TORSA

Jempek Hata dohonon

Adong do parjambaran na ingkon dapotan ganup na ro tu ulaon adat di halak batak. Ulaon na met-met, nang ulaon na balga. Ima jambar hata. Jala sipata sai rumingkot do parjabaran nasada on sian parjambaran na asing, songon jambar juhut. Ninna roha, jambar na sasada on do mambaen leleng ulaon ni halak batak. Datung na mangulosi, dohot na asing. Hape, ia dilean partingkian, bah ganup be do manjua. Ia soi marsituganan. Sude mandohoti ulaon i, sai ingkon ris do anggo jambar nasada on. Ido alana, molo manghatai dongan, di panimpuli ni panghataionna sai didok do “hatangki hata tambaan” na marlapatan, dilean tingki tu donganna lao mandok hata. Olo do tubu hata na hurang tabo begeon molo pola adong naso dilean manghatai. Nata pe rumani, sai alus na jempek do dipandok be. “Sitombol ma hita” lapatanna sada hata ma hita, ima i.

Di sada luat adong ma masa ulaon. Songon hatangku na di ginjang i, dung sidung marsipanganon dipungka ma ulaon manghatai. Songoni do adat ni batak on, sai jolo marsipanganon do asa marsirarian. Tutu ma nian, molo nga bosur iba, manang aha pe nanaeng sihataan sitau marujung tu na denggan ma i annon.

“Santabi ma dihita saluhut na pungu dison, ta pungka ma panghataionta molo tung adong annon angka sirarian, jempek hata dohonon, ba dumenggan maa dung sidung manghatai na marboho” ninna protokol, uhut dipadenggan parhundulna

“Ima tutu, dihita namardongan tubu, jempek hata dohonon, ba ninna rohanian molo tung disangkapi punguan,…” ninna protokol muse. Marganjang na manghatai on.

 

“Ninna roha, jempek hata dohonon, jolo tapasahat ma jo panghataion on tu raja ni pamoruonta, manang songon dia pe rumang ni ulaon na naeng si ulaon, ba nasida do annon anggo na mangulahon” ninna amaniTulpe dung jolo marsantabi ibana.

“Ba, i ma tutu, nga na denggan i Anggia, jempek hata dohonon, ido tutu, saonari pe hulean hami ma partingkian on tu hamu raja ni pamoruon nami, jempek hata dohonon nuaeng, ba hamu do marsogot mangulahon siulaon on, jei ingkon jolo begeon nami do hata muna, marsiaturan ma hamu. Jempek hata dohonon nuaeng, harop do roha nami sada roha hamu, anggo hami hula-hula muna tung marhaposan tu hamu do…” ninna ketua, AmaniBatara. Jempek hata dohonon, ninna alai marganjang-ganjang mandok hata.

 

Dung rade raja ni pamoruon, manghatai ma sahalak sian utusan.

“Ima tutu, tuhamu rajani hula-hula nami, ba jempek hata dohonon nuaeng, molo nunga tung raja i na marsuruh, ba songon sian hami angka boru muna, jempek hata dohonon nuaeng sitolopi na uli do hami. Jempek hata dohonon, saluhutna ulaon na naeng tapatupa on rade do hami mangulahon i, jempek hata dohonon nuaeng, na dia ma siulaonon nami, ba jempek hata dohonon, marsuru ma raja i. Songoni ma sian au, jempek hata dohonon, ala adong do hita piga-piga halak dison, jempek hata dohonon, ba tama do molo ganup hita mandoh hatana mangalusi hula-hulanta, jempek hata dohonon, songon nidok ni rajai nagkinon, ba jempek hata dohonon, hita do sude mangulahon ulaon on, jempek hata dohonon, di tambai pariban nami. Tu horong ni ina ma, hamu angka pariban nai, jempek hata dohonon, ro hamu tuson, marsuru hula-hulai. Jempek hata dohonon, hamu angka boru ni rajai do sitiop puro-puro, jempek hata dohonon baen hamu alusmuna” ninna amaniPurnama. Dungi dipanotnoti sada-sada paribanna di punguan i

“Hemm…ehm….jadi, ima tutu rajanami, Raja ni Hula-hulanami, jempek hata dohonon, nga tung satolop hami saluhutna songon pamoruon muna, jempek hata dohonon, songon naung tinariahon ni anggi nami nangkin, amaniPurnama ido tutu, jempek hata dohonon, naung saroha do hami mangulahon i. Jempek hata dohonon, songoni ma jolo sian hami, ditambai dongan” ninna amaniHarintaran. Tong marsiberengan na marpariban. Dialusi nanget sian pudi, “Jempek hata dohonon, sitombol ma hita, Akkang” ninna NaiFitri uhut manginsurut tu pudi. Biar rohana mandok hatana.

Songoni ma dipamamasa panghataion i. Ganup mandok hata sai didok do, jempek hata dohonon, alai maredet-edet pahataiaoni.

Sahat ma panghataion tu namardongan tubu. Didok OppuHumuntal ma hatana. “Imatutu tuhita saluhutna, jempek hata dohonon, nunga ta bege hata ni pamoruon ta, ba jempek hata dohonon saonari tu hita nama jempek hata dohonon, ninna roha nian mar wilayah-wilayah ma hita pasahathon pandapot. Jempek hata dohonon asa unang marganjang be pakkataiaon on, pinasahat ma parjolo tu wilayah sampulu tolu, jempek hata dohonon na hatop nai ma baen hamu, tor hatahon hamu ma impolana, mamereng hita tu tingki jempek hata dohonon asa sada ma hamu pasahatho, jempek hata dohonon mauliate ma.” ninna tong marganjang hata i.

 

“Mauliate ma amanguda, jempek hata dohonon na denggan do tutu pandohan ni pamoruon ta i, ba jempek hata dohonon nuaeng saguru dihita na mardongan tubu do. Jala ia hami sian wilayah sampulu tolu, jempek hata dohonon sipanolopi na uli do hami. Jempek hata dohonon, molo tung siat pangidoan nian, ala madomu holang huta nami, jempek hata dohonon, nasa na tarulahon hami, ulahonon nami do i. Songon pandok ni situa-tua ba, tinallik ninna huling-huling tarida holi-holi, hamu do tutu amanguda na marulaon, hami haha dolimuna ma panamboli, jempek hata dohonon, rade ma hami disi. Alai, marpanukkun hita, ai adong dope dongan tubutta ha tope ro tu ulaon on, jempek hata dohonon tung bohape dah, dang na manghurangi palilung iba nuaeng, jempek hata dohonon ingkon sai jolo sian nasida do asa tu hami. Jempek hata dohonon, ia hami na di wilayah sampulu tolu holan piga ruma tanggs do, jempek hata dohonon, alai nang pe songoni, jempek hata dohonon, molo sa tahi do hita mangulahon sa, jempek hata dohonon, na tupa do sude. Jempek hata dohonon, songoni ma jo saotik sian hami, jempek hata dohonon hatakki-hata tambaan, jempek hata dohonon…” ninna amaniSoholsoan.

Songoni ma na manghatai on, maru tuk botari, sai jempek hata dohonon ninna alai sude do marganjang-ganjang di pandohi be.

On pe pinasidung ma surat on, jempek hata dohonon nuaeng sotung bosan angka dongan panjaha ala ni paganjang hu. Jempek hata dohonon tutu, songon dia pe rumang ni na husurathon on, jempek hata dohonon ndada na manghata jolma, alai jempek hata dohonon, ba ima namasa di luat i. Jempek hata dohonon, hatakkon-hata tambaan ma on ateh, jempek hata dohonon, mauliate ma.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s