Pinta-pinta ni AmanJamordong

 

Marmassam do hagiot ni daging. Ai sipata molo apala mongontak hian, olo do dang niranap tu pudi tinailihon tu jolo, tinuntun lomo dang marmana-mana. Dijuljul sambing, asa haru puas nadi roha on. Ninna halak, ummarga do i martimbangkon arta mas nang sere. “Tu aha arta i, molo  mangan pe susah, gok pantangan ni dokter, dang boi an, dang boi on” ninna amanJamordong dibagas rohana. Molo nga las roha, sonang pangkilaaan, ido arta naumbalga, ninna muse.

*    *    *

Longang situtu do rohani amanJatikkos mida dongan saparmeamanna, amanJamardong. Dia dang sukkun-sukkun roha, saleleng on, datung hea tatapon bohi marsak. Gok nonang, rarat hata. Manginongi tu rohana, naso marhepeng do?, manang ala ni na tarbalik muse nomor i?. Nian anggo alani na dua i do, dang haru songoni peut ni bohina. Songoni do namamasang togel on, holan suhar pe togongani, nga las roha. Ido mambaen lalap, diulakkon muse, andigan so tongon. Gumodangan ma manuhor togel sian na dapotsa. Dituhor saratus ribu dapot onompulu ribu do, leanonna ma dipanurat limaribu dungi manggarar kopi salapo duapulu ribu.

“Ai songon na murhing hamu lae,  gabe biar iba mangakkupi” ninna amanJatikkos dung rap hundul nasida.

Sip, dang maralus alai dipeakkon sigaretna, asa dibuat amanJatikkos.

“Aut dia nuaeng na boi niurupan, ba na rade do dison” ninna muse

“Ah, dia ma tarurupan hamu sitaonon on”
“Boasa songoni lae, anggo apala mangaropang halak do, au ma tusi, ise?, adong na solot diroham, asa ta padenggan, ise halakna”, ninna amanJatikkos. Lapatanna rupani, tapadenggan ninna asa di balbal ibana. Namura gasa-gasaon do bayon, mura muruhan, alai mura mulak rohana. Masitoparan pe taho, alani dongan olo do on. Ido asa lobangon tolu iponna di jolo, nga sai hira gerbang ni perumahan. Ai nda, na martopar do nasida dua bulan na salpu. Nga piga natua-tua mamissang, alai dang mehon, dang diboto naung ama-ama ibana. Lumobi molo masuk na marraru, suara ni bayon nama sibegeon.

“Imadah lae, nga tolu halak manulak au, dang dilean marutang,  hape ikkon bayaron utang i”
“Bah, tu ise ho marutang, beta lao hita, asa tadok bulan na ro bayar hamu” ninna amanJamordong, hut hehe

“Daong, Lae, ikkon ari Jumat do. Abbal ni hata, adong di ida hamu ampolop na bottar dua ari na salpu, na lao hita tu inganan ni begu i?”

“Dia do lae on, ai sian i do dibaen hamu bayar ni bir dohot manawer anak boru na marende i”
“Naruhakku pe, ido parputushu lae”, ninna amanJamordong mangalusi.

Dua ari na salpu rap minum do nasida di kape batak na adong di huta i.  “Dia do lae on dah, ipe mulak sian partangiangan weik, hape tor tusi diarahon, na mambaen jea do ho?”, ninna amanJatikkos mangalusi.

“Ai gabe hona bir na sian partangiangan i, hurang otik nai” ninna mangalusi. Dung sidung partangaiangan, diparade parjabu do sipanganon, somal do i, adong na mambaen laffet, kue, alai adong muse na mangan. Sobinoto manang mangan beguaha goar ni i, ai jam 10 borngin nama. Molo antar paradongon do namanjabui i, olo do diparade  bir kaleng. Piga-piga kaleng, didorguk amanJamordong ma, ujungna gabe mangido tambu.

“Beta lae, mar-tangan diatas-, paitte so mate hita” ninna amanJamordong, ninna hut hehe ibana, disarat itoan na hushus i tu jolo.

“Na tabo i jo baen laekku, asa marnostalgia jo au” ninna siJamordong, hut di golomhon parlimapuluan tu tangan ni parende.

Dang sadia leleng antong, dung dipaullus-ullus sasahali mik on, dibaen ma lagu na pinangido ni AmanJamordong. “Sebuah nomor permintaan dari mister Jamordongs dari Cikarang, akan kita putarkan” ninna parende on, dibereng tu inganan nasida, hut diangkat tanganna songon na marhormat sai hira tentara.

Attar songoni ma rupani namasa di borngin i. Ia so i, dipamasuk muse parsappuluan tu sakku  rok ni boruadi na angur i, dung sidung mandongani  martumba  Supanyol. Suda hepengna da dihilala holan mamitta ende. Sipata maru ingkon mardalan pat lao mulak. Naummarga sonang roha, hepeng gok di bank, sululuan molo hurang, ninna di rohana.

Didadap ibana ma dompetna, manigat, sadia nai dibagas. Alani raru na paet i, nunga peut sada-sada do parsappuluribuan i sian sakkuna.

*    *    *

“Lae, pautangi ma jo au,  ro nama amanta Porhangir tu jabu, mangalap hepeng i”
“Marahua do nimmu ro, adong singirmu tu nasida?”
“Ai hepeng huria, hepeng durung-durung do hubaen manggarar minumanta nang manawer parende i, ikkon setoron tu kas huria” ninna.

Sip amanJatikkos,  “Tolong kayu-kayu” ninna ibana marsurak, hut hehe. “Dosami lae, taonma disi, unang sahat-shat tu au bah!, anggo leakta sai hira pengassara” ninna muse, dibuat sabatang nai sigaret ni amanJamordong, maporus.

Huroa, amanJamordong maniop durung-durung partangiangan i, niantusan ma molo partangiangan di jabu ni paradongan, sai taho do godangna.

Na sittua do amanJamordodong on? boasa ibana maniop durung-durung? ikuti kisah selanjutna……emmada.



Satu pemikiran pada “Pinta-pinta ni AmanJamordong

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s