Asang-asang

Disada tikki, manang pada suatu hari ninna parbahasa indonesia–di pardalanan dohot oppuPartogi mangebati angka sisolhot di bona pasogit tubu ma nonang. Songoni do na maramang on–topet attar jonok jala tabo do donganon marnonang–, tung godang do naboi tinaringotan. Sian desa na ulau sahat tu PSSI, sian Sijama Polang rodi  KPK, sian argani salak rodi Kantor bupati, hut mekkel.

“Nian ma huta ni dongan tubutta Marbun na di De Pe Er i, na godang sipandukna di Pakkat nang di DolokSanggul i” ninna hut ditudu sada huta sian panatapan i.

Gabe huingot tutu, marjojor do sipanduk mandok Selamat Natal / Tahun baru di huta nami, gok. Dibaen disi “Sian Anak ni GURU DESA”. Ro tu rohakku, marasing do huroa guru di Kota dohot di Desa.

Molo hulapatani muse, SAKALAS do hape hami nadua dohot anggoda De Pe Er  na sian Partai Bintang Biru i. Boasa, Ala au pe anak ni guru desa do.

 

Dang sadia leleng, binolus ma sada huta. Songon na geok do huhilala hu ta on. Di dolok-dolok tung mansai godang huida banda –kuburuan– na mansai uli. Ra, molo huetong adong do saratus lobi, jala dang adong na sarupa.

 

“Daga puang, uli-uli na i tambak on, massibaen dibana be do tompana” ningku, mangupir hut huparrohahon sada-sada.

“Disan dope na humebat, bereng ma annon, sian desa na ualu do gorgana, model eropa rodi model simaninggir –goar ni sada pelosok di huta nami–” ninna OppuPartogi, hut dohot mampanotnoti angka banda na marbaris-baris di dolok, di topi dalan.

 

“Imadah Among, datung na manghata nasida nampuna banda –tambak– on, alai molo huida do angka jabu na tabolus, tung mansai longang do au. Ra, arga ni jabu ni namangolu on dang lobi saparopat arga ni jabu ni namate on” ningku, nanget do hudok, alana among-OppuPartogi on, songon na koras do tu paradaton batak. Sotung do rupani ro tu rohana, na manghata adat i au, manang dang satolop tu na mambaen tambak.

“Diboto ho do anggia,…” ninna hut serom

“Boha Among..” nikku, hut huserbeng dompak ibana

“Unang suba-suba marnonang dilapo, manang manghatai di adat, manang marhata mangggang tu dongan molo so denggan banda–tambak– ni oppungna”

 

“Boasa?”

 

“Ido, ai asang-asang ni jolma i doi dison. Dipangarantoan ni anakkonna pe tong do tambak on asang-asangna. Unang marhata manggang ibana. Unang didok mamora manang gabe di pangarantoan molo so dibaen tambak ni ompungna, jei marlomba-lomba do mambaen tambak. Molo godang hatana di lapo tor didok halak do –didia tambak/banda ni oppung ni i, asa ni ida jo. Anggo songoni dope banda ni oppungna, unang marhatai bah, au sandiri boi do patupahon 17 banda songoni” ninna OppuPartogi patorangkon.

 

Mekkel hami.

“Gabe asang-ansang ateh” nikku

“Ido ampara, asang-asang do diluat on tambak ni ompung i” ninna muse

“Jala diboto ho do ampara, dua do narumingkot  ugasan na pinauli ni tangan na tung mansai uli di halak batak, Parjolo KUBURAN/TAMBAK ni OPPUNG, na paduahon ima GAREJA. Dang paduli molo naeng rumpak jabuna, manang tading tolu tiangna asalma na dua i denggan”

 

Serom au, mantap, ninna rohakku. Patut do maru mar-clouster gaya EROPA tambak i dibaen, sian batu na pir marpatung-patung, hape jabu ni pinomparna nunga naeng rumpak. Tolu nai nama tiang na.

 

 

“Bah dihuta Sitobok-tobok asing muse do asang-asang disi” ninna OppuPartogi muse, tong mekkel hami nadua

“Boha parasingna, Among”

“Molo disi, parumaen do asang-asang”

“Bah, dia do muse” nikku hut mallakak mengkel

 

“Olo, molo marhata manggang di lapo, tor didok  do, Boasa sai marhata manggang, Ai Pe En Es didia huroa parumaenna, sai na dibahen do”

Bah, boasa huroa sahat-sahat tusi?”

 

“Ima!. Ai marlumba do jolma disi marparumaenhon Pe En Es. Sai tor tamba do pangkatna molo Pe En Es parumaenna, nang pe holan kenek anakkonna. Didok ma na jago martandang anakna molo dapotsa Pe En Es.–Ai anak ni amana do ibana Bah!!..dapot sa do puang Ensik guru Es De i–ninna”

Mekkel martata hami. Ninna OppuPartogi, karejo ni parumaen do gabe asang-asangna.

“Jei di hutanta dah, asing muse do. Olo do tuk sadari manipat dilapo holan manuhuthon anakkonna, agia nunga sampulu hali disuhuthon. Tor gabe boha huroa, haru anak niba pitu sarjana dang gok hata niba. Ia so si tor dilean ma hamauliateon tu gareja, ala naung sarjana anakkonna. Ingkon jahaon do gelar ni anakkon na i. –Jinalo do hamauliateon sian anak ni hurianta ima Insiniur Jatikkos Lumban Gaol ala naung sidung parsikkolaanna, jala nungga martitel Insiniur–. Unang suba-suba dang manjahahon gelar i, tor diroro do tu konsistori, manorui!.”

 

“Gait na i”

“Olo, jei unang godang hatana dilapo molo so marhasil anakkonna. Ia so i di tintingkon do digareja Jinalo do hamauliateon sian amanJatikkos ala nunga sidung dipauli anakna na di Cikarang i jabuna tolu tingkat…..”

 

Ima asang-asangna.

 

Lao do tu rohangku, aha ma naeng asangkononku  molo tu lapo au. Ninna roha huasangkon ma annon, godang dongan hu di PESBUK on, ia so i huasangkon ma na ganup jom au mangapdet sitatus. Aha be?, ai molo huasangkon na jago au minum tuak, ra dang pola mandok dia, hea do huida di huta nami, haru marsuap pe  nga tuak dibaen.

 

Sai na dibaen do…..

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s