TORSA

I No Fany, Saya Dornauli

 

“You, funny” ninna sahalak bule tu inanta partiga-tiga dipintu ni onan.

“No, Ser” ninna nanJatikkos –panggoaran ni inantai–mangalusi, alai mekkel ibana, dipatudu iponna na marsap debban. Hut muse diantoi ibana  angka bule na mamolus i manjajohon boniagana, salak, mangga nang akka na asing.

Bohama namarboniaga, ikkon malo-malo do mambuat rohani panuhor asa sai ro be. Dang songon halak rupani, ala so saut di tuhor olo dibursikkon partiga-tiga i. Ia so i dipahata-hata,–marhata met-met– sian pudi, didok, anggo so marhepeng do unang niargaan tiga-tiga ni halak. Jora halak, ia so i gabe tu parbadaan.

Dang sadia leleng, ro muse bule na asing, mamoto ibana ,mekkel nasida mida nanJatikkos, sipata manortor do ibana hut dijouhon “Mangga Ser, Mangga Ser”
Mekkel bule on, “You Funny” ninna.
“No Ser” ninna nanJamordong mangalusi “Weee Dainang, diantusi halahon do naeng hatakkon, Na ma Na,… alang hamu jo boras ni mangga on”ninna muse. Anggo apala bahasa inggris i antong, ba holan na piga kababa ima diboto ibana, No, Yes, Gutmoning, nang akka gut-gut na asing sian i. Ai ipe da nga taho i?.

Ari lam hos, marhusor NanJantikkos padenganhon mandarna dungi dipadippu boniagana asa narupe annon hallungonna lao mulak. Diranap dao tu jolo di ida dompak onanan, tung mansai ribur situtu. Piga-piga bule marsibolusan diparrohahon NanJatikkos. Ganup mekkel nasida dibaen NanJatikkos sai didok “You Funny” alai mangupir ibana ” No, Ser” ninna.

“Tuani ma ro ho anggi, nga tung manombo sahit gontinghu manghidati mangga on, urupi ma jo au” ninna NanJatikkos tu sahalak dakdanak parsikkola. Ninna maenna i.

Diarga bule on muse mangga  on, dungi dianggo tarutung, diangkat muse honas on, marmassam ma tahe pangalahoi di ida ibana. Sai naeng do dipatorang NanJatikkos boha do mandok na tonggi. Dungi naeng muse dipatorang ibana bohado mandok, alani tonggina honas on, godang do diharat bagudung, tarsongon na pinatedek na tu bule i. Ala dang tolap ibana dipasuman ma soara ni pidong, herek nang na asing. Ido asa mekkel bule i. “You Funny” ninna dung naeng lao nasida.

“No,..no…”
“Yes..yes..you funny” ninna bule on muse.

Ala di ida maenna on rupani songon na marsoal namboruna on, dijonohi ma, disukkun aha namasa.
“Ah, lioat on, Anggi, bule on, sai maos iba didok si Panny, ai da si Dornauli do goarhu, patorang jo anggi, dang si Fany au, si Dornauli do, ai na suman do bohikku tu si Fany ni parumaen ni amang par-masin an?, patorang jo anggi, patorang..” ninna ibana, hut didok “No  Fany, … No fany Ser,..Dornauli…Dornauli, horas ma…horas” hut ditudu tu andorana.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s