TORSA

Parjamita Sajuta Ruas



Tolu bulan na salpu, diarisan ni parsahutaon Saurdot, dipatupa pangojakkonon ni panitia Natal. Ala satolop do sude anggota pamasahon Natal Parsahutaon. Gabe hasomalan siganup taon punguan on patupahon Natal, mamestahon ari hatutubu ni sipaluai.

“Bah, anggo tu parjamita do nuaeng, au pe mangalului” ninna amanJatikkos. Dung sahat panghataion on tu parjamita. Binoto do rupani na godang dongan ni ibana angka partohonan, nang pe rupani dang na sahalak sintua ibana.

“Nauli molo songoni, alai dah, unang songon parjamita nataon i, sobinoto dia nidokna, mondohondok ruas i, dang marimpola”

“Ah, ho nian lae, sai i dope ingoton, ujung taon nama on?” ninna amanJatikkos mangalusi

“Na pasingothon do dah lae, nga diantusi hamu nuaeng, sahali-sahali do iba mambege hata ni Tuhan i, jei agiat pala di nasahali-sahali i tor hantus begeon” ninna amaniSumuang mangalusi

“Ai sude do denggan jala marimpola jamita i, manang na ise pe patolhashon” ninna OppuJaringkot

“Olo ma dah, Amangboru, toho do nanidokmunai, alai molo mellop-ellop do namarjamita i, olo gabe mondohondok iba, songon nataon” ninna mangalusi dipadua hali.

“Pas do i lae, molo boi nian, parjamita na tarbarita i ontang hamu, datung so adong diboto hamu dah, Tulang” ninna amaniJatolhas tu amanJatikkos. Ia amanJatolhas on, antar godang do hata dison, boi dohonon parpollung tubudu do ibana, ai dipadomu do suhutan sian argani boras rodi argani tano.

“Olo, Amangboru, nadibulan na salpu nga hea hutariashon tu dongan, topet parjamita nautusan do ibana, ai ditanda hamu do ra i, sian Gareja Las ni roha. Datung so adong hita naso mananda ibana. Mardomu muse apala kedanhu do bayon, molo nga au mangidohon annon, dang tarjuasa i, boi dohonon Parjamita Sajuta Ruas ibana” ninna amanJatikkos.

Dang haru binoto sian dia do parkedanon ni amanJatikkos tu parjamita nanidokna i. Dia do sahalak ruas na habilangan jari-jari tu parmingguan markedanhon sahalak parjamita. Ai dang na binoto pe hajogion ni amanJatikkos on.

“Boasa didok Parjamita sajuta ruas? na sajuta do godangni ruasna” ninna amanJatolhas

“Dang habahas hita be i Amangboru, situruk ho innon” ninna amanJatikkos mangalusi hut mengkel

“Buti, istilah saonari, Parjamita sajuta ruas songon na geok nian, au pe hurang tangkas do mangantusi pandohan on. Ai kedahon dongan magodang hu do, dang arop roha na gabe parjamita bayon. Saonari, manang didia pe nga marjamita ibana, sian desa na ualu ro do manggokhon asa ibana marjamita. Ai sanga hian do kedanhu di partambalan, hape sonari daba nga denggan ngoluna, nasib na i” ninna amanJatikkos muse

“Sabotulna, diboto hamudo boasa didok Parjamita Sajuta Ruas?” ninna amanJamordong tompu, sa nangkin dang haru dohot manjahuti nonang i

“Bah, alana gok ruas na”

“Ima hamu, patigor hu do ahamuna”

“Jei, aha do, Amangboru?”

“Porlu botoonmuna?”

“Adong dope lapatanna na asing?”

“Nanidokna disi, sahali marjamita ibana ingkon sajuta manang lobi ma jalang-jalangna” ninna amanJamordong

“Ido hape?” ninna dongan huhut margahargak

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s