Beranda » Kategori » ADAT » Dua jari baen hamu

Dua jari baen hamu

Disada tingki di ulaon paradatan ni halak batak di Jakarta.

 

Pinungka  ma nonang dohot amanJatikkos, ai on nama daonlalap. Aut sura biboan ugasan na pinature ni halak Japang i, nda nunga adong dongan halilian paima so dapot tingki?. Bohama, ai parhundulon niba di hula-hula namarhahaanggi ni na pangolihon anak do. Jam lima potang ari pe asa mangulosi. Lima tu onom jom ma iba di ulaon on, mamereng halak manontori, marjogeti sibaen baget na be. Datung hata ungut-ungut on. Songon on ma rumang ni paradaton ni halak batak. Sude hula-hula nunga mangarade jala marnatampak dialaman andorang so marsipanganon, alai di jam lima pe annon dapotan partingkian lao mangulosi. Boha baenon.

 

Simpul marsipanganon, disoarahon protokol ni paranak ma asa naeng marhara dongan tubu mangido pangurupion sian dongan tubu, ala sidada anak-sisada boru nasida. Molo di luat na asing didok marmeme parumaen, jala adong muse mandok papungu tumpak.  Dang binoto na dia do  pandohan na tumama, alai songon hata ni na malo, asing ninna jampalan sing do duhutna, asing huta asing do adatna. Ba molo dihuta nabinotoon rupani huhut do dipalu musik. Manang aha pe taho dipandohi parmusik i, manang songon dia pe rumang ni i, alai manortor na ninna goar ni i. Sipata geok do, songon na marnortor do nasida alai loguna sian hamian par papua, ia so i posso-posso, selayang pandang, terrajana. Ninna dongan, hea muse do dibege lagu keong rassun diendehon–baru kenal sudah ngajak tidur–. Nga maup timba tu dolok.

 

Bohabaenon, ninna dongan, OppuHasolotan. On ma na masa, beta na marposso-posso on, ninna ibana muse. Didok, ala boru ibana di ulaon i, ba boima ibana marposso-posso.

 

“Tu hamu anak dohot parumaen nami” ninna protokol dung sidung na papunguhon tumpak on, huhut dipajok tu diadathon on. Dang binoto boasa pola di pajonok, molo didok hurang dibege, ba, songoni nama gogo ni suara.

“Buat hamu ma inang, sagodang-ni godangna, gomak hamuma, alai ingkon dua jari” ninna amanta protokol on muse. “Holan dua jari do”, ninna sahali nai, ala di ida parumaen na i mariberengan dohot niolina.

 

Dang tartahan au be engkelhu umbege hata i. Dibereng dongan, jala longang rohana, dirimpu mengkel au ala huida na maila-ila pengantin i mambuat sian bahul-bahul inangan ni tumpak i.

“Ai boasa mengkel ho ampara”

“Mengekel ala geok” ningku mangalusi, sai hut serom mambege soara ni amanta protokol mandok “Buat hamu ma, Parumaen, sada…dua..tolu…” ninna mangalean aba-aba, sai hira na marlumba lari.

 

“Olo ma, aha na geok i, ai anggo mengkel jolma dang alani na geok, na rintik do i, nabinoto dang na rintik ho, ai so sidonganan na rintik, olo gabe dohot iba rintik” ninna amanJatikkos muse, alai sai serom au di ida.

“Ha..ha..ha ”

“Bah, naung tutu do rintik ho?”

“Ai dang dibege ho nanidok ni protokol i?” ningku

“Bah, ai boha huroa, datung adong na sala, lumobi  geok”

“Di ho dang geok, jei dang mengkel ho, alai diau, geok do. Ido asa mengkel au” ningku mangalusi

 

“Ah, nga dohot ho huroa horong  ni na rintik” inna ibana huhut dijalo kopi sian sahalak inanta na mamboan serek ni kopi. Ala dangol-dangol sisilon do kopi on, di inum ibana. Sidung mardalan kopi, ro ma laffet, dungi hassang nang sipanganon na metmet na asing.

“Ai na dipingkir amanta an do huroa pancopet parumaen na i” ningku

“Bah, ai boasa dohononmu songoni, sotung dibege hasuhutan i, parsoalan annon” ninna ibana, maru singgokan ala mengkel hut minum

 

“Bah, rimangi jo hata ni amanta i. Buat hamuma sagodang ni godangna, tor gomak hamu ma, Parumaen. Alai ingkon holan dua jari do baenon muna manggomak. Ai da angka pencopet do boi manggomak dohot dua jari-jari?. Manang na hea do diida parumaenna i mancopet?, isa so i na somal do amanta i mangulahon songoni,  dungi di ingot pangalahona gabe didok songoni. Manang na mangajari gabe pencopet do parumaenna i?.  Manggomak hepeng dohot dua jari. Asa somal manduajarihon dompet ni amantana di jabu.  Pasuman ma jo, Fuang. Botoonmu ma na sala hatangki manang nan tutu” ningku mangalusi.

 

“E..nga toho ho na rintik, nirimpu alani aha ho mengkel” ninna ibana, “Alai, toho do tutu bah, boha do manggomak dohot dua jari, ate?” ninna ibana muse huhut dipasuman.

 

Tippas! ma i.

 

Ai dang hea dope binege pandohan sisongoni, lumobi di ulaon adat. Dang binoto tudia do nidok ni hata i. Najolo, “Gomak hamu ma parumaen, sagodang-ni godangna buat hamu, ai tanda silas ni roha sian natorop do i” ninna do. Alai, maila-ila do parumaen na on mambuat, dibuat ma saotik sian ampang inganan ni tumpak i. Molo di gomak godang, olo maila, patanda hu na pahepeng hu. Manang, na biar do rohani protokol i, tor digomak parumaenna i sagodang ni godangna di ibana?. Ra, dang sai ingkon dohonon –Dua jari baen hamu–.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s