TORSA

Mar-Prostitusi

Disada huta, dipamasa ma parrapoton. Ima rapot naeng pajonjongkon parpunguan ni halak batak. Dang piga dope na ro, hape nga guling ari, nata pe ari minggu–dang ari parkarejo– alai songoni do huroa, pas hira pandok ni akka dongan. Mendat do jom ni batak, ai sian karet do dibaen. Ido dah, tung mansai ulaon na loja do na paima-imahon on, ai molo ro do sipaimaon i, dang haru marisuang tikki i, alai bohama molo dang ro?.  

Dipamanat OppuJatikkos jomna. “Ai namandok boha be nama hitaon?” ninna. Sude do dongan huta mamboto sadarion do nasida patupahon parrapoton. Nian datung tarpapungu rampak saluhutna angka dongan sahuta on, bohama na marhais martuduk di tano parserahan on, nangpe ari minggu, alai sai adong do na karejo. Ala ibana natumua dihuta i, ditugan ma ibana papunguhon dongan nasahuta, ai marsangkap nasida lao mambaen STM, Sarikkat Tolong Menolong  manang punguan parsahutaon.

“Holan Tulang nama natumua di hutatta on, manang bohape, molo hamu manjou akka dongan on, datung so ro, ai anggo hami do nuaeng dang ditangihon” ninna amaniJatores.  Toho do tutu, nga leleng nasida marsakkap naeng mambaen punguan i alai dang marnasaut. Adong ma alani ulaon, adong alani paradaton, adong alani marorot ala dang adong apngurupi. Marmassam ma sidalian. Tutu, ringkot do adong parsahutaon i

Tep ma, dung marsipaimaan nasida pola tolu jom lelengna, dimulai ma parrapoton i. Rupani, amanJatores do na manguluhon, ala tardok, ibana do namanjabui jala ibana na manggogohon asa dipamasa parpunguan i. Anggo amanJatikkos manangi-nangi do sian na dao. “Molo tung ringkot iba mangkatai, ba hubaen pe, hamu angka naumposo ma jo dah, ai sipanolopi nauli do di natumua” ninna ibana.

“Ninna roha unang sahat tu si Anggaran Dasar i, anggo so tarulahon do, boasa pola baenon, gabe utang ni pangurus molo dang diulahon” ninna amanJaholong.

“Satolop, Lae” ninna AmaniDuasa

“Pandapothu, ringkot do i, jala disi do tapataridahon holong ni roha tu sude dongan sapunguan” ninna AmanBosiha. Ibana do mambaen usul, molo adong na sorangan dakdanak didok asa dibaen sipalas roha sian anggota, martekkel les.

“Ninna roha, holan sian kas i ma tapatupa, ai las ni roha do i” ninna nadeba. Songoni ni ma nasida namarrapot i, marsialusan, masilean pandapotna be, olo sipata gabe guntur.

Dang tarpabereng-bereng oppuJatikkos namarrapot i, morot ma ibana sian hundulanna, pajonokkon hundulan, huroa naeng mandok hata. Dung diintopi timbahona, ninna ma “Prostitusi…prostitusi jo” martudu ibana. Sip ma satokkin namarrapot i mida OppuJatikkos.

Masiberengan amanJatores dohot amaniBosiha, “Aha do nimmu, Tulang”

“Prostitusi jo, ai rapot muna huida sai hira rapot ni ina-ina, sude makkatai. Prostitusi, jo…” Ninna ibana. Diuduti muse, “Marguru hamu saotik, marisuang do na manonton tipi  ganup ari on, haru iba naung matua boi ni ihuthon aha namasa. Asa denggan parrapoton i, jala asa denggan masialusan, molo naeng makkatai hamu, jolo mar-Prostitusi, bereng hamu de pe er  na di  Senayan i, gok jolma alai sada-sada domanghatai, sai jolo mar-prostitusi molo naeng mandokhata, dungi ikkon dioloi uluan ni rapot i do” ninna partorangkon.

“Interupsi do Tulang, dang prostitusi, nga na nama-masa i non i” ninna amaniBasiha hut serom.

“Ah, manang na i pe taho, interupsi, prostitusi, bosi-bosi, si Jarusi, begu attuk i,…aha ibbar ni i, sarupa do i, holan pandohanna do na marasing, alai ima dokkon hamu molo naeng mangalean pandapot. Sai jolo mar-prostitusi ma ” ninna oppuJatikkos. Huroa somal do dipaihut-ihut ibana na marrapot nadi senayan i di tipi. Jaya ni prostitusi ma tahe i…

2 thoughts on “Mar-Prostitusi”

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s