Parsorion

Kuitansi ni parbarita sosukkunon

Diboto OppuPartogi do haroro ni sitiop pitolot, namalo sigana surat , parbarita sosukkunon,– waratawan– tu jabuna. Barita sian dongan, ris do akka parsikolaan na dapotan proyek padipposhon parsikkolaan ditopot nasida. Patolu halion ma ibana disukkuni, jala dipatorang OppuPartogi dohot denggan alus ni sukkun-sukkun ini. Ninna rohana molo denggan dongan marpanukkun ba dengan ma alusan. Hape dang olat ni jabu, tu kantor pe ro do sibaoadi. Ninna donganna sakarejo ba opat hali ma saminggu on ro, marnida proyek. Topet dang disi OppuPartogi.

 

Manogot na, saparisapan timbaho dope OppuPartogi di hundulanna, nga ro siboto surat ondeng. “Horas di Bapai,..” ninna pantun marpanukkun.

“Bah, horas, apala aha naporlu, Lae, dimanogot on hamu ro”

“Imadah Bapa, ai mangalolai hami?”

“Songonima, ai naeng mangajar sikkola au, antusi hamu ma ulaon nami guru on”

“Atong na hatop nai ma, Bapa, ra nga diboto hamu i, sabotulna nian na manukkun proyek pembangunan parsikkolaan muna on do”

“O, anggo i do naeng sisukkunon muna, ba ndi…nian do proyek i, molo naeng potoon muna, lao ma hamu, jala sukkun hamu ma pamborong na i, asa lao jo au satokkin mangajar” ninna OppuParoti hut disarat bukkuna.

Satonga jom, dung sidung mangalean tugas OppuPartogi, mulak ma tu kantorna, didapot nga disi muse sibaoadi.

“Ai nga dibereng hamu proyek i, Lae?” ninna manukkun

“Nunga, Bapa”

“Jei adong dope na asing sian i?”

“Ba, nga mangattusi bapai disi…”

“Dang huantusi aha nidokmuna, ai bohama, guru sikkola metmet do iba, jei dang haru binoto mandodo rohani dongan, tao na bagas do boi dodoon alai anggo rohani jolma datung ise boi mandodo”

“Ai somalna molo uluan ni parsikkolaan na asing, tor hatop do iba marurusan”

“Attong tusi ma hamu lao”

“Nunga sian i hami” ninna mangalusi.

Hehe ma NaiHumusor sian karosina, didapothon OppuPartogi. “Ai jalang-jalang marisi do nidok ni i, bapa” ninna makkusiphon tusipareonna.

“Huboto do i Ibu, datung leanon i, ise halak oto-otoon ni” ninna mangalusi, jala mekkel NaiHumusor, ai diboto ibana, namalo marhata-hata do anggo oppuPartogi on.

“Buti Bapa, attar dao hami ro sian kota an…”

“Nga huantusi be i, dia nadirohamunai” ninna OppuPartogi mangalusi hut didadap tasna. Mekkel suping sibaoadi.

Huroa na paradehon kuitansi do OppuPartogi, dungi di dokma muse tu sibaoadi namalo marbarita i “Ai dang huantusi jala partobok do au Lae, jei asa takkas botoon muna, Sappulu taon lobi ma au bendahara pembangunan di huria, alani i ganup getep na hulean tu dongan sai husurathon do, asa adong buktina. Jei sadia ma pasibensin muna Lae, asa husurathon dison, dungi tekken hamu annon, manang hamu ma manurathon” ninna OppuPartogi hut dilean kuitansi i

Sip dang maralus.

“Bahen hamu goarmuna, alamat dohot goar ni suratkabar muna disi, asa binoto innon mambaen laporan naung hupahaluar hepeng ni parsikkolaan on”

“Ba, dang songoni bapa dah, pangalean muna do”

“Anggo getephu dang adong, haru tu anakkonhu hurang leanonku, alai getep ni parsikkolaan on, adong do. Ateh, Ibu NaiHumusor, adong do getep ditiop hamu?”

“Adong do Bapa” ninna mangalusi hut serom, “Matte ho, dai…” ninna di bagas rohana

“Boasa gabe songoni…”

“Ido uhum na hubaen dison lae, sukkun hamu akka dongan guru i, nasa getep na haluar sude do tarida, talak songon indahan di balanga. Haru argani labang ni proyek an adong do denggan disurathon dison. Jei sadia do surathononhu di kuitansi on lae, naeng hatop au bah, nga lola ulaon” ninna OppuPartogi muse.

“Attong lao ma hami Bapa, anggo songoni do hape” ninna

“Ido, attong horas ma molo songoni” hut marsijalangan

1 thought on “Kuitansi ni parbarita sosukkunon”

  1. boasa dang songon cara ni oppo partogion di baen tu akka anggota De Pe eR in ate, ittor habotoan ise namanjalo amplop, dang sai marsitugan tiganan be.

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s