku mangan” ninna ibana.
“Ahai na geok i, ninna roha sude do geok diho, suhuthon ma jo” nikku

“Ah, ingkon jolo mangan do iba manuhuthon on, ai olo gabe dang langku mangan” ninna alai dipukka ma suhutanna

*    *    *

Ditogu amaniJatikkos ma OppuJagabe, –partulangonna– mambuat sipanganon. Antusi hamuma na parasmanan on, nda sisonduk diibana be do?. Ditahui OppuJagabe  ma supna, ai ninna i nama naboi tarhilhilna. Dungi hutaruhon muse ibana tu hundulanna. Pola do leleng au mulak tu hundulan, ala nga marganjang na masisonduk indahan on. Tung na burju ma tahe amaniJatikkos na martulang on.

Dungi dibuat amanJatikkos ma pingganna jala di buat nang indahanna. Dungkon i, di dongani oppuJagabe mangan. Ai songoni do pesta di Jakarta on, siuat indahanna be jala sibuat hundulanna be. Dang songon ni hita an, adong parhobas paradehon.

“Bah, ai boasa dang mangan dope Tulang, adong dope na hurang loppan mi?” ninna, ala di ida, sai so do OppuJagabe, dang marna dipangan sipanganonna i.
“Daong bere, nga singkop be” ninna mangalusi

“Alani aha do hape, Tulang?”
“Imadah, dang tarallang be sipanganon on”
“Ai sup na do i”
“On ma bere sahit ni namatua on, Sasadai nama pinarbaga manghilhil, hape tingki manahu hua ni sup nai, ba, madekdek huroa ipon-palsu i tu bagasan, laos mago” ninna Oppu ni Jagabe mangalusi.

“Jei tu sup nai do madabu, Tulang?” ninna amaniJatikkos huhut disigati pingganna, atik boha tarsondukna nakkaning hatiha mambuat sup ibana.

“Gabe tudia?, nga loja au mandiori” ninna Oppu ni daJagabe muse.

4 pemikiran pada “Ipon Palsu

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s