Wessel

Dung hos ari, mulak ma OppuJatikkos sian balian. Ninna rohana, lao martugo sangombas huhut paulak hosa loja. Dipeakkon ma panggu, sasabi nang hajutna, huhut ma dipahundul di balatuk i.  Halak na radot mulaulaon do ibana, dang diboto hasoan. So tahuak manuk dope nga disarat panggu laho tu balian.

Digalahi timbaho, huhut manatap tu nadao tu rura nauli, luat tano rambe. Dang sadia leleng, dipeakkon OppuJatikkos boru ma kopi nang Gadong na tinutungan. Ima songon manungkolui siubeon andorang so mangan indahan. Songoni do najolo masa, sai jolo marsipanganon gadong do sabutongna, dungi diallang ma indahan. Gabe tarboan-boan do hasomalani sahat tu saonari, nang pe nunga gabe be angka jolma, dang piga siallang gadong.

Adong do opat gelleng ni OppuJatikkos jala sude do diluat parserahan. Na jumonok di Jambi, hape molo tung masa Natal nang Taon Baru datung sai boi mulak.

Tolu nai di Jakarta na humaliangna.

Saonari on, dang pola longang be roha molo sude jolma on marhempon. Ai haru Oppu Jatikkos adong do hemponna. Ninna asa mura-mura manghatai tu pinomparna, atik dia adong namasa. Ai datung gabe hatealon molo marhempon di hitaan. Alai anggo najolo tutu dah, haru telepon ni jabu, listrik nang na asing tung mansai maol do i idaon.

Dihumalaputi Oppujatikkos boru ma mandapothon ibana tu balatuk i. Ninna adong telepon sian Cikarang. “Eh, Oppu Jatikkos, alusi jo anakta bah, jalo ma neh”

Toho ma nian tutu, AmanJatikkos do namartelepon sian Cikarang.

“Hipas do ho bapa, sai hu bell sanassogot dang marna dialusi hamu” ninna amanJatikkos
“Hipas do hami amang, inongmu pe hipas do, boha barita muna, boha pahoppukku si Jatikkos” ninna OppuJatikkos manukkun
“Hipas do hami saluhutna  bapa, lao do pahompum singkola, parumaenmu pe dang di jabu, holan au do” ninna mangalusi.

Dungi lalap ma nasida marnonang, manaringoti nasa sitaringotan. Didok AmanJatikkos dang mulak nasida taon baru on. Alani angka siulaon dohot suti ni parsingkolaan naso adong, alani proyek, alani parrapoton alani adona, ala ni adui, gok ma dihatahon ibana karejona, jala ido umbahen naso boi mulak tu huta.

Manginongi do rupani dirohani OppuJatikkos. Nga sajom na manghatai i alai dang nanggo disukkun “adong do pasi biddamuna, Bapa?”. Ia so i, “Ai nunga manuhor kue tambaru hamu?”, Ia so i nian “Ai nga maribak mandar mi bapa?”. Lalap do holan karejona dipaboa-boa AmanJatikkos.

“Nadiadia do bapa nuaeng, songon na guntur hubege”
“Imadah, Amang, di balatuk ni jabutta on do au, inongmu di pudian do mamahan pinahan” ninna mangalusi
“Ai godang soara ni jolma hubege”
“Olo bah, ai nungnga di pature pamarenta sada kantor pos di hutanta on, Amanng. Apala jonok do tu jabutta. Jei marlao mulak ma on angka jolma on, adong ma namanongos surat adong na dia. Nahumebatna, gumodangan mangalap wessel do nasida. Huroa manongosi do pinomparna sian pangarantoan. Songon tulangmu Par-Tukkang Anduri-an, tolu wesselna, jala dilean tulang mi do songon pasiBidda nami. Sian jabutta on do  nassogot.  Burjuma nian tulang mi” ninna OppuJatikkos mangalusi.

Tarjolma ma amanJatikkos, lalap artana nang karejona ditaringoti, hape pasibidda saratus ribu dang ditongos,  haru disukkun pe daong. Sip satokkin. Dang tardokna manang aha. Alai bisuk do ibana, ninna mandok amongna “Ai naso sahat dope wessel munai bapa?, leleng mai ateh, ai dua ari na salpu do hu tongoshon” ninna ibana.

Huhut ma dihumalaputi mangesemen NanJamordong asa ditongos wessel  sadari i.

Satu pemikiran pada “Wessel

  1. horas laekku,nga hudalani be huta muna on,panigoran,hau agong,parluasan,dolok pinapan dna,alai dang hubereng dope sampuran sipulak.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s