Akkal ni Sijamordong

Diparhatutu rohakku do pandohan ni OppuBasiha, inangan marhadomuan tu rajokki, ninna ibana. Datung na naeng manaringot feng shui ni halak Sina pandohanna i. Nanidokna rupani, didia iba marinangan marhadomuan do tu rajokki. Molo pinatorang on disele-sele naso marimpola on, olo ma innon marganjang maredet-edet sian Purba sahat rodi Dangsina. Ai nda songoni do nang si Jamordong?.Tolu halak ma nasida sakontrakan di Kalimalang. Dang na naeng manariashon didia nasida marulaon, jala songon dia rumang ni ulaonna ganup ari. Nadua nari ima namargoar si Jatolhas dohot si Jatuha. Jala si Jatuha do naparjolo mangingani jabu i. Na so panagaman, pajuppa ma ibana dohot siJamordong di Terminal Bekasi. Ala rap pangaratto sian huta nasida, sa panghilalaan porsuk ni namangaratto, gabe dihara di Jatuha ma tu jabuna. Ba manang tung songon dia pe nasida nuaeng di jabu i,marhansit-hansit na mangarattoi, dihalashon do. Marsirippa ma lao manggarar kontrakan.

Dinasadari, hatiha hundul-hundul nasida dijolo i jabu i, ro ma sahalak doli-doli mangalului inganan kontrakan. Ninna parsikkola jala parkarejo do ibana. Asa jonok tu parkarejoan nang parsikkolaanna, ba dinahumaliang ni jabu kontrakan ni si Jatuha ma disoso. “Bah, halak hita do hamu lae, au marga Marbun do sian DolokSanggul” ninna siJatuha patandahon dirina, las rohana, ala halak hita do doli-doli onteng.

Jompok hatadohonon, diboto nasida nadua ma naung loja sidoli mangalului jabu inganan, dang marnadapotsa. Marsiberengan ma siJatuha dohot siJamordong, dungi didok ma “Buti lae, nian datung manang alani sidongan di hami, alai holan palilung do jala ala mangkuling do mudar ni halak batak, ba molo olo hamu, dison ma hita. Alai tutu dah, dang sadia lumbas, jala hami nadua do mangipai bilut on” ninna. Ima bikkasna, asa gabe sajabu nasida na tolu.

Siapata rupani, diparngoluon siapari namarhais martuduk on dang sai hatikkian adong rupiah ni sakkuan. Ipe molo tung adong sasagetep, olo do tong niattan palaohon ala hurang do molo dibagi dohot dongan. Songonima, molo dang marhepeng nasida natolu sai dilului do akkal bohama asa boi rap mangan. Sipata, dituhor do holan hua ni rendang padang lao allangon laok ni indahan,–nasiputih– i. Alai ipe dang boi torus, datung sai dilean parrumamakkan padang i torusmanorus songoni. Na asing muse, olo dituhor manang na piga tusukan sate, alai dipagodang ma uram-uramna.

Ganup ari sabtu marulaon do halak batak di gedung pertemuan apala dua ratus meter do sian kontarkan i. Dimulana, dang haru diparateatehon nasida manang na ise marulaon disi. “Gok ni halak marulaon dah, dang tarihuthon i, alai molo tung apala dongan takkas, ba lao iba, akkup ni sian dia baenon manumpaki i” ninna si Jatuha dibagas rohana. Jot-jot do diida si Jatikkos ro tu pesta.

Dimulana dang apala dilean nasida rohana, ba lao tupikkiran na si Jamordong, na pamili ni siJatikkos namarulaon i. Dongan nasida do siJatikkos on, alai dang sakontrakan. Sai lam dipamanat ma rupani, dapotsa ma aha naniulani si Jatikkos di pesta i, boasa sai ringgas ro tu inganan i. “Ah, on do hape tutu, siulaon do on, pinomat padenggan pitamin ro iba” ninna siJamordong.

Balik mingguna, sip-sip, dipakke siJamordong ma bajuna nadumenggan, lao ma ibana tu pesta i. Dung bongot pengantin on di hundulanna, ba ibana pe masuk ma, dibuat hundulanna. Dang sadia leleng tutu, dipukka protokolma tangiang mangan. Martua mangan. Marsiberengan ma siJamordong nang si Jatikkos sian meja na sada tu meja dibariba adui. Serom, dungi marsihidopan. Songoni ma dibaen nasida. Alai gabe tarboto do hasomalan on tu si Jatuha nang tu si Jatolhas, ala ganup disukkun manang diarahon si Jamordong lao mangan, sai torus do manjua.

 “Nunga mangan au bah” , hape so adong hepengna manuhor indahan.

Ia so i “Dang male au” ninna.

Ujungna disagi ma martikkian, dang boi nasida rappak-rappak mangan di pesta. Molo siJamordong hundul di meja, ikkon di inganan ni parsolam do si Jatolhas, jala di inganan ni ParIndahan Nasional ma siJatuha.

Disagi ma partikkian marsoring-soring. “Ah, ai sian dia do saleleng on ho, tinaon male hape godang siallaong” ninna siJatuha. Alai hea do nasida naeng tardapot ala adong manukkun, ai apala isem na marpesta on lae?.

Dang taralusan si Jamordong didok ma “Ai anak ni nanguda sian tubu ni si pai tolu na mangoli tu halak Jawa na di tano Jawa an ma paloni i, alai oppungna pe mar-oppung mangulahi ma tu tulang ni namboru namaubuhon inang baju ni damang ima nasian SiattarSitannduk” ninna ibana mangalusi.

“Jei hamu?” ninna manukkun Didok amanta namatua on,–goarna OppuJatikkos– mangalusi, “Apala tetanggaku ma nanidok muna Par-tanoJawai jala hombar balok ni inanta ma nidokmuna, inang na jabu na nidokmuna parSiattarSitanduk i”.

Rap serom nasida “Ah, sarupa, rap pangolpuk” ninna be diroha, huhut lao.

Satu pemikiran pada “Akkal ni Sijamordong

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s